San Marcos 4:23-33

²³Le' chenile dga nia', ḻi sen wṉeyi.

²⁴Na' ḻekzka' chi'e ḻegake': ―Ḻi se wṉeyi c̱heyi dga chzenagle. Na' shi gonle ka dii le, Chioza' wzajni'chile' le' dii xench.

²⁵Beena' chzenag, zizikchli shajni'chile', na' beena' bi chzenag, ax̱t daa ba benile' lat' yiyaḻ-lallee.

²⁶Na' ḻekzka' chi'e ḻegake': ―Yeḻ' wṉabia' c̱he Chioza' zaklebin daa chak c̱he biṉna' chaz beṉ'.

²⁷Beena' chaz chaaṉ, chila' daa chaze' na' chgolan ḻa'kzi chese' wa chec̱hj chdaze', ka'kzə shi waḻ wa tella, na' ni bi ṉezile' nak chak chgolan.

²⁸Lo yell-lioni chla' daa chaz beṉ': zigaate chila'n, na' chgolan, na' chzen do, na'tech chbian.

²⁹Na' kat' ba gol daa chbian, na' chizi' chilape'n.

³⁰Ḻekzka' che' Jesúza' ḻegake': ―¿Bera ka wsaklebicho yeḻ' wṉabia' c̱he Chioza', lla? wa ¿bera ka jempl wc̱hincho wsaklebichon?

³¹Yeḻ' wṉabia' c̱he Chioza' nakan ka sa mostásana' daa chazgake'. Ḻa'kzi ḻennan' biṉna' daa ḻiizelozi nesh'ch,

³²kat' ba bla'n na'ch chgolan na' chakan dii xench ka yog'te yix̱' kwan yoblə, na' chak xoziinka' dii xen ax̱t byiṉdo'ka' wak lljshiagakban na' sho'gakb xol c̱heyinna'.

³³Dii zan jempl bc̱hin Jesúza' ka bli' bsedile' beṉ'ka' cho'a xtill' Chioza', bene' kon ga zeelo wyajni'gakile'.