23!Ana amiu punu ga kiligamiu sike na, popon sa aloge kilia kiau visena nini!”
24Ana Yesu naga pis si pan la, pisape “Amiu monar ayagogan ruru kiau visena, asitom ruru la lia. Yaru nap̃a mloge, ana pe taveve re poli, naga yoko tap̃atete loge kilia ruru si narui. Ana yar nap̃a mlogear kiau visena la, naga kilia loge kilia ruru m̃ena kiau navianena la moki nap̃a sa imi si sirau.
25Ana yar nap̃a kiena suri moki pa rui, yoko war ve moki laa va laa sane, ana yar nap̃a pe kiena sur re poli, p̃isi na naga kilalu narin sur nap̃a mla ke.”
26Ana Yesu pisa ke sina ga pisape “Nasup̃enena kiena ne Ntewa naga sa nap̃a kona nap̃a yar tai naga peven ke e kiena porotano.
27Pogos nap̃a peven pae na, pe kila re si sur tai e kurus nene poli. Naga mom̃a momalio ga, tavilo, momalio, tavilo, sum̃alu, salue ga nene yemalo a legiena, ana kurus nen sur nene, naga ga sus plamolue, kapuru ke sanene. Kapuru m̃a pano-o, ana yar nene naga kiliar re kurus nen sur nene kapur ke sanape poli.
28Yar nene kilia re sur tai poli, pano-o korowas la kian pa perina piavi re na p̃ar vinasia, p̃isi na tau.
29Ana pogos nap̃a kinas la menmene ruru po, yar nene siar si miyum̃ae narui, p̃ar kiena playu pa te plan mrasnena lala. “Ana navesup̃enena kiena ne Ntewa naga kapur tekak ga sanene, telivi ke e yomarava wetelu nagane, ana e legiena tai yoko tekirawal pupia mrasnena vam metava.”
30Ana Yesu pisa sina, pisape “P̃elaga navesup̃enena kiena ne Ntewa naga pe tap̃ena ga sike na, naga m̃arera pap̃isi nap̃a nekilia nekirawal si p̃akaiwa tai nap̃a vena visaen sape naga sanape.
31Sa nap̃a kurus nen purpa tai yo, nap̃a naga tekaki ga miyuve kurus nen sur tap̃ena la nap̃a temapila la ke e kata lokove lala, naga tekaki na tekaki.
32Ana pogos nap̃a kapuru keviu, purp̃esia naga pimi keviu miyuve make ga kinanena tap̃ena la nap̃a sike e kata lokove lala. Ana pupia korowas la pap̃isi, nap̃a manu la akilia ava ase ea, vanon kana wamal po, yomanin ea.”
33Ana Yesu pian ke yeririna la e Lologena Wo e p̃akaiwa la moki sanene, nap̃a sane torokin yoko akilia aloge kilia.
Mak 4
Mak 4:23-33