1Iwe, lupwen Jesus a towu seni ewe imwenfel, eman lein nöün kewe chon kaiö a üreni, “Sense, nengeni lingöchün ekewe fau me ekewe imw!”
2Nge Jesus a üreni, “Ka küna ekewe imw mi watte? Esap fokun wor eföü fau epwe chüen nom lon lenian. Ekewe fau meinisin repwe toropasetiu.”
3Lupwen Jesus a mot won ewe chukun Olif pekilan ewe imwenfel, Petrus, James, Johannes me Andru chök ra feila ren.
4Ra kapas ngeni, “Kose mochen ürenikem inet ekei mettoch ka fos usun repwe fis. Kopwe pwäri ngenikem asisilen fisin ekei mettoch meinisin.”
5Iwe, Jesus a üreniir, “Oupwe mamasa, pwe esap wor eman epwe atupukemi.
6Chomong aramas repwe feito fän itei o apasa, ‘Ngang Kraist.’ Iwe, repwe atupu chomong aramas.
7Nge lupwen oupwe rongorong akürangen maun me pworausen maun, ousap niuokus. Ekei mettoch repwe fokun fis, nge esap tori mwo fansoun sopolan.
8Ekewe fanü repwe fiufengen o ekewe mwü repwe maunfengen. Epwe wor chechen fanü me lengita ekis meinisin. Ekei riaföü ra usun chök ekewe metek eman fefin a eäni mwen an epwe nöünöüla.
9Oupwe püsin mamasakemi. Pun repwe fötekinikemi o emwenikemiilong lon kapwüng. Repwe wichikemi lon ar kewe imwen felikis. Oupwe ütä mwen ekewe kepina me king pokitei, pwe oupwe pwärätä ngeniir mine a let.
10Nge ewe Pworausen Manau epwe akom tori aramasen fanüfan meinisin.
11Iwe, lupwen repwe fötekinikemi o emwenikemiilong lon kapwüng, ousap öüreki me mwan mine oupwe apasa. Lon ewe chök otun epwe torikemi mine oupwe apasa, pun sap ämi oupwe kapas, nge ewe Ngünmifel.
12Iwe, pwipwi repwe afangamä pwiir ngeni mäla, eman sam epwe afangamä nöün, nge ekewe nau repwe ü ngeni semer me iner o aturuur, pwe repwe ninnila.
13Aramas meinisin repwe oputakemi pokitei. Nge iö epwe likitü tori lesopolan epwe küna manau.
14“Ämi oupwe küna ewe ‘Mettoch mi Eniweniw’ a nom lon ewe leni ia esap ürürün epwe nom ie. (Ewe chon aleani epwe fokun weweiti met wewen ei!) Mürin chokewe mi nom lon Jutea repwe sütä won ekewe chuk.
15Eman aramas mi nom won imwan, esap wor an fansoun an epwe tötiu o tolong lon imwan pwe epwe angei och.
16Nge eman mi nom lemäl, esap liwiniti imwan an epwe angei üfan sekit.
17Riaföün ekewe fefin mi pwopwo me ekewe inelap mi oupwu nöür lon ekana rän.
18Oupwe iotek pwe ei sokun riaföü esap fis lon fansoun patapat.
19Pun riaföün lon ekana rän epwe fen lap seni ekewe riaföü mi fen fis seni lepoputän, lupwen Kot a föri fanüfan tori ikenai, esap pwal fissefäl ena sokun lon ekewe fansoun repwe feito.
20Nge are ach Samol esap amochomocha ekewe rän, esap wor eman aramas epwe manau. Nge pokiten chokewe a filiiretä a amochomochala ekewe fansoun riaföü.
21Lon ena fansoun are eman epwe apasa ngenikemi, ‘Nengeni, iei i Kraist,’ ika ‘Nengeni, a nom ikenan,’ ousap lükü i.
22Pun kraist chofona me soufos chofona repwe war o föri asisil me manaman, pwe repwe atupu ekewe chon fil are repwe tongeni.
23Iei mine oupwe mamasa. Ngang üa pwäri ngenikemi ekei mettoch meinisin mwen ar repwe fis.
24“Lon ekana rän, mürin ewe fansoun riaföü, akkar epwe rochola, maram esap chüen tittin,
25ekewe fü repwe turutiu me läng, nge ekewe manamanen läng repwe mwöküt seni lenier.
26Lon ena fansoun aramas repwe küna Nöün Aramas epwe feito won kuchu ren manaman me ling mi lapalap.
27Mürin epwe tinala ekewe chon läng lepelien fanüfan me rüanü, pwe repwe achufengeni nöün kewe chon fil seni lesopun fanüfan tori lesopun.
28Oupwe kaiö eu lessen seni ewe irä fiik. Lupwen palan kana ra anüen fetil o popuetä le pwüküwu chöön, oupwe silei pwe a arap fansoun räs.
29Iei usun lupwen oupwe küna pwe ekei mettoch repwe fis, oupwe silei pwe ewe fansoun a arapoto o molotä ngeni ar repwe pwönüetä.
30Enlet, üpwe ürenikemi, pwe ei pilon aramas resap mäla, tori an epwe fisitä ekei mettoch meinisin.
31Läng me fanüfan repwe morola, nge ai kapas kana resap fokun morola.
32“Esap wor eman a silei ewe rän are ewe kulok ekei mettoch repwe fis lon, ekewe mwo chon läng, ika ewe Nöün Kot resap pwal silei, pwe ewe Sam chök.
33Oupwe mamasa o afälikemi, pun ousap silei inet ewe fansoun epwe war lon.
34Epwe usun chök eman mwän a saila toau, nge a likitala nöün chon angang pwe repwe tümwünü meinisin mine a eäni. A awisa ngeni eman me eman an angang o allük ngeni ewe chon mamasa ewe asamalap, pwe epwe mamas.
35Iei mine oupwe mamasa, pun ousap silei inet samolun ewe imw epwe war, are epwe war lekuniol, are lukenipwin, are wünümweerän, are lesosor.
36Are epwe müttir feito, esap öch an epwe künok lon om möür.
37Mine üa ürenikemi, üa üreni aramas meinisin: Oupwe mamasa.”
