1Iwe, Jesus a popuetasefäli an afalafal arun ewe nomun Kalilea. Iwe, eu mwichen aramas mi chomong ra mwicheto ren, pwe i a tötä won efoch wa o mot won. Ewe wa a ekis kinewu lon ewe noom, nge ekewe aramas meinisin ra nom le pi.
2Iwe, a aiti ngeniir chomong mettoch lon pworausen awewe o üreniir,
3“Oupwe rongorong! Eman aramas a feila pwe epwe amworafeili pwükil.
4Iwe, lupwen a amworafeili ekewe pwükil, ekoch föün ra mworotiu lepekin al, nge ekewe machang ra feito o äniir.
5Ekoch föün ra mworotiu won lenien föüföü ia esap watte pwül ie. Ra pwükükai, pun resap nom lon pwül mi malül.
6Nge lupwen akkar a tötä, pwichikaran a apwichi ekewe kükün irä. Pokiten esap wor warer, ra müttir pwasala.
7Pwal ekoch föün ra mworotiu lein iräfölüföl. Iwe, ekewe iräfölüföl ra mämäritä o amopu ekewe irä, pwe resap tongeni ua.
8Iwe, nge pwal ekoch föün ra mworotiu lon pwül mi mürina. Ekewe irä ra pwukuta, ra märitä o ua. Ekoch leir ra uani ilik, ekoch wone, nge ekoch ipükü.”
9Iwe, Jesus a apasa, “Iö a wor selingan epwe rongorong!”
10Iwe, lupwen Jesus a emanüla, ekewe mi eti me ekewe engol me ruoman ra feito ren o tüngor ngeni, pwe epwe awewe ngeniir wewen ekewe pworausen awewe.
11Iwe, Jesus a üreniir, “Kot a fen ngenikemi ewe tufich ämi oupwe silei usun monomonen ewe Mwün Kot. Nge chokewe mi nom lükün repwe rong meinisin lon pworausen awewe.
12‘Iei usun repwe nenengeni me nenengeni, nge resap küna och, repwe rongorong me rongorong, nge resap wewe ren. Pun are repwe wewe ren, repwe kul ngeni Kot, nge i epwe amuserela.’”
13Mürin Jesus a aisiniir, “Ifa usun, ousap weweiti ei pworausen awewe? Ifa usun, ämi oupwe tongeni weweiti och pworausen awewe me mürin?
14Ewe chon fofot a amworafeili kapasen Kot.
15Ekoch aramas ra wewe ngeni ekewe pwükil ra mworotiu lepekin al. Lupwen ra rongorong kapasen Kot, Satan a müttir feito o angei seni lon leluker ewe kapas.
16Ekoch aramas ra wewe ngeni ekewe pwükil ra mworotiu won lenien föüföü. Pun lupwen ra rongorong ewe kapasen Kot, ra müttir etiwa fan pwapwa.
17Pokiten ewe kapas esap tongeni warar lor, esap tongeni nomotam. Pun lupwen a fis osukosuk me riaföü pokiten ewe kapasen Kot, ra müttir fangatä.
18Pwal ekoch aramas ra wewe ngeni ekewe pwükil ra mworotiu lein ekewe iräfölüföl. Ir chokewe ra rongorong ewe kapasen Kot,
19nge öürek usun manauen ikenai me atuputupun wöün fanüfan me mochenian ekewe sokopaten mettoch ra tolong lon leluker o amopu ewe kapasen Kot pwe esap tongeni ua.
20Nge ekoch aramas ra wewe ngeni ekewe pwükil ra mworotiu won pwül mi mürina. Iwe, ra rong ewe kapasen Kot, ra etiwa o ua. Ekoch ra uani ilik, ekoch wone, pwal ekoch ipükü.”
21Iwe, Jesus a sopwela an afalafal, “Ifa usun, eman epwe uwato eu lamp mi tin o anomu fän eu sepi are fän eu peet? Ifa usun, esap anomu ewe lamp won lenian?
22Mettoch meinisin mi opola epwe chök pwäpwäla, pwal mettoch meinisin mi pwölüla epwe chök pwäla lon saram.
23Iö a wor selingan epwe rongorong.”
24Jesus a pwal üreniir, “Oupwe aü selingemi ngeni mine oua rongorong! Ewe chök aükük oua aea le aükük, iei ewe aükük Kot epwe aea ngenikemi, nge epwe fen lap seni.
25Pun iö a wor an, Kot epwe achomongala, nge iö esap wor an, Kot epwe pwal mwo nge angei seni ewe ekis a wor ren.”
26Iwe, Jesus a sopwela le pworaus ngeniir, “Mwün Kot a wewe ngeni eman aramas a amworafeili pwükil won an tanipi.
27A möür lepwin o pwäta lerän. Ewe pwükil a kinoputä o mämäritä, nge püsin i esap weweiti ifa usun an mämäritä.
28Ewe pwül a püsin föri met ekewe irä repwe mämäritä o ua ren. Akomwan a kinoputä o mämäritä, mürin a fis etin, nge lesopolan a wor uan.
29Nge lupwen ekewe föün wiich ra mau, ewe aramas a kini, pun a tori fansoun kinikinin räs.”
30Jesus a pwal apasa, “Met sipwe tongeni awewe ngeni ewe Mwün Kot? Are meni sokun pworausen awewe sipwe aea pwe sipwe tongeni awewe ngeni?
31A wewe ngeni eföü pwükilin irä, ewe mi fokun kükün seni pwükilin irä meinisin. Eman aramas a angei ei sokun föün pwükil o fotukätiu le pwül.
32Mürin ekis chök fansoun a märitä o wiliti efoch irä mi watte seni irä meinisin lon an tanipi. A wor palan mi watte, pwe ekewe machang ra ässito wor o föri faser won ia a nür ie.”
33Iwe, Jesus a afalafala ewe kapasen Kot ngeni ekewe aramas o eäni chomong sokun pworausen awewe usun ekei. A pworaus ngeniir lon ükükün met ra tongeni weweiti.
34Esap tongeni pworaus ngeniir won och are esap eäni pworausen awewe. Nge lupwen a emanüla ren nöün kewe chon kaiö, a awewe ngeniir wewen ekewe pworaus.
35Iwe, lekuniolun ewe chök rän Jesus a üreni nöün kewe chon kaiö, “Ousipwe feila epek ewe noom.”
36Iwe, ra feila seni ewe mwichen aramas mi chomong o tötä won efoch wa, Jesus a fen nom won. Iwe, ra uweela Jesus won ewe wa, a pwal wor ekoch wa ra fitiirela.
37Iwe, a müttir fis pwe eu asepwäl mi pöchökül a enito o ekewe no ra nulong lon waar we, pwe a arap ngeni an epwe kokola.
38Jesus a nom mürin ewe wa, a möür o ülüta won eu pilu. Iwe, ekewe chon kaiö ra föngünätä o aisini, “Sense, kosap lolilenäsini ach sipwe le feiengau?”
39Iwe, Jesus a ütä o kapas ngeni ewe asepwäl, “Kopwe manasösötiu!” A pwal üreni ekewe no, “Oupwe lüala.” Iwe, ewe asepwäl a söötiu, a pwal fokun lüala won matau.
40Mürin Jesus a üreni nöün kewe chon kaiö, “Pwota oua niuokus? Ifa usun, ousap lüküei?”
41Iwe, ra fokun niuokus o kapasfengen lefiler, “Iö chök ätei pwe asepwäl me no ra mwo nge aleasochisi?”
