San Marcos 4:23-33

²³Maquex cheyabe huneꞌ tiꞌ, akꞌwe heyanma hetxumniloj, ẍi Comam.

²⁴Yalnipaxo Comam: —Cam cheyabe tzet chiwaltiꞌan yuto hacaꞌ heyanico yin̈ heyanma heyabeni, hac tuꞌ chu yakꞌni Comam Dios hetxumuꞌ, caw xin ecꞌbalto chu yakꞌni Comam hetxumuꞌ.

²⁵Yuto haꞌ mac chakꞌ yanma istxumni, chakꞌpaxo Comam yakꞌbil tet, yajaꞌ wal mac mach chicam iscꞌul istxumni, haꞌ nichꞌan etza chitxumchalo yu chiilaxilo tet, ẍi Comam.

²⁶Yalnipaxo Comam Jesús: —Anma chioc yul iskꞌab Comam Dios, lahan hacaꞌ hunu naj chitxihnayo ixim trigo sat txꞌo txꞌotxꞌ.

²⁷Waxan̈ca chiway naj akꞌbalil cat yahwano naj tzꞌayical, yajaꞌ ixim hin̈at tuꞌ chul iscꞌul ixim cat ischꞌib ixim; mach yohtajo naj yin̈ tzet chu ischꞌib ixim.

²⁸Yul txꞌotxꞌ chiswatxꞌe isba ixim; haꞌ yin̈ babelal chiahilo ixim, haxa yin̈ tzujanilxa xin cat ispoh ixim, lahwi tuꞌ cat yoc yul ixim.

²⁹Haxa yet chikꞌanbilo ixim, cat yul naj iscꞌupnocan̈ ixim yuto istiempohalxa yah ixim, ẍi Comam.

³⁰Yalnipaxo Comam Jesús: —¿Tzettaxca chiyu ischꞌib isbisil anma chioc yul iskꞌab Comam Dios chute hetxumni?

³¹Wal xin lahan hacaꞌ nichꞌan yin̈atil teꞌ mostaza chitzꞌunlaxi. Teꞌ hin̈at mostaza tuꞌ, haꞌ teꞌ caw nichꞌanchꞌan xol sunilej teꞌ hin̈at,

³²yajaꞌ yet chitzꞌunlax teꞌ xin cat ischꞌibcan̈ teꞌ, haꞌ xin teꞌ ecꞌbal nimajal chu sata sunilej teꞌ itah. Caw nimej chu iskꞌab teꞌ yuxin chiapni noꞌ chꞌic iswatxꞌe yatut xol iskꞌab teꞌ, ẍi Comam.

³³Hac tuꞌ yu iscuyni Comam Jesús anma yin̈ Istzotiꞌ Comam Dios yet yanico Comam huntekꞌan yechel tet anma. Caw txꞌiꞌal yechel yaco Comam, hataticꞌa hanta chikꞌoji anma istxumni.