Markus 3

1

2

3

4

5

6

7

8

9

10

11

12

13

14

15

16

¹Mürin Jesus a liwinsefäliti ewe imwen felikis. Ikenan a wor eman mwän mi mä efoch pöün.

²Iwe, ekoch aramas ra pwal nom ikenan, pun ra kütta och popun mine repwe aturu Jesus won. Iei mine ra mamasa Jesus are epwe apöchöküla ewe mwän lon ewe ränin sapat.

³Iwe, Jesus a üreni ewe mwän mi mä efoch pöün, “Kopwe feito ikei mwen ekewe aramas.”

⁴Mürin a aisini ekewe aramas, “Met allükün ach we lamalam a mwüt ngenikich sipwe tongeni föri lon ewe ränin sapat? Sipwe föri mine a öch ngeni aramas, are sipwe föri mine a ngau? Sipwe amanaueer, are sipwe amälaar?” Nge ir ra chök fanafanala.

⁵Jesus a nenengeniir fän an song, nge a pwal letipeta, pun ra üleförea lon letiper. Mürin a üreni ewe mwän, “Kopwe aitiewu poumw.” Iwe, a aitiewu pöün, iwe, a pöchökülsefäl.

⁶Mürin ekewe Farisi ra towu o müttir popuetä le pwüngüpwüngfengen me ekoch chiechien Herotes usun ar repwe rawangauei Jesus.

⁷Iwe, Jesus me nöün kewe chon kaiö ra feila ngeni ewe nomun Kalilea, nge eu mwichen aramas mi chomong ra tapwela mürin. Ra feito seni Kalilea me Jutea,

⁸pwal seni Jerusalem me Itumea, seni ewe fanü ötiuen ewe chanpupu Jortan me ekewe fanü arun ekewe telinimw Tirus me Siton. Ekei aramas meinisin ra feito ren Jesus, pun ra rongorong meinisin mine Jesus a föri.

⁹Pokiten ewe mwichen aramas mi chomong, Jesus a üreni nöün kewe chon kaiö pwe repwe amolätä efoch wa fän itan, pwe ekewe aramas resap achachach ngeni.

¹⁰Pun Jesus a fen apöchöküla chomong aramas, iei mine chokewe mi samau ra chök etietifengen pwe repwe tongeni atapa Jesus.

¹¹Iteiten fansoun lupwen ekewe aramas mi wor ngününgau wor ra küna Jesus, ra chapetiu mwan o kökkö fän leüömong, “En Nöün Kot!”

¹²Nge Jesus a allük ngeniir, pwe resap pwäri ngeni eman usun i.

¹³Iwe, Jesus a feita won eu chuk o a kökkörato ätekewe i a mochen pwe repwe feito ren. Iwe, ra feito ren.

¹⁴Iwe, a filätä engol me ruoman pwe repwe eti, ir ätekewe a pwal aita ngeniir chon künö, pun i epwe tiniirela pwe repwe afalafal,

¹⁵epwe pwal wor ar manaman, pwe repwe asüela ekewe anün rochopwak.

¹⁶Ikkei iten ekewe engol me ruoman a filiiretä: Simon, ätewe Jesus a aita ngeni Petrus,

¹⁷James me Johannes pwiin we, ir nöün Sepeti, Jesus a aita ngeniir “Poanerkes” a wewe ngeni “Nöün Chopulap”,

¹⁸Andru, Filip, Partolomeus, Mateus, Tomas, James nöün Alfäus, Tatäus, Simon seni Kana,

¹⁹pwal Jutas Iskariot, ätewe mi afangamä Jesus.

²⁰Mürin Jesus a liwiniti imwan. Iwe, eu mwichen aramas mi chomong a pwal mwicheto ren, iei mine esap wor än Jesus me nöün kewe chon kaiö fansoun ar repwe mongö.

²¹Iwe, lupwen aramasan kewe ra rong usun, ra feila pwe repwe turufi, pun ra apasa, “A umwes.”

²²Iwe, ekoch Sensen Allük mi feito seni Jerusalem ra apasa, “Ewe anü Pelsepul a wäni. I ewe samolun anün rochopwak a ngeni enan mwän an manaman, pwe epwe asüela ekewe anün rochopwak.”

²³Iei mine Jesus a körato ekewe aramas o a kapas ngeniir lon pworausen awewe, “Ifa usun, Satan epwe tongeni asüela Satan?

²⁴Are eu mwü a kinikinfesen o fiufengen, ei mwü epwe chök tala.

²⁵Are eu famili a kinikinfesen o fiufengen, ei famili esap nonomola.

²⁶Iei usun are mwün Satan a kinikinfesen, esap tongeni nonomola, nge epwe tala o wesila.

²⁷Esap wor eman a tongeni töpöchökülelong lon imwen eman mwän mi pöchökül o angei pisekin, are esap akom föti ewe mwän mi pöchökül. Mürin epwapw tongeni angei pisekin lon imwan.

²⁸Enlet, üpwe ürenikemi, pwe än aramas tipis meinisin repwe musala, pwal ar kewe kapasen turunufas ra apasa,

²⁹nge are eman a eäni kapasen turunufas usun Ngünmifel, esap fokun tongeni musala, pun a föri och tipis esap wor komusalan lon fansoun esemüch.”

³⁰Jesus a apasa ei ititin kapas, pun ekoch aramas ra apasa, “Eman ngününgau a nom won.”

³¹Mürin inen Jesus me pwiin kewe ra war. Ra ütä lükün ewe imw o ra tinala pworaus ren, pwe epwe feito rer.

³²Iwe, chomong aramas ra mot ünükün Jesus o ra üreni, “Nengeni, inom we me pwiüm kewe me fefinom kewe ra nom lükün, ra mochen churuk.”

³³Jesus a pölüeniir, “Iö inei me iö kana pwii?”

³⁴Iwe, Jesus a nenengeni ekewe aramas mi mot ünükün o apasa, “Nengeni, ikkei ir inei me pwii kana.

³⁵Pun iö kana ra föri letipen Kot, ir pwii me fefinei me inei.”