1Iwe, lupwen ar fetal ngeni Jerusalem o ra arap ngeni Petfake me Petania, ra tori ewe chukun Olif. Iwe, Jesus a tinala ruoman nöün kewe chon kaiö, pwe repwe akomwola mwer.
2A üreniir, “Oupwe feila lon ewe sopw mi nom mwemi. Nge lupwen oua tori, oupwe küna eman nienifön aas esap mwo wor eman a wawa. Oupwe apichi o emwenato.
3Nge are eman epwe ürenikemi, ‘Pwota oua föri ei sokun?’ oupwe üreni, ‘Äm samol a mochen wawa, nge epwe müttir aliwinato ikei.’”
4Iwe, ra feila o ra küna eman nienifön aas a riri ngeni üren penkasamen eu imw, nge a ütä won al.
5Iwe, ekoch aramas mi ütä ikenan ra aisiniir, “Met oua föri? Pwota oua apichi ei nienifön aas?”
6Nge ir ra pölüeni lon ewe chök ititin kapas Jesus a aiti ngeniir. Mürin ekewe mwän ra mwütätä ngeniir.
7Iwe, ra emwenato ewe nienifön aas ren Jesus o isetä üfer kewe won. Mürin Jesus a mot won.
8Nge chomong aramas ra ameresala üfer won al, nge pwal ekoch ra pöküetiu palen irä mi muresires o enenala won al.
9Iwe, ekewe aramas mi akomwola mwan, pwal chokewe mi tapweto mürin ra kökkö, “Mwareiti Kot! Feiöchün ätewe a feito fän iten ewe Samol.
10Kot epwe afeiöchü wareton mwün semelapach Tafit. Oupwe mwareiti Kot, ämi mi nom lon ekewe leni tekia lon läng.”
11Iwe, Jesus a tori Jerusalem o tolong lon ewe imwenfel. A nenengeni ekewe mettoch meinisin mi fis lon, nge pokiten a fen lekuniolula, a feila Petania me nöün kewe engol me ruoman chon kaiö.
12Sorotän ewe rän, lupwen ra liwinsefäl seni Petania, Jesus a echik.
13Iwe, a küna me toau efoch irä fiik mi kula ren chöön. Iei mine a feil ngeni ewe irä, pwe epwe nengeni are mi wor uan won. Nge lupwen a tori ewe irä fiik, a chök küna chöön, pun esamwo tori fansoun an epwe wor uan.
14Mürin Jesus a fos ngeni ewe irä, “Esap fokun wor eman epwe mongösefäl uomw.” Iwe, nöün kewe chon kaiö ra rong ekei kapas.
15Iwe, lupwen ra tori Jerusalem, Jesus a tolong lon ewe imwenfel o a popuetä asüowu ätekewe mi kamö o amömöla. A akulätä ekewe chepel än ekewe chon akasiwili moni me ekewe lenien mot än ekewe chon amömö lisom.
16Esap mwüt ngeni eman epwe kekifetal och lon ewe imwenfel.
17Mürin a afalafala ekewe aramas o üreniir, “A mak lon ekewe Toropwe mi Pin pwe Kot a apasa, ‘Ai imwenfel epwe iteni imwen iotek fän iten chon ekewe mwü meinisin.’ Nge ämi oua awili ngeni eu lenien open chon solä.”
18Iwe, lupwen ekewe souasor mi lap me ekewe Sensen Allük ra rong ekei kapas, ra popuetä le kütta efoch alen ar repwe niela Jesus. Nge ra niuokusiti i, pokiten ewe mwichen aramas ra ingeiti an afalafal.
19Iwe, lupwen a tori lekuniol, Jesus me nöün kewe chon kaiö ra towu seni ewe telinimw.
20Lesosorun sorotän ewe rän, lupwen ar fetal won ewe al, ra küna ewe irä fiik, a pwasala meinisin tori waran.
21Iwe, Petrus a chechemeni mine a fis, iei mine a üreni Jesus, “Sense, nengeni ewe irä fiik ka anümamaua a pwasala.”
22Jesus a pölüeniir, “Oupwe lükü Kot.
23Enlet, üpwe ürenikemi, are eman epwe kapas ngeni eu chuk, ‘Kopwe mwöküt seni ei leni o turulong le matau,’ nge esap tipemwaramwar lelukan, pwe a lükü pwe mine a apasa epwe fokun pwönüetä, epwe fokun fis ngeni.
24Iei mine üpwe ürenikemi: Meinisin mine oua tüngor lon ämi iotek, oupwe lükü pwe oupwe angei, iwe, epwe torikemi.
25Iwe, lupwen oua ütä le iotek, nge oua chou ngeni eman, oupwe amusala an tipis, pwe Sememi lon läng epwe pwal amusala ämi tipis.
26Nge are ousap amusala an tipis, Sememi lon läng esap pwal amusala ämi kewe tipis.”
27Iwe, ra pwal liwinsefäliti Jerusalem. Nge lupwen Jesus a fetal lon ewe imwenfel, ekewe souasor mi lap, ekewe Sensen Allük me ekewe souakomwen re Juta ra feito ren
28o aisini, “Met om pwüüng pwe ka föri ekei mettoch? Iö a ngonuk om pwüüng?”
29Jesus a üreniir, “Ngang üpwe aisinikemi eu kapas ais. Are oupwe ngeniei pölüan, üpwe pwal ürenikemi fän meni pwüüng üa föri ekei mettoch.
30Oupwe üreniei ia Johannes a angei me ie an pwüüng pwe epwe papatais, a feito seni Kot ika seni aramas?”
31Iwe, ra popuetä kapasfengen lefiler, “Met sipwe apasa? Are sipwe üra, ‘A feito seni Kot,’ epwe aisinikich, ‘Pwota chök ousap lükü i.’
32Nge are sipwe apasa, ‘A feito seni aramas...’” (Ra niuokusiti ekewe aramas, pun meinisin ra lükü pwe Johannes wesewesen eman soufos.)
33Iei mine ra pölüeni Jesus, “Äm aisap silei.” Iwe, Jesus a üreniir, “Ika ina, pwal ngang üsap ürenikemi fän meni pwüüng üa föri ekei mettoch.”
