Marcos 4:23-33

²³Tin e ayan uchiquin uyubꞌic niwojroner era, che e Jesús.

²⁴Entonces ojron otronyajr e Jesús y che: —Ubꞌinic niwojroner lo que war iyubꞌi era. Porque tin e axin uchꞌujcu uwira niwojroner axin achojbꞌesna umen e Dios. Pero tin e axin uchꞌujcu uwira más tunor niwojroner cꞌani achojbꞌesna más nojta ubꞌan.

²⁵Ubꞌinic ixto niwojroner era, porque tunor tin e uyubꞌi ixto niwojroner y uchꞌubꞌa tama uyalma cꞌani aꞌjcꞌuna más, pero tin e uyubꞌi cora niwojroner y machi uchꞌubꞌa tama uyalma cꞌani acꞌapa aloqꞌuesna lo que ayan ani cora tuaꞌ, che e Jesús.

²⁶Entonces ojron otronyajr e Jesús y che: —Uchinam e Dios lar tacar lo que anumuy conda inteꞌ winic axin upaqꞌui ut e semilla tama uchor.

²⁷Y conda acꞌapa apacma axin tama uyotot. Y conda acbꞌare axin awayan y conda asacojpa tama otronteꞌ día aꞌchpa. Y bꞌan taca uche ajqꞌuin ajqꞌuin, y war acuxpa axin ut e semilla y war achꞌiꞌ, y motor que axin uwira tiaꞌ war achꞌiꞌ ut e semilla era, pero matucꞌa unata tamar cocha acay achꞌiꞌ.

²⁸Pero jax e rum ubꞌajner xeꞌ uche acuxpa ut e semilla y uche alocꞌoy tujor e rum este que achecta watar e cosecha. Bꞌajxan acuxpa ut e semilla, y de allí atꞌixian, y de allí acay apitaqui, y de allí ya war achecta e an.

²⁹Y conda acꞌapa achecta e an y ataqui, entonces axin e ajyum chor tuaꞌ uqꞌueche axin ucosecha porque cꞌotoyix e hora tuaꞌ axin uchꞌami tunor ucosecha era, che e Jesús.

³⁰Entonces ojron e Jesús otronyajr y che: —¿Tucꞌa erer inwareox xeꞌ aquetpa lar tacar uchinam e Dios? ¿Y tucꞌa ojroner tuaꞌ incꞌampes tuaꞌ ichecsu tiut que bꞌan uchinam e Dios?

³¹Pues uchinam e Dios lar tacar ut usemilla e mostaza lo que inteꞌ winic axin upaqꞌui tama uchor. Pues ut e semilla era jax xeꞌ más chuchu tama tunor ut e semilla lo que ayan tama or e rum.

³²Pero conda pacbꞌir y conda acꞌapa acuxpa y achꞌiꞌ, aquetpa e cꞌopot xeꞌ más nojta este que aquetpa nojta ucꞌabꞌ tuaꞌ uyubꞌi watar e mut tuaꞌ aturuan tamar tuaꞌ ajiriobꞌ tama usombrair, che e Jesús.

³³Pues entonces e Jesús cay canseyan taca meyra ojroner xeꞌ mucur cora esto tiaꞌ erer oꞌbꞌna umen e gente.