ማርቆሳ 3

1

2

3

4

5

6

7

8

9

10

11

12

13

14

15

16

¹ዬሱሲ ኣዪሁዳ ዎሳ ጎሊያ ሺሬቲካ ጌሌዳ፤ ሄዋን ኩሺ ሲሌዳ ኢቲ ቢታኒ ዴዔ።

²ኢቲ ኢቲ ኣሳይ ዬሱሳ ሞታናው ኮዪዴ፥ ኩሺ ሲሌዳ ቢታኒያ ሳምባታን ኢ ፓꬆፔ ቤዓናው ናጌ።

³ዬሱሲ ሄ ኩሺ ሲሌዳ ቢታኒያ፥ «ዴንዳ ኤቃዴ ሲንꬃው ሃ ያ» ያጌዳ።

⁴ሄዋፔ ጉዪያን ኣሳ፥ «ሳምባታን ሎዖባ ኦꬂያዌ ዎጌዬ ኢታባ ኦꬂያዌ ዎጌ? ኣሳ ሼምፑዋ ኣሺያዌ ዎጌዬ ዎꬊያዌ ዎጌ?» ያጊዴ ኦቼዳ። ሺን ኣሳይ ጮዑ ጌዳ።

⁵ዬሱሲ ሃንቄቲዴ፥ ኡንቱንታ ዩሺ ኣꬂ ፄሊዴ፥ ኡንቱንቱ ኦዲና ሲሴናዋንታ ጊዲያ ዲራው፥ ኡንቱንቶ ዳሪ ካዮቴዳ፤ ሄ ቢታኒያ፥ «ኔ ኩሺያ ፒዲ ኦꬃ» ያጌዳ፤ ቢታኒ ፒዲ ኦꬂና፥ ኣ ኩሺ ፓፂ ኣጌዳ።

⁶ፓሪሳዋቱ ኣዪሁዳ ዎሳ ጎሊያፔ ካሬ ኬሲዴ፥ ዬሱሳ ዎቲ ዎꬋኔንቶ ሄሮዲሳና ዴዒያዋንቱና ማቄቴዲኖ።

⁷ዬሱሲ ባሬና ካሊያዋንቱና ጋሊላ ኣባ ቤዳ፤ ጋሊላፔ ጮራ ኣሳይ ኣ ካሌዳ።

⁸ቃሲካ ጮራ ኣሳይ ዪሁዳፔ፥ ዬሩሳላሜፔ፥ ኤዶሚያሳፔ፥ ዮርዳኖሳ ሻፋፔ ሄፊንꬃ ባጋፔ፥ ፂሮሳ ካታማፔኔ ሲዶና ካታማፔ ዬሱሲ ኦꬄዳዋ ሲሲዴ፥ ኣኮ ዬዳ።

⁹ዬሱሲ ጮራ ኣሳይ ባሬና ሱጊ ኡንዔꬄና ማላ፥ ባሬና ካሊያዋንታ ዎንጊሪያ ባሬው ጋሚዔꬃና ማላ ኣዛዜዳ።

¹⁰ዳሮ ኣሳ ኢ ፓꬄዳ ዲራው፥ ሃርጊያ ኣሳይ ኡባይ ኣ ቦቻናው ሱጌሬቴ።

¹¹ኢታ ኣያናይ ዴዒያ ኣሳቱካ ኣ ቤዔዳ ዎዴ ኡባን ኣ ሲንꬃን ጉፋኒዴ፥ ባሬንቱ ቃላ ꬎቁ ኦꬂዴ፥ «ኔን ፆሳ ናዓ ጊዲኪ!» ያጌዲኖ።

¹²ዬሱሲ ሄ ኢታ ኣያናቱ ባሬባ ኣሳው ኦዲዴ፥ ባሬና ቆንጪያ ኬሴና ማላ፥ ኡንቱንታ ሚኒሲዴ ኣዛዜዳ።

¹³ዬሱሲ ዴሪያ ቦላ ኬሲዴ፥ ባሬ ኮዬዳ ኣሳቱዋ ባሬኮ ፄሴዳ፤ ሄዋፔ ጉዬ ኣኮ ቤዲኖ።

¹⁴ኡንቱንቱ ባሬናና ዴዓና ማላኔ ቃላ ኦዳናው ኡንቱንታ ኪታና ማላ፥ ኢታ ኣያናቱዋ ኣሳፔ ኬሳናው ኡንቱንቶ ማታይ ዴዓና ማላ፥ ታማኔ ላዑ ኣሳቱዋ ዶሬዳ።

¹⁶ኢ ዶሬዳ ታማኔ ላዓቱ ሃዋንታ፡ ጴፂሮሳ ያጊዴ ሱንꬄዳ ሲሞና፥

¹⁷ቦዓኔርጌሳ ያጊዴ ሱንꬄዳ ዛቢዲዮሳ ናና ያዪቆባኔ ያዪቆባ ኢሻ ዮሃኒሳ። «ቦዓኔርጌሳ» ጊያዌ «ዎልቃማ ኣሳቱዋ» ጊያዋ።

¹⁸ኢንዲራሳኔ ፒሊጶሳ፥ ባርታላሞሳኔ ማቶሳ፥ ቶማሳኔ ኢልፒዮሳ ናዓ ያዪቆባ፥ ታዶሳኔ ባሬ ቢታው ሴሌቲያ ሲሞና፥

¹⁹ዬሱሳ ኣꬂ ኢሜዳ ዪሁዳ ኣስቆሮታ።

²⁰ዬሱሲ ሶይ ቤዳ፤ ላዔንꬁዋካ ቃሲ ጮራ ኣሳይ ሺቂና፥ ኢኔ ኣ ካሊያዋንቱና ሃራይ ኣቶ፥ ቁማ ማናዉካ ዳንዳይቤይኪኖ፤

²¹ኣሳይ ኣ፥ «ጎዬ» ጊያ ዲራው፥ ኣ ዳባቱ ሄዋ ሲሲዴ፥ ኣ ኣካናው ቤዲኖ።

²²ሂጊያ ታማሪሲያ ኢቲ ኢቲ ኣሳቱ ዬሩሳላሜፔ ዪዴ፥ «ዬሱሳ ቦላ ቢዔል-ዜቡል ዴዔ» ያጌዲኖ፤ ቃሲ፥ «ፃላሃቱዋ ካፑ ባሬው ዎልቃ ኢሚና፥ ኢታ ኣያናቱዋ ኬሴ» ያጊዴ ሃሴዬዲኖ።

²³ዬሱሲ ኣሳ ባሬኮ ፄሲዴ፥ ሌሚሱዋ ኦዲዴ፥ «ሴፃናይ ሴፃና ዎቲ ኬሳናው ዳንዳዪ?

²⁴ኢቲ ካዉቴꬃይ ባሬ ጊዶን ሻኬቶፔ፥ ሄ ካዉቴꬃይ ኤቃናው ዳንዳዬና፤

²⁵ቃሲ ኢቲ ጎሌ ኣሳይካ ባሬ ጊዶን ሻኬቶፔ፥ ሄ ጎሌ ኣሳይካ ኤቃናው ዳንዳዬና።

²⁶ሴፃናይ ባሬናና ዋላቄቲዴ ሻኬቶፔ፥ ባያናፔ ኣቲን፥ ዴዓና ዳንዳዬና።

²⁷«ሺን ዎልቃማ ኣሳ ጎሌ ጌሊዴ ካሴቲዴ ኣ ቃቼናን ዴዒዴ፥ ኣ ሚሻ ቦንቃናው ዳንዳዪያ ኣሳይ ባዋ፤ ቃቼዳዋፔ ጉዪያን፥ ኣ ጎሊያ ቦንቃናው ዳንዳዬ።

²⁸«ታኒ ሂንቴንቶ ቱሙዋ ጋይ፤ ፆሳይ ኣሳ ናናው ናጋራ ኡባኔ ኡንቱንቱ ቦሪያ ቦሪያ ኡባ ኣቶ ጋና፤

²⁹ሺን ጌሻ ኣያና ቦላ ኢታ ቦሪያ ሃሳዪያ ኦሲኔ ሜꬊናው ናጋራ ጊዳናፔ ኣቲን፥ ፆሳይ ኡባካ ኣቶ ጌና» ያጌዳ።

³⁰ዬሱሲ ሄዋ ጌዳዌ፥ ኢቲ ኢቲ ኣሳቱ፥ «ዬሱሳ ቦላ ኢታ ኣያናይ ዴዔ» ያጌዳ ዲራሳ።

³¹ዬሱሳ ዳያኔ ኣ ኢሻቱ ዪዴ፥ ካሬን ኤቂ ኣኮ ኣሳ ኪቲዴ፥ ኣ ፄሲሴዲኖ።

³²ጮራ ኣሳይ ኣ ማታን ኡቴዲኖ፤ ሄ ኪቴቴዳዌ ኣ፥ «ቤዓ፤ ኔ ዳያኔ ኔ ኢሻቱ ካሬን ኤቂዴ፥ ኔናና ጋኬታናው ኮዪኖ» ያጌዳ።

³³ዬሱሲ ዛሪዴ፥ «ታ ዳያ ኦኔ? ቃሲ ታ ኢሻቱ ኦኔ?» ያጌዳ።

³⁴ባሬ ማታን ኡቴዳ ኣሳ ዩሺ ኣꬂ ፄሊዴ፥ «ቤዒቴ፤ ታ ዳያኔ ታ ኢሻቱ ሃዋንቱሺ።

³⁵ፆሳይ ኮዪያዋ ኦꬂያ ኡባይ ታ ኢሻ፥ ታ ሚቻቶኔ ታ ዳዮ» ያጌዳ።