Maka 3

1

2

3

4

5

6

7

8

9

10

11

12

13

14

15

16

¹Yesu see Yu odoowo howo gisili moso omapoo kulodu gapeleso egeino, odoo dee hodio kakawa poogoo badoboome egeiso.

²Pelisi odoo Yesu mapoo hegi sibileso balagamo siliso, yayo Yu odoowo tei beeame omapoo odoo dee hodio kakawa poogoo tekepo modapeleso agalame. Yesuye odoo dee hodio kakawa poogoo tekepo moodooga, diayo ogoloso Yesu mapoo takalame.

³Eseme Yesuye odoo dee hodio kakawa poogoo mapoo takaso, “No bia amaga teebee, odoo susuga oso agalame.”

⁴Eseme Yesuye Pelisi odoo mapoo woosaso, “Iyo tei beeame omapoo ogoo goo talai oso tei ka molosomo? Iyo tekepo goo talaiyo o iyo tokenee goo talaiyo, o giebadili pidileiyo, o giebadili wolomalaiyo?” Esino Pelisi odoo Yesu mapoo to nei takele.

⁵Yesu dibada sooloo ma kulodu sooloo dala goo mauwe pogoloso kalawoloso debeli ogoloso sooloo deleme kamana sabolo dimapoo egeino, odoo dee hodio kakawa poogoo ogoloso yimapoo takaso, “Nee dee hoode.” Eseme o dee hoodeme o dee tekepo paso.

⁶Eseme Pelisi odoo, Yu odoowo howo gisili moso maga peegoo dileso, Helodeeyo mooloogoodoo odoo ogoloso, diayo Yesu wolomalame to mouso.

⁷Yesu o hamamee dili odoo sabolo Gelili abei mapoo dime, odoo mooloogoodoo toowa Yesuye di hamamee diadeeso. Odoo susuga Yesuye goo moodoo dume yimapoo sibadeeso. Odoo susuga hagee mi opusomo opusomodi mi hamaga sibadee: Gelili mi toowa, Yudiya mi toowa, Yoluselem mosobia, Idumia mi toowa, Yoden howo hodio hoogoo debeli Taya mi toowa sabolo Saidon mi toowa amaga sibadeeso.

⁹Eseme Yesuye odoo paigiga abo tekepo moodoome weido diso, osoloso odoo paigiga abo oso yimapoo sigilame hegi pupugamo sibume, yayo o hamamee dili odoo mapoo takaso, “Niba du hee tosibe, bei abei palaga omapoo odoo dia mooloogoo deeyaga,” diso.

¹¹Odoo bo holo pala oso Yesu ogoga diba o homo beiyopoo gawuloso goolone egeesee takeliso, “No Godeeyo owoloso,” diso.

¹²Eseme Yesuye odoo bo holo pala omapoo to kitulugu sabolo takeliso, “Nayo odoo abo mapoo a Godeeyo owolo dee na takee,” doloso takeliso.

¹³Yesu mubi ma dokodoo peleso yayo goomoga odoo hesigaloso yayo gilimademe diba yimapoo sibadeeso.

¹⁴Yesuye 12 odoo hesigaloso dimapoo takaso, “Niba abolo sile sibileiso, osoloso niba diye dalaiso Godeeyo to takomo sile sibilame.

¹⁵Osoloso, ayo nimapoo kitulugu tenelaiso odoo bo holo pala peegoo hasisilame.”

¹⁶Yesuye gilimadoo odoo 12 dia hu hagoso: Saimon (Yesuye hu hee hedi, Pita);

¹⁷osoloso Sebediyo owolo bakadio Yemes dio omolo Yonee dio (Yesuye hu hee hedi Bouwaneges. Hu eyo bei to kei wei masi weli);

¹⁸osoloso Endulu, Pilipi, Batolome, Metiu, Tomas, Alpiesyo owolo Yemes, Tadies, Saimon Selot (Saimon Selot: selot hu eyo bei Loum Gamali gowili odoo),

¹⁹osoloso Yudas-Iskaliyot (Yesu ha teli odoo mapoo tiasili).

²⁰Eseme Yesu o odoowo moso mapoo wedi dileso badoboome, odoo susuga see dia mooloogoodooso. Eseme Yesu sabolo o hamamee dili odoo sabolo diayo nei nalai beeame egele.

²¹Eseme o soosooso goo egee duloso, yo halapomo sila pele dolone, yo dibada mosopoo ido dilame sibadeeso.

²²Esino tei eligili odoo Yoluselem maga sibadee oso egeesee takaso, “Yesu yo bo wiligi toba Bulsibapo (Saiten o hu hee) o kulodu badoso. Esiga yo bo wiligi toba eyo kitulugu maga bo holo peegoo hasisilone ka badoso.”

²³Eseme Yesuye tei eligili odoo gilimadoloso dio masi takaso, “Saiten odoo ma kulodu badebei diso nediliyo peegoo kasee hasisileiyo? Eli mauwe.

²⁴Mi toowa mapoo debeli odoo domo puloso diso nediliyo ha toga mi toowa egee malaime tokenee palaiso.

²⁵Osoloso soosoo heeso domo puloso diso nediliyo ha toga soosoo egee debelaime tokenee palaiso.

²⁶Osoloso Saiten eyo nediliyo o odoo sabolo ha toga, yayo kitulugu sagelaime, omapoo mauwe pagalaiso.”

²⁷Yesuye dio masi hee takaso, “Esiga odoo heeso, kitulugu odoo eyo mosopoo bi heli talame gooleega, yo daga kitulugu odoo tiso tiamagoloso, hamamee o moso kulodu peleso, bi heli talaiso.

²⁸Esiga ayo nimapoo tei goo hee taka, tokenee goo susuga edebeeyo teli sabolo, osoloso to tokenee Godee mapoo takeli ee Godeeye hapoloso boobado pigileiso.

²⁹Esino odoo agayo Dio Teiyo goo mapoo to tokenee takooga, yo o goo tokenee hapalaime, o goo tokenee moloso kookaiyo osee malaiso.”

³⁰Yayo goo hagee dimapoo takaso, bei diayo yo bo holo paladee dee takeme.

³¹Yesuwo owee sabolo omolo dio Yesuye eligimelee moso mapoo peledabaso. Diba Yesubolo to kalame hau mapoo tebisa molome, odoo heeso Yesu takalame moso kulodu gadiso.

³²Eseme odoo susuga Yesubolo debei odoo diayo ogoloso Yesu mapoo egeesee takaso, “Noowee sabolo no molo dio oso peegoo no esia molo.”

³³Yesuye dimapoo eligilame to nei woosaso, “Mo wee sabolo molo dio odoo ogumo?”

³⁴Eseme Yesuye odoo buluma omapoo ogogolone egeesee takaso, “Hamapoo ege, hagee mo wee sabolo molo dioso.

³⁵Odoo agayo Godeeye goomoga goo tomo siloga, diba tei molo dio osoloso mo wee dioso.”