Marcos 3

1

2

3

4

5

6

7

8

9

10

11

12

13

14

15

16

¹Tegin te ibagwengin, Jesús Judio-ormaked-negzhe tognoni. Tenal teun tule-walgwen-chunkal-tinkualed chimo.

²Tegin tule-istar-Jesús-takmalad pukwamalmo. Tenal tulemal-istar-Jesús-takmalad igal-aminanimalan Jesúsgin chogmalgal Jesús noal-kudii. Al we tulemal Jesús-takpukmal, pule Jesúsde ulukued-ibegin tule-nudako-dewa o chul-dewa.

³Tenal Jesús tule-chunkal-tinkualedzhe kote chogal: —Kwisgu, tag neg-abaladzhe. Tegin tule-chunkal-tinkualed neg-abaladzhe kwisgunonigu,

⁴Jesús tulemalzhe ekichial: —Imi antin peido, pemal anka chog. ¿Imi ulukued-ibegin, ib-nued immal-nued imagal o immal-iskana imagal? ¿Tule-nudakoed o meke tule-purkoed? Anka chogdo. Tenal tule-itobukmalad Jesús kwen abinchuszhulmal, ilgwen yakir pesmal.

⁵Tegin Jesús ulubgin sae-itogedgin tule-amigwisgual. Tegin Jesús ulubgin pukib-itononibal tulemal tule-yeed-kwen-pilalzhulmal. Tenal Jesús tule-yeedga chogal: —¡Chunkal akto! Tegin tule chunkal aktodgu, ilgwen nugus.

⁶Tenal Pariseomal ormaked-neg-akar aknismalgu, ilgwen Herode-e-chapinganzhe nadmal, tegin Herode-e-chapinganbak aga igal-amialmal, emalde igi nabir Jesús-mesmalo-dewa.

⁷Tegin Jesús aga e-chapinganbak mata-kakpal wakidmal. Tenal tulemal-Galileaginmalad-ichejul Jesús-cholbal nadmalmo.

⁸Tenal tulemal itosmalgu Jesús Galilea-mata-kakpal immal-taktijulid-imadii, Judea-tolgan, Jerusalénginmalad, Idumea-tolgan, Jordán-tiwalbalmalad, Tirozhikmalad, tegin Sidónzhikmalad, pél Jesúszhe nonimalmo.

⁹Imi teun takalgu, Jesús ichejul tulemal-nudadii-choggu, al tule-yemalad-ichejul Jesúszhe nonimal. Tenal teun tule-yemalad aga palmananimal Jesúszhe achemalgal, Jesús e-nudagal. Al Jesús iktual aga e-chapinganga chogzha: —Anka pe iktual kuakwa ul nazhiko, tulemal pela-pela arpak ankin yolegalmalal, an ulgin nakwegal.

¹¹Tenal niamal-tulegin-mamimalad Jesús-takalil, pinnajul kolmakaldamal, tegin Jesúsga chimtialdamal, tegin Jesúsga chogaldamalbal: —Imi pedin, pe Pab-Tummad-Machi-chunnad.

¹²Tenal Jesús niamal-tulegin-mamimaladga chogalda: —Pe melle tulemal-wagin an-nug chogo, antin toa-tule.

¹³Tegin te ibagwengin Jesús yalzhe nad. Tegin Jesús yal omosgu, tule-chulesmaladzhebi kocha eje taggal. Tegin tulemal Jesúszhe nonimalzhun.

¹⁴Tenal Jesús walambe-kakabog tule-chus ebak nanegal, tegin tar-palmigal Pab-Tummad-kakapurwa palchoggal.

¹⁵Tenal Jesús we tulemalga igal-ukchabal tulegin-niamal-mamimalad-onigal. (Tenal tule-walambe-kakabogwad Jesús tar-nugzhasmal, Jesús-nuggin-palmilegalmalad.)

¹⁶Tenal tule-walambe-kakabogwad nug-nemal: Simón, (tenal Jesús tar-nugzhabal Pedro;)

¹⁷tegin Zebedeo-machi-Jacobo, tegin e-urpa-Juan. Tenal we machimal-walbogiddin Jesús tar-nugzhasbal, Boanerges. Boanergesdin chogle, iche-unni-urwed-tule.

¹⁸Tegin Andrés, Felipe, Bartolomé, Mateo, Tomás, tegin Alfeo-machi-Jacobo, tegin Tadeo, tegin Romano-tule-onobied-Simón,

¹⁹tegin Judas-Iscariote. Tenal we Judas-Iscariotedin manibal-Jesúsgin-akpitchad.

²⁰Tegin Jesús aga e-chapinganbak negzhe tognonimalgu, tulemal-ichejul ampagunonimalmo. Al Jesús aga e-chapinganbak tule-pentanaidbal mas-kunkal igal pel kwen nikchul-kusmal.

²¹Tenal Jesús-e-kwenamalad wisgusmalgu, Jesús mas-kunkal igal-pel-nikchul, aga emal-emal chogalmal: —Imi antin, an itodo, Jesús wis koeles. Al anmal Jesús-chuneenabmal melle tulemalgin yolegal. Tegin Jesús-e-kwenamalad almalzhun, Jesús-amigal.

²²Tenal Moisés-igalgin-tulemal-oturdamalad Jerusalén-akar Jesús-maidzhe nonimalgu, chogalmal: —Imi we Jesús nia-Beelzebú-nika. Al Jesús nia-sagla-nuggin tule-akar nia-oni.

²³Tegin Jesús itosgu tulemal egin chunmananimal, Jesús tulemal-egin-chunmananimaladzhe kocha. Tegin Jesús tulemalga chogal: —Imi pemal noal chunmananimalma. ¿Nia-saglade igi aga e-chapingan-onineé? Chulá. Tegin Jesús purpal Judio-tummagan-nonimaladga chogalzhun:

²⁴“¿Imi meke-ibi-napa abal marral-chiil, we napa igi kunoniko pe ebinzhe? Neg pél iskunoniko.

²⁵“Teginbal, ¿imi tule neg-yagin aga emal-emal imakalmalal, neg igi kunoniko pe ebinzhe? Tulemal aga pél onidmalo.

²⁶“Imi nia-sagla-Satanás aga e-chapingan-onidel aga abal istar kunonimalo. Tenal nia-sagla aga e-chapingan-onielen, Satanás-neg-takmaid kwen unniguojulin ukin neg-takegal, e-neg-takmaid iskudoen.”

²⁷Tegin Jesús purpal chogalbal: “Imi tule-kal-ibed neggin mail, ¿pe yogasal e-neggin togo, pe ebinzhe immal aturzhegal? Chulá, keg kue. Tenal pe tule-kal-ibed-edineenabgwel, kep pe nabir we tulebi immal aturzhao. Al an-niagin-nakwijadbal an unni tulegin nia-onigal.”

²⁸Tegin Jesús chogalbal: “Imi an chunchunnad pemalga chogdo: imi Pab Tummad tulega pel-kwapa-iskued nabir eli, tegin tule-atajulidgin Pab-Tummadgin-chunmaked ampa nabir elilebal.

²⁹“Tenal tule atajulidgin Pab Purpa Nuedgin chunmakel, Pab Tummad tulega we iskued kwen pal eliojul-kuo, ilgwen-nadgu peio.”

³⁰¿Ibiga Jesús Pab-Purpa-Nuedgin-walmakedgin weob chogzha pe ebinzhe? Nabir. Imi tulemal-Jerusalén-akar-nonimalad Jesúsgin chogzhamal: “Jesúsde nia-nika.” Al Jesús weob chogzhagusdo.

³¹Imi teun Jesús Pab-igalgin tulemal-oturdanaidgin, tulemal-íchejul Jesús-nabal pukwamalmo. Tenal teun Jesús-e-nan, tegin e-urpamal Jesús-taknonimal. Tenal Jesús-e-kwenamalad magarbal pukwa-pesmal.

³²Tegin Jesús-e-kwenamalad tulemalbal Jesúszhe kaka palmis emalde magarbal Jesús-abintabukmal. Tegin tulemal Jesúsga chognatapmal: —Pe-nan tegin pe-urpamal magarbal pe-abintabukmal.

³³Tegin Jesús tulemalga chogal: —¿Teobí? ¿Toa-ade an-nan, an-urpamal-chunchunnad?

³⁴Tegin Jesús tulemal-e-waglik-tunnul-pukmaladga chogalbal: —Imi we tulemal-pukmaladdin an-nan tegin an-urpamaldo.

³⁵Tenal meke-ibi-tule an-Pab-nikpa-maid-choged-pallí immal imakel, we tulemal chunchunnad an-nan, an-urpamal, tegin an-punmal. Pitomalgu.