Mark 3

1

2

3

4

5

6

7

8

9

10

11

12

13

14

15

16

¹Jesus pwuroahng dilda nehn jinakokehu, wijahu ma woal mwoasor poah men pwili minmine.

²Armaj pwi ma pwili mine wijahu nimen kadipoahki Jesus mehkij japwung, irai kin mwajmwajahnnoar Jesus ma ih pirin kasihkeida min mwoasor poahu Sabbath.

³Jesus ken pwehng min mwoasor poahu. “Sohdahdo uhda mijen pokonne.”

⁴Ih ken idoak iparai pwa, “Da kojonneddo mweidoahng kisai en wia Sabbath? Kisai en wia mehkij ma mwehu ke nauna? Kisai en jeuweje mourin armaj ke koauwehla?” Irai nennenla johpwa wia mehkij.

⁵Jesus ken lioasla kapkapang irai, ih ken injinjuwedkihla irai koapsakai apel lamlam japwung. Ih ken lallahng woal mwoasor poahu, “Kailwe poahmmwen.” Min mwoasorro kaillahr poahu, poahu ken mwehula dauluhl.

⁶Pharisee‑ok ken diljang nehn jinakokehu pokonpene ipen epwi ma kin nihn Herod pwihnno; irai ken planehda pwa irai en kojukdi Jesus.

⁷Jesus apel nah sohnpadahkkok inla in poahrinjed in Lehn Galilee, a pokon laplap oau kahujla ih. Armajjok indoa jang Galilee, jang Judea,

⁸jang Jerusalem, jang Idumea, jang oaloap Jordan, apel jang kahnihmw in Tyre apel Sidon. Armaj pwiai pokonpene ipen Jesus pwa ihr rongda joang kapwuriamwei kan ma ih kin wihwia.

⁹Ih pwehng nah sohnpadahkkok irai en koaunopda oau pohs siksikko, ma ih en doauda puwoa, pwa pokonno en joah jakahpajihla ih.

¹⁰Pwa ih kin kemwehuwihla armaj johmwehu dir, ioar mehwa irai kin jakahpajihla ih nehn irai kin nimen pukkoang ih.

¹¹Pel armaj ma ngen jaus dilingla irai, nehn irai kin kapangda ih irai kin kipdi mwohn ih, rahrahu, pwahpwahpwa, “Koawoa ioar Nihn Koahs wa!”

¹²A Jesus ken iroahdi ngen jaussok en johpwa pwa inje ih.

¹³Jesus indahla pohn dol oau; ih ken pangin araihok ma ih kin ipwilki en indoa ipoa.

¹⁴Ih ken pilda min eijek roahmen ma ih panginki woaroak, ih pwa, “Ngoahi pilda kamwai pwa kamwai en kin pwilpwili ngoahi. Ngoahi pirin pel kadarwe kamwai pwa kamwai en lohkihjili Rongmwehu;

¹⁵kamwai pirin pel anki manman in kahujjang ngen jaus kan ipen armaj.”

¹⁶Doari, ioar oadoan min eijek roahmennok ma pilpilda: Simon (Jesus kioang oadoa Peter;)

¹⁷James apel John, nihn Zebedee (Jesus kioang oadoara, Boanerges, woahwoahn mour in addoauwe nihn palar ke mwosmwos jongpoa.)

¹⁸Andrew, Philip, Bartholomew, Matthew, Thomas, James nihn Alphaeus, Thaddaeus, apel Simon sohn pwihnin Zealot,

¹⁹apel Judas Iscariot, woallo ma pangla Jesus.

²⁰Jesus injang wijahu inlahng in umwahu. A pokon laplap oau pel pokonpene wijahu, ma kahrehda ih apel nah sohnpadahkkok johla kak mwinge ki johla anjoau.

²¹Nehn epwi ah peneineihok rongda me irai inla ipoa pwa irai en oaloa apwali ih; pwa armaj kan pwahpwahpwa pwa ih ne japwungla nehn moange.

²²Epwi johnpadahk in Kojonneddok ma indihdo jang Jerusalem siksikoa pwa Beelzebul ne dilingla ih. Epwi pwa koaunin ngen jaus kan ma kioang Jesus manman in kajroahjang ngen jaus ipen armaj.

²³Ih panginpene armajjok pwehng irai karajraj pwi: “Imdoahr Jehsen ah kak kajroahla Jehsen?

²⁴Ma wei oau pirin pwalpijoang wiahda pwihn pwi ma pirin uhpene nehn pwungarai, weiho johkak pwoaida, pwa ih pirin mwoarpijoang.

²⁵Ma peneinei oau pirin pwalpijoang wiahda pwin pwi ma pirin uhpene nehn pwungarai, peneineiho johkak pwoaida pwa ih pirin mwoarpijoang.

²⁶Doari ma wein Jehsen pirin pwalpijoang wiahda pwihn pwi ma pirin uhpene nehn pwungarai, ih johkak woaroai, pwa ih pirin mwoarpijoang apel johla.

²⁷“Joh emen kak koauwehla umwen woal sihkei men pwa en pirapoa ah koapwoa kan ma ih johpwa koldi piroahpene woal sihkeiho. Ioar wioapoawahr doari ih kak pirapoa ah koapwoa kan.

²⁸“Ngoahi pwehng kamwai in mehlel pwa armaj kan kak oaloa mahkpen diparai kan ohroj, pel dipen lahlahwe.

²⁹A emen ma pirin lahlahwe Ngen Joarwi, johpwa kak oaloa mahk in dihp oauwe, pwa ih ne wiahda dihp oau ma johpwa kak lapwda.”

³⁰(Jesus pwa me pwa epwi ihr pwahpwahpwa pwa ngen jaus ne dilingla ih.)

³¹Inen Jesus apel riahk leldo. Irai mine likin ummwo nimen lalloang ih.

³²Pokonno ma mwindi kapilpene ih pwehng, “Koawoa kidal pwa inoammwo apel rioammwok minmine likinno, irai nimen suhwoang koawoa.”

³³A Jesus japoang irai, pwa, “Inje inoai, apel inje rioai kan?”

³⁴Ih pel kapkapangjili pohn irai ma minmine ipoa, doahr ih ken pwa, “Ioar inoai apel rioaikoa me.

³⁵Emen ma kin kapwaiahda injenen Koahs, ioar arai rioai apel inoai.”