Marku 3

1

2

3

4

5

6

7

8

9

10

11

12

13

14

15

16

¹Te phoeiah tunim la koep a kun hatah, kut a koh aka om hlang pakhat tapkhoeh om.

²Te vaengah anih te Sabbath ah a hoeih sak atah paelnaeh hamla Jesuh te a dawn uh.

³Te vaengah Jesuh loh kut a koh la aka om hlang te, “A laklung ah pai lah,” a ti nah.

⁴Te phoeiah amih te, “Sabbath ah hno then saii ham pawt atah thae ham, hinglu hlawt ham pawt atah ngawn ham a ngaih?” a ti nah. Tedae amih loh a hil a phah uh.

⁵Te dongah amih te thintoek neh a sawt. Amih thinko kah thinthahnah soah a kothae. Tekah hlang te, “Na kut te yueng lah,” a ti nah. A yueng tangloeng tih a kut khaw hoeih.

⁶Tedae Pharisee rhoek tah Herod kah hlang rhoek taengla tlek cet uh tih Jesuh poci ham dawtletnah a khueh thil uh.

⁷Jesuh tah a hnukbang rhoek neh tuili la a caeh uh hatah Galilee rhaengpuei loh muep a vai uh.

⁸Te vaengah Judea lamkah, Jerusalem kah, Idumea kah, Jordan rhalvangan, Tyre taengvai neh Sidon lamkah rhaengpuei boeih neh a bisaii boeih te aka ya rhoek loh a taeng la ha pawk uh.

⁹Tedae a hnukbang rhoek te, “Amah ham lawng mah khuituk, hlangping te a khuiah thet pawt nim,” a ti nah.

¹⁰Te vaengah hlang muep a hoeih sak dongah tloh aka khueh boeih loh Jesuh te taek sak ham amah te a nan uh.

¹¹Rhalawt mueihla loh anih a hmuh uh vaengah a bakop thil uh tih a pang doela, “Nang tah Pathen Capa ni,” a ti uh.

¹²Tedae amah te kawng te mingpha la ng'khue pawt ham amih te khak a uen.

¹³Te phoeiah Jesuh tlang la luei hang tih a ngaih rhoek te a khue dongah a taengla cet uh.

¹⁴Te vaengah hlainit a tuek tih amih te caeltueih la a khue bal. Te daengah ni amah taengah om uh vetih olthangthen aka hoe la,

¹⁵saithainah aka khueh la, rhaithae aka haek la amih te a tueih pai eh.

¹⁶Te vaengkah Simon la ming aka paek Peter,

¹⁷Zebedee kah capa James neh James kah manuca Johan amih rhoi te Boanerges ming a paek. Te tah rhaek capa rhoi ni.

¹⁸Andrew, Philip, Bartholomew, Matthai, Thomas, Alphaeus capa James, Taddaeus, neh Kanaan Simon,

¹⁹amah aka voei Judah Iskariot tila hlainit te a tuek.

²⁰Te phoeiah im khuila a caeh hatah hlangping loh koep a tingtun pah. Te dongah amamih khaw coeng thai pawt tih buh ca uh pawh.

²¹A taengkah rhoek loh a yaak uh vaengah, “limlum coeng,” a ti uh tih amah te tuuk hamla cet uh.

²²Te vaengah cadaek rhoek tah Jerusalem lamloh suntla u tih, “Beezebul a khueh dongah ni rhaithae boei rhangneh rhaithae te a haek,” a ti uh.

²³Tedae amih te a khue tih nuettahnah neh amih taengah, “Satan loh Satan te a haek ham coeng thai aya te?

²⁴Ram pakhat tah amah te a paekboe coeng atah tekah ram te a pai thai moenih.

²⁵Te phoeiah im khaw amah a paekboe koinih tekah im te pai thai mahpawh.

²⁶Satan loh amah te pai thil tih paekboe koinih pai thai pawt vetih a palthamnah la om ni tah.

²⁷Tedae Hlang tlung te lamhma la a pin pawt atah hlang tlung kah im ah hnopai te muk ham a kun thai loeng loeng moenih. A pin phoei daengah ni a im te a muk pa eh.

²⁸Nangmih taengah rhep kan thui, tholhsainah neh soehsalnah neh aka soehsal uh hlang ca rhoek te tah boeih a hlah ni.

²⁹Tedae Mueihla Cim taengah aka soehsal te tah kumhal duela khodawkngainah om mahpawh,” a ti nah.

³⁰Tedae, “Rhalawt mueihla a kaem,” a ti uh dongah dungyan tholhsainah om kuekluek coeng.

³¹Te vaengah a manu neh a mana rhoek te ha pawk uh. Tedae poengben pai uh tih Jesuh aka khue ham te a tueih uh.

³²Te dongah a taengkah kah aka ngol hlangping loh, “Na nu, na mana rhoek neh na ngannu rhoek loh poeng nang n'toem uh ke,” a ti nah.

³³Tedae amih te a doo tih, “Kai manu neh kai manuca rhoek te unim? manuca rhoek la aka om?” a ti nah.

³⁴Te phoeiah a taengvai ah aka ngol rhoek te a sawt tih, “Ka manu neh ka manuca rhoek la he,

³⁵Pathen kah kongaih aka saii rhoek te tah ka manuca, ka ngannu neh ka manu la om,” a ti nah.