Maliku 3

1

2

3

4

5

6

7

8

9

10

11

12

13

14

15

16

¹Jezu adapita pomwe mnyumba yamapemphero. Momwemo mukhana munthu winango wakupunduka boko.

²Wanthu winango akhanyangana thangwe ra kupasira mulandu Jezuyo, na tenepo akhanyang'anisa kuti aone angamulimbise munthuyo pa ntsiku ya kupuma.

³Jezu adawuza munthu wakupundaka boko ule kuti, “Ima, bwera kutsogolo kuno.”

⁴Ndipo adabvundza wanthu wale kuti, “Kodi pa ntsiku ya malikhuma cin'bvumizidwa n'ciponi? Kucita bzabwino, ayai kucita bzakuipa? Kupulumusa moyo wa munthu, ayai kuudzonga?” Wanthuwo adakhala zii.

⁵Jezu pakuo kuti wakhada wuma ndzelu mtima wace udamuwawa, pakuwona kuti akhali wanthu wamakani tenepo, ndipo adawayang'ana na ukali. Ndipo adamuwuza munthuyo kuti, “Thamula boko lako.” Iye adalithamula, ndipo boko lacero lidakhalambo bwino.

⁶Pamwepo Afaliseyeu wale adacoka adakagumanizana na wanthu wa phati ra Herodi, kuti apangane njira yakuphera Jezu.

⁷Jezu pabodzi na wakupfundzira wace adacoka pompale acienda kugombe la Galileya. Mthithi ukulu wa wanthu udamutewera.

⁸Wanthu wale akhali wa ku Galileya, winango wa ku Judeya na ku Jerusalemu, winango wa ku Idumeya, na wang'ambo wa kumkulo wa Jorodau, ndipombo kucipande ca ku Tiru na Sidoni. Wentsenewo adafika kwa Iye, thangwe wakhabva bzizinji bzomwe Iye akhacita.

⁹Jezu adauza wakupfundzira wace kuti amuikire mwadiya pafupi,akha gopesa kuti wanthu angayambe kum'psinyiza, thangwe ukhali mthithi ukulu

¹⁰Na kuona kuti akhaciza wanthu azinji, ndipopo wentse omwe akhana matenda akhambagwinyana-gwinyana pakufuna kuti am'khuye.

¹¹Pomwe mizimu yakuipa ikamuwona ikhabzigwesa pantsi kutsogolo kwa Iye icimbakuwa kuti, “Imwe ndimwe Mwana wa Mulungu.”

¹²tsono Iye akhambailetsa mwa mphambvu kuti ileke kumuzimbula.

¹³Jezu adakwira ku phiri, ndipo adacemera wanthu omwe Iye akhawafuna, iwo adayenda komwe kukhana Iye.

¹⁴Pamwepo adasankhula kumi na awiri, aciwacemera dzina la kuti, “Atumiki.” Adawauza kuti, “ndasakhula imwe kuti mumbakhale na ine, ndin'dzakutumani kukalalika,

¹⁵dicikupasani mphambvu yakuthotha mizimu yakuipa.”

¹⁶Wanthu kumi na awiri omwe adasankhuliwa mbawa: Sirimau (omwe Jezu adamucemera Pedru),

¹⁷Tiyagu na m'bale wace Juwau, wana wa Zebedeu (omwewo adawapasa dzina linango lakuti Aboanerje, bziri kulewa kuti “Wakugopswa ninga Wana wa Ciphaliwali”)87,

¹⁸Andereya, Filipe, Bartolomeyu, Mateyu, Tomasi, Tiyagu (mwana wa Alifeu), Tadeyu, Sirimau (wa phati landale la Azelote,)

¹⁹ndipombo Judasi Iskaliote (omwe adapereka Jezu.)

²⁰Pambuyo pace Jezu adaenda kunyumba, ndipo wanthu azinji adagumana pomwe, na tenepo Iye na wakupfundzira wace alibe kudzaone nthawe ya kuti adye.

²¹Abale wace na kubva bzimwebzi, adabwera kuti adzamutenge, thangwe iwo akhati, “Ali kucita nsala.”

²²Amisiri winango wa Mtemo, omwe adabwera kucokera ku Jerusalemu, akhalewa kuti, “Munthu omweyu waphatidwa na Belezebu*.”Akhalewa pomwe, “Mphambvu zomwe umweyu ambacosera mizimu yakuipa nzakucokera kwa mkulu wa mizimuyo.”

²³Na tenepo Jezu adacemera wanthu kuti abwere pafupi, aciwauza na mifanilizo kuti, “Nandi Satana angabzithothe yekha?

²⁴Wanthu wa mu umambo uli-wentse angayamba kusandukirana, umambo umwewo bunipitiriza lini .

²⁵Ndipo pomwe wanthu wa mbanja libodzi angayamba kugawika, banja limwero limpitiriza lini.

²⁶Na tenepo penu mu umambo wa Satana ngwakusandukirana na kupambulana, na tenepoyo bwamala.

²⁷“palibe omwe angakwanise kupita mnyumba ya munthu wamphambvu acimubera bzinthu bzace akanati kum'manga. na tenepo ambatoma kum'manga acimubera bwino.

²⁸“Ncadidi ndiri kulewa kuti wanthu angakwanise kulekereredwa bzakuipa bzentse, napo bzakulewa bzawo bzentse bzicikhala bzakunyoza Mulungu.

²⁹Tsono ali-yentse wakunyoza Mzimu Wakucena, an'dzalekereredwa lini bzakuipa bzace bzimbakhala bza kuyenda na kuyenda thagwe ni kaidi wa bzakuipa bzakusaya kumala .”

³⁰Jezu adalewa bzimwebzi pakuwona kuti wanthu wale akhalewa kuti, “Waphatidwa na mzimu wakuipa.”

³¹Mai na abale wace Jezu adabwera kumuiko. Adaima panja, adatuma wanthu kuti akamucemere.

³²Wanthu azinji akhadakhala acimuzungulira. Ndipo wale adamuuza kuti, “Mai wako na abale wako ali panjapa, ali kukucemera.”

³³Tsono Iye adati, “Mai wangu! Abale wangu! Waponi pomwe?”

³⁴Pamwepo adayang'ana wanthu wale omwe akhadakhala acimuzungulira aciti, “Ine mai wangu na abale wangu mbawa.

³⁵Ali-yentse omwe ancita bzomwe Mulungu an'funa, womwewo ndiwo am'bale wangu, na mai wangu.”