1Tijb dxej guyu Jesús lën tijb yadoo. Lën yadoo guin zaꞌ tijb xin naxüꞌn tiblad yaa.
2Abiꞌ ree bén yuꞌ lën yadoo guin rulaꞌch reeman Jesús din guidoon zayüjnman laax dxej raziiladx reeman ya, din gac gutediaꞌ reeman Jesús.
3Dxel rëb Jesús loj xin naxüꞌn yaa guin: ―Bisu, guzuj galay guin.
4Abiꞌ rëbaman loj ree bén guin: ―¿Xhie rayal güün bejn dxej raziiladx reeman? ¿Ni zagdxe ya o ni mal? ¿Guslaaman xguialnaban bejn ya o gugüjtaman laaman? Per ad badxiꞌt reeman xtiidxaman.
5Dxel rdxeꞌch Jesús ruguiaaman loj gra reeman, dád guyunaya luxdooman guial ad guyënt reeman naya lasaꞌ reeman. Zianz rëbaman loj xin guin: ―Basli yaal. Abiꞌ basli yaax, loj hor guin gajc bayajcan.
6Chi baza ree bénfarisew guin, zianz bayaꞌn reeman diidx con ree xbejn Herodes din gugüjt reeman Jesús.
7Per Jesús zë gajcaman roꞌnijsdoo Galilea con ree xbejnman. Zien daꞌt ree bén Galilea con ree bén Judea binal laaman,
8në ree bén Jerusalén con ree bén Idumea, në ree bén zojb zatiblad roꞌ guiiwroꞌ Jordán, në ree bén Tiro con ree bén zojb niz Sidón. Dád zien ree bejn wej lod zaꞌ Jesús guial gogbee reeman ni rüjnman.
9Zeel rëbaman loj ree xbejnman din guzujsin reeman tijb barcw par laaman chitëë gutëë ree bén guin laaman.
10Guial ma bayüjnman zien ree bejn, zeel rbig gra ree bénragxuu lojman din guquiꞌ reeman laaman.
11Guiáad ree bén yuꞌ xindxab luxdoo chi ruguiaa reeman Jesús, ruzuxib reeman lojman, rbidxaꞌ reeman rëb reeman: ―¡Lüj na̱j Xiꞌn Dios!
12Per gunabeeman xindxab guin ree chitëë guiëb reex chu laaman.
13Dxel wëꞌp Jesús tijb ruguiaꞌ, abiꞌ gurejdxaman gra ree bén guleman. Zianz wej reeman,
14loj gra reeman gulejman chiptioꞌp reeman din su reeman con laaman zianczi guixhiaal tëëman laa reeman chigtieꞌch reeman xtiidx Dios.
15Abiꞌ badëëman guialrniabee din yayüjn reeman bénragxuu ree yabëë tëë reeman xindxab luxdoo ree bejn.
16Bén guie ree na̱j guidxiptioꞌp ree bén gule Jesús: Simón bén gulëëlajman Bëd,
17Jacob con Waj, bén na̱j ree xiꞌn Zebedeo, gunee Jesús laa reeman Boanerges (rën guiëban, xiꞌn guziaaw);
18në Andrejs, Felip, Tol, Matew, Tumajs con Jacob xiꞌn Alfeo, në Tadeo, nëtëë Simón bén biꞌch loj ree bén Cananistas,
19con Judas Iscariote bén bayü Jesús. Chi gulox bacaabeeman laa reeman dxel badxinnëman laa reeman lod zojbaman.
20Dád zien ree bejn bidoꞌp yagaj stijb, xt niꞌquid bileꞌt niajw Jesús con ree xbejnman.
21Chi gogbee ree xfamil Jesús, dxel bidxin reeman din yacaꞌ reeman laaman guial rëb reeman guijcaman rajc.
22Abiꞌ ree mextr rajc ley bén zëëd ree Jerusalén rëb reeman: ―Bén guin rabëë xindxab luxdoo ree bejn por xguialrniabee Beelzebú, xin rniabee ree xindxab.
23Dxel gurejdx Jesús laa reeman, rëbaman: ―¿Xhienaag yabëë satanás lasaꞌ xindxab gajquix?
24Bal tijb nacion, ad nadxagt rigaꞌ ree gobiarn, zadijl reeman abiꞌ ad zanuut xguialrniabee reeman,
25ziangajc tijb famil, bal rdilnë lasaꞌ reeman, nayob laꞌ lasaꞌ reeman.
26Yan, ziangajc bal satanás su contr lasaꞌ xindxabgajquix, zalaꞌ lasaꞌ reex abiꞌ wed yagaj lox xguialrniabee reex.
27’Abiꞌ achut zajc chuꞌ lidx tijb béngojl daꞌt din cwanman gra xieenman bal id zaxhii xgajman laaman. Zian zileꞌ cwanman ni rajpaman.
28’Naj rni lojdi guial yuꞌ perdon par gra dol ni rüjn bejn, yuꞌ tëë perdon par gra diidxguijdx ni rniee bejn chutëëz.
29Per bén guinieeguijdx xSprijt Dios, ad yuꞌt dxej gacaman perdon, ma banijtaman loj Dios.
30Rëb Jesús zian guial rëb reeman yuꞌ xsprijt xindxab luxdooman.
31Hor guin bidxin xniaa Jesús con ree bijchaman yu lod zaꞌman, per ad bileꞌt niu reeman zeel guxhaal reeman bén chignee laaman.
32Dxel ree bén zojbnë laaman yagaj bagojn reeman laaman, rëb reeman: ―Laa xniaal con ree bijchil zaꞌ luleꞌ guin cayguiil reeman lüj.
33Badxiꞌ Jesús xtiidx reeman rëbaman: ―¿Chunin na̱j da nan con ree da bichan?
34Dxel baguiaaman bén zojb ree gadëd lod zojbaman, rëbaman: ―Bén guie ree na̱j da nan con ree da bichan,
35din graczi ree bén rüjn ni rën Dios, laa reeman na̱j da bichan, da zanan në da nan.
