ማርቆሳ 3

1

2

3

4

5

6

7

8

9

10

11

12

13

14

15

16

¹ዬሱሲ ኣይሁዴ ዎሳ ኬꬂ ሲሚ ጌሊስ። ያን ኩሼይ ጉንዲዳ ኢሲ ኡራይ ዴዔስ።

²ኢሲ ኢሲ ኣሳይ ዬሱሳ ሞታናው ኮዪዲ፥ ኩሼይ ጉንዲዳ ኡራ ሳምባታ ጋላስ ኢ ፓꬂኮኔ ኣጊኮ ቤዓናው ኮዪዲ ሚንꬂዲ ናጎሶና።

³ዬሱሲ ኩሼይ ጉንዲዳ ኡራ፥ «ዴንዳ ኤቃዳ ሃ ሲንꬄ ያ» ያጊስ።

⁴ሄሳፌ ጉዬ፥ ኣሳኮ፥ «ሳምባታ ጋላስ ሎዖባ ኦꬄይሲ ዎጌዬ ኢታባ ኦꬄይሲ ዎጌ? ኣሳ ሼምፖ ኣሾዬ ዎይኮ ዎꬎ?» ያጊዲ ኦይቺስ። ሺን ኣሳይ ሲዒ ጊስ።

⁵ዬሱሲ ሃንቄቲዲ፥ ኤንታ ዩሺ ኣꬂ ፄሊዲ፥ ኤንቲ ኦዲን ሲዖናይሳታ ጊዲያ ጊሾ ኤንታ ቦላ ዳሮ ኣዛኒስ። ሄ ኣዲያኮ፥ «ኔ ኩሺያ ፒዲ ኦꬃ» ያጊስ። ኡራይ ፒዲ ኦꬂን ኢያ ኩሼይ ፓፂስ።

⁶ኤሌሲዲ ፋሪሳዌቲ ኣይሁዴ ዎሳ ኬꬃፌ ካሬ ኬዪዲ፥ ዬሱሳ ዋቲ ዎꬋኔኮ ማቄታናው ሄሮዲሳ ባጋታራ ኢሲ ሶ ሺቂዶሶና።

⁷ዬሱሲ ባ ታማሬታራ ጋሊላ ኣባኮ ቢስ። ጋሊላፔኔ ዪሁዳፔ ዪዳ ዳሮ ኣሳይ ኢያ ካሊዶሶና።

⁸ቃሲካ ዬሩሳላሜፔ፥ ኢዱሚያሳፔ፥ ዮርዳኖሴ ሻፋ ፒንꬃፌ፥ ፂሮሳ ካታማፔኔ ሲዶና ካታማፔ ዬሱሲ ኦꬂዳባ ሲዒዲ፥ ዳሮ ኣሳይ ኢያኮ ዪዶሶና።

⁹ኣሳ ዳሮቴꬃፌ ዴንዶይሳን ኢያ ኡንዔꬆና ሜላ ኢያ ታማሬቲ ዎጎሎ ኢያው ጊጊሳና ሜላ ኪቲስ።

¹⁰ዳሮ ኣሳ ኢ ፓꬂዳ ጊሾ ሃርጊያ ኣሳ ኡባይ ኢያ ቦቻናው ሱጌቶሶና።

¹¹ቱና ኣያናይ ኦይኪዳ ኣሳቲ ኢያ ቤዒዳ ዎዴ ኢያ ሲንꬃን ኩንዲዲ፥ ባንታ ቃላ ꬎቁ ኦꬂዲ፥ «ኔኒ ፆሳ ናዓ ጊዲኪ?» ያጎሶና።

¹²ዬሱሲ ሄ ቱና ኣያናቲ ባናቴꬃ ኦዴስካ ቆንጪሶና ሜላ ኤንታ ሚንꬂዲ ሃንቄቲስ።

¹³ዬሱሲ ዴሪያ ቦላ ኬዪዲ፥ ባ ኮዪዳ ኣሳታ ባኮ ፄጊስ፤ ኤንቲካ ኢያኮ ቢዶሶና።

¹⁴ኤንቲ ባራ ዳና ሜላኔ ቃላ ታማርሳና ሜላ ታማኔ ናምዓታ ዶሪዲ፥ ኤንታ፥ «ሃዋሬታ» ጊዲ ሱንꬂስ።

¹⁵ቱና ኣያናታካ ኬሳና ሜላ ኤንታው ማታ ኢሚስ።

¹⁶ኢ ዶሪዳ ታማኔ ናምዓቲ ሃይሳታ፡ ጴፂሮሳ ያጊዲ ሱንꬂዳ ሲሞና፥

¹⁷ቦዓኔርጌስ (ዳዳ ዳኒያ ኣሳታ) ያጊዲ ሱንꬂዳይሳታ፥ ዛብዲዮሳ ናይታ ያይቆባኔ ያይቆባ ኢሻ ዮሃኒሳ፥

¹⁸ኢንዲሪያሳ፥ ፊልጶሳ፥ ባርቶሎሚዮሳ፥ ማቶሳ፥ ቶማሳ፥ ኢልፊዮሳ ናዓ ያይቆባ፥ ታዲዮሳ፥ ባ ቢታስ ሚሼቲያ ሲሞናኔ፥

¹⁹ዬሱሳ ኣꬂ ኢሚዳ ኣስቆሮታ ዪሁዳ።

²⁰ሄሳፌ ጉዬ፥ ዬሱሲ ሶ ቢስ። ቃሲ ዳሮ ኣሳይ ሺቂን፥ ኢኔ ኢያ ታማሬቲ ሃሪ ኣቶሺን ካꬂ ማናዉካ ዳንዳዒቦኮና።

²¹ኣሳይ ኢያ፥ «ጎዬስ» ጊያ ጊሾ ኢያ ዳቦቲ ሄሳ ሲዒዲ ኢያ ኤካናው ቢዶሶና።

²²ሂጌ ኣስታማሬታፔ ኢሶቲ ኢሶቲ ዬሩሳላሜፔ ዪዲ፥ «ኢያ ቦላ ቢዔልዜቡሊ ዴዔስ»፥ ኢ፥ «ፃላሄይ ዎልቃን ቱና ኣያናታ ኬሴስ» ያጊዲ ኦዴቲዶሶና።

²³ዬሱሲ ኣሳ ባኮ ፄጊዲ ሌሚሶ ኦዲስ። «ፃላሄይ ፃላሄ ዋቲ ኬሳናው ዳንዳዒ?

²⁴ኢሲ ካዎቴꬃይ ባ ጊዶን ሻኬቲኮ ሄ ካዎቴꬃይ ኤቃናው ዳንዳዔና።

²⁵ሄሳዳካ፥ ኢሲ ኬꬃ ኣሳይ ባንታ ጊዶን ሻኬቲኮ ꬋያናፔ ኣቲን ዳናው ዳንዳዖኮና።

²⁶ሂዛ፥ ፃላሄይ ባራ ካጬቲዲ ሻኬቲኮ ꬋዮፔ ኣቲን ዳናው ዳንዳዔና።

²⁷«ሺን ኮይሮቲዲ ዎልቃማ ኡራ ቃቾና ዴዒሼ ኢያ ኬꬃ ጌሊዲ፥ ኢያ ሚሺያ ቦንቃናው ዳንዳዒያ ኣሲ ባዋ። ቃቺ ሲሚዲ ኢያ ኬꬃ ቦንቃናው ዳንዳዔስ።

²⁸«ታኒ ሂንቴው ቱማ ኦዳይስ፤ ፆሳይ ኣሳ ናይታስ ናጋራ ኡባኔ ኤንቲ ጫያ ጫሼ ኡባ ኣቶ ጋና።

²⁹ሺን ጌሻ ኣያና ቦላ ኢታባ ኦዴቲያ ኦዴስካ ሜሪና ናጋራ ጊዳናፔ ኣቲን ፆሳይ ኡባራካ ኢያ ማሬና» ያጊስ።

³⁰ዬሱሲ ሄሳ ጊዳይ፥ ኢሲ ኢሲ ኣሳቲ፥ «ኢያ ቦላ ቱና ኣያናይ ዴዔስ» ያጊዳ ጊሾሳ።

³¹ኢያ ኣያኔ ኢያ ኢሻቲ ዪዲ ካሬን ኤቂዲ፥ ኢያኮ ኣሴ ኪቲዲ ኢያ ፄጊዶሶና።

³²ኢያ ማታን ኡቲዳ ዳሮ ኣሳቲ፥ «ሄኮ፥ ኔ ኣዬራኔ ኔ ኢሻታራ ካሬን ኤቂዲ ኔና ኮዮሶና» ያጊዶሶና።

³³ዬሱሲ ዛሪዲ፥ «ታ ኣያ ኦኔ? ቃሲ ታ ኢሻቲ ኦናንቴ?» ያጊስ።

³⁴ባ ማታን ኡቲዳ ኣሳ ዩሺ ኣꬂ ፄሊዲ፥ «ሄኮ፥ ታ ኣያኣኔ ታ ኢሻቲ ሃይሳታ።

³⁵ፆሳይ ሼኒያ ኦꬂያ ኡባይ ታ ኢሻ፥ ታ ሚቾኔ ታ ኣዮ» ያጊስ።