Marqoosa 3

1

2

3

4

5

6

7

8

9

10

11

12

13

14

15

16

¹Hara gallas Yesusi Ayhuda Woosa Keeththe gelides. Henka kushey silidadey dees.

²Yesusa mootanas gaaso koyiza asati izi Ayhudata Sambata gallas pathanakkonne giidi pathishin beyana koyda.

³Izikka kushey silida addeza “Heen shiiqi uttida asa sinthan denda eqqa” gides.

⁴Hessafe guye Yesusi asa “Sambata gallas bessizay lo7o oosoyee? Iita oosoo? Asa shempo ashoyee? Woykko shempo wodhoo?” giidi oychides. Istika co7u gida.

⁵Ista wozna shuchchatethan mishetidi iza giddoththidi yuuyi aadhdhi eqqida asa hanqora xeelidi addeza “Ne kusheza piddisa!” gides. Addezikka ba kushe piddisin kushezi mulera pathides.

⁶Farsaaweeti kezi biidi iza wosti dhayssanakkonne Herdoosa bagga gidida asatara zoretida.

⁷Yesusi bana kaallizaytara abbako bides. Galilappenne Yuhudappe yida daro derey iza kaallides.

⁸Izi ooththizayssa siydi asay Yuhudappe, Yerusalameppe, Edoomeppe, Yordanoose pinthan diza deretappe qasse Xirooseppenne Sidoona heerappe izakko yides.

⁹Asay darida gish iza un7ethonta mala guutha wogolo isti giigisana mala bana kaallizayta azazides.

¹⁰Izi daro harganchata pathida gish sakoy waayssizayti wuri iza ba kushera bochchanas dafettida.

¹¹Tuna ayanatikka Yesusa beyida mala iza sinthan kundidi “Neni Xoossa Naa” giidi waassida.

¹²Gido attin izi oonakkonne tuna ayanati qoncisonta mala keehippe hanqides.

¹³Yesusi pude zuma bolla kezidi ba koyizayta baako yaana mala xeygides, istika izakko yida.

¹⁴Izara issife gidana malanne sabakanas yeddana mala tammanne nam7ata “Hawaareta” gi sunthides.

¹⁵Asaappe daydanthata kessana mala istas godateththi immides.

¹⁶Izi sunthida tammanne nam7ata sunthi hayssafe kaallizayssa; Phexroosa geetettida Simoona,

¹⁷Bi7orinegeese woykko daada nayta geetettida Zabidoosa nayta Yaqoobenne Yohannisa,

¹⁸Indiraasa, Piliphoosa, Bartelemoosa, Matoosa, Toomaasa, Ilfiyoosa naa Yaqoobe, Tadoosa, ba baggas mishettiza Simoona,

¹⁹Yesusa aaththi immida Asqoroonto Yuhuda.

²⁰Hessafe guye Yesusi issi so gelides. Izinne iza kaallizayti kath maana wodey istas dhayana gakkanaas derey qasseka dari shiiqides.

²¹Iza hanota siyida iza dabboti “Gooyonta aggenna” giidi banara ekki baanas izi dizaso gakkida.

²²Yerusalameppe yida xaafetikka “Bi7elizeebula geetettiza daydanthata halaqay iza bolla dees. Izi daydanthata kessizay daydanthata halaqa wolqanko!” gida.

²³Izikka ista xeygidi leemisora “Xala7ey asappe Xala7e wosti kessanee?

²⁴Ba giddon shaakoy diza kawotethi minnanas dandayenna.

²⁵Issi keeththa asikka ba giddon shaaketikko eqqanaas dandayenna.

²⁶Hessathoka Xala7ey ba garasan issoy issara shaakettikkonne ixettikko minni eqqanaas dandayenna. Hessika izas wurseth gidana.

²⁷“Hessa geedon issadey koyrottidi wolqama as qachonta dishe wolqamazaso gelanassinne iza miishe bonqanas dandayenna; iza aqo bonqanas dandayettizay wolqamaza qachikko xalala.

²⁸“Ta intes tumu gays; asa naytas nagaraynne cashshi wuri maarettana.

²⁹Gido attin Xillo Ayana bolla cashsha qaala haasayiza asa ubbas mernaas nagara acco gidana attin maarettenna” gides.

³⁰Hessa izi giday isti iza “Ne bolla tuna ayanay dees” gida gishasa.

³¹Hessafe guye iza aayeyanne iza ishati kare yi eqqidinne ase izakko kiitti xeygisida.

³²Iza yuuyi aadhdhi uttida daro asay “Hekko ne aayeyanne ne ishati karen eqqidi nena koyeettes” gida.

³³Izikka zaaridi “Ta aaya oonee? Ta ishati oonantee?” gides.

³⁴Iza yuuyi uttida asaako xeelidi “Ta aayeyanne ta ishati haytantakko!

³⁵Xoossa shene ooththizay wuri izi ta isha, ta michonne ta aayo” gides.