Mɑriki 7:24-35

²⁴Kɛ̀ Yesu ítɛ́ dɛborɛ̀ kɛ́kɔtɛ Tiiri kó dihɛì, tɛcĩ́ɛ̃̀tɛ̀ mɑtɛ̀, bɑ́ ò í ndɔ́ òmɔù nyɛ̃́ o kpɛ́í, ò mɛ nyí nnɑ kɛ bo sɔri.

²⁵Dɛndɛ bɑ̀mbɑ̀ nkòo nitipòkù mɔù dibɔɔ̀ mɑrì tɑ wèè birɛ, kòo keè kɛ̀ bɛ̀ tu Yesu dɛ̀ bo kòo pɑ̃̀nkɛɛ cokɛ́ kɛ́kɔtɛ Yesu borɛ̀ kɛ nínkóo o ììkɛ̀.

²⁶Dɛ kóo nitipòkù do í tú Sifubɛ kó kubotí kou bɛ̀ do ò pɛitɛ́ Siirii nwe Fenisii kó dihɛì miɛkɛ. Kòo bɑ́ntɛ̀ Yesu kɛ dɔ̀ wèe dennɛ dibɔɔ̀ dìì tɑ o sɑpùmbirɛ.

²⁷Kɛ̀ Yesu ò nɑ̀kɛ́ kɛ dɔ̀: Yóu kɛ̀ ibí ketɛ́ kɛ́di kɛ́nsɑ̀nnɛ̀, kɛ yɛ̃́ dɛ̀ í wenni ɑ bo túótɛ́mɛ̀ ibí kó mudiì kɛ́duɔ́ nyimɔbí.

²⁸Kòo nitipòkùu ò tɛ̃̀ńnɛ́ kɛ dɔ̀: Ɛ̃ɛ̃, n Yiɛ̀ n yí yetɛ, imɔbí nɛ́ ɔ̃ ndɛ́úmu ibí yo nkɛ̀ dɛ̀ɛ̀ duò.

²⁹Kɛ̀ Yesu ò tɛ̃̀ńnɛ́ kɛ dɔ̀: Nɛ̀ ɑ bɛ́i ntìì nɑ́ɑǹtì kpɛ́í, kò nkɛ̀ dibɔɔ̀ yɛ̀mu ɑ sɑpùmbirɛ miɛkɛ.

³⁰Kòo kò kɛ́nsɔ̃́ o birɛ duɔ́ bɛ́u dɛ dɔ́ù ĩ́nkɛ̀ kɛ̀ dibɔɔ̀ yɛ̀.

³¹Kɛ̀ Yesu ítɛ́ Tiiri kɛ́yɛ̀nnɛ̀ Sitɔ̃ɔ̃ kɛ́pɛ̃ɛ̃tɛ́ kutempɛ̃ nyɛhɛkɛ̀ tɛpíítɛ̀ kɔku kɛ́tuɔkɛ Kɑdidee kó mɛniɛ.

³²Kɛ̀ bɛ̀ɛ kɔtɛnní tɛɔ̃̀ntɛ̀ mɑtɛ̀ Yesu borɛ̀, bɑ́ tɛ̀ í nɔ nkɛ nɑ́ɑ́ mɛsɑ̀ɑ̀, kɛ̀ tɛ̀ɛ bɑ́ntɛ̀ Yesu kɛ dɔ̀ wèe nɔ́ɔ́ nho nɔu tɛ ĩ́nkɛ̀ kɛ́ tɛ̀ miɛkùnnɛ.

³³Kɛ̀ Yesu nɛ́ tɛ̀ dɛ̀tɛ kɛ́kɛntɛ́nɛ̀ ditĩ̀nnì, kɛ́bɑɑ́ o nɔ́mbɛ tɛ to miɛkɛ, kɛ́deè kɛ́sutɛ o nɔ́mbifɛ kɛ́kɑ́ɑ́kɛ́ tɛ nɔ́ndɛnfɛ̀,

³⁴kɛ́deè kɛ́bɔ́útɛ́ kɛĩ́nkɛ̀, kɛ́wei mɛdiɛ̀ nkɛ dɔ̀: Efufɑtɑɑ! (Dɛ̀ɛ̀ tu yɛ̀ɛ kpetɛ́).

³⁵Dɛndɛ bɑ̀mbɑ̀ kɛ̀ tɛɛ̀ ɔ̃̀ntɛ̀ɛ keè, kɛ́nɑ kɛ́nnɑ́ɑ́ mmɛsɑ̀ɑ̀.