Mareko 7:24-35

²⁴Nei eai i torohai ie lau Turia eo Sidona anadai eai, eo ie awasae numa esau alona eai ena gadosisi tabu tau esau ia i ita: na ia nige i tauyamui.

²⁵Sine esau, ia natuna siu gagirina, earua baaea ie lui, ia wasana i ataiei, abo ie laoma i tabaohu ia aena eai.

²⁶Sine wa Heleni sinena, boga Penesia Suria: ia ie riba gadogadora ia arinai, ia demoni natuna siu ne arinai bena i aiduiei.

²⁷Na, Iesu ie ribalau ia arinai, i ene, “Merumeru sora bogadi si sese baguna: taba merumeru adi aiai se gabalaei kedewa aridi eai, temeta doha nige i lolo.”

²⁸Sine ne i heuio, ie ribalau ia arinai, i ene, “Guiau e, mamohoi, na merumeru adi aiai mapuradi taba se beu hatahata ubuna eai, kedewa hinage se aidi.”

²⁹Ia ie ribalau sine ne arinai, i ene, “U lau em asa eai, demoni wa natum siu boeana eai, i lauo murimuri eai, wau riba wa u ribaei debana eai.”

³⁰Ia abo ie lau ena numa eai, natuna siu ne ie ota taubiga ena aba eno eai, eo demoni i lauo murimuri eai.

³¹Ia Turia eo Sidona adi sigasiga i laugabaedi, ie lau Dekapoli oea duaduarina eai, abo ie lage Galilaia gabogabona eai.

³²Isi tau bea doodoona, eo arina wesawesasana se woeai ia arinai: isi abo se awanorilau ia arinai ia nimana bena i saosaei ia potana eai.

³³Moutuana boeana eai i woeahai i laehesuara, ia nimana ie saolaei ia beana gudadi eai, i gariso, memenana abo i abiitalaei.

³⁴Ia i itaitasae galewa eai abo eawasina i tuhalei, abo i ribalau ia arinai, i ene, “Epata,” heaheasonina ede, “U malapai.”

³⁵Ia beana abo se malapai, memenana abo ie tabonosi, ia riba abo ie ribaei i masaraha.