San Marcos 7:24-35

²⁴Ya riꞌchi biriaꞌh Jesuhs zee Ñiꞌh para guihdxyi Tiru cun Sidohn, ya chin badzihn Ñiꞌh riꞌchi, bidxeela Ñiꞌh tuhbi yuuꞌ hasta guyuuꞌ Ñiꞌh laasii ayi guclaaꞌdzi Ñiꞌh ñahcabwaꞌ bwiinn nuu Ñiꞌh riꞌchi, per ayi guhca ziꞌchi.

²⁵Laasii lwehgu bihn xmaah tuhbi dxaꞌpa nin guyuuꞌ tuhbi bwiinndxaaba stoꞌ ñiꞌh laꞌh Jesuhs nuu riꞌchi, niꞌchin gwah ba hasta nuu Ñiꞌh ya chin bwaꞌha ba loh Jesuhs bazuꞌnllihbi ba nezloh Ñiꞌh,

²⁶ya gunnaꞌh chi ayi naa ba bwiinn Israel sino que naa ba tuhbi bwiinn sirofenicia, per loh nin gunaaba ba tin gabweꞌhe Jesuhs bwiinndxaaba chi stoꞌ lliiꞌndxaꞌpa ba,

²⁷rahbi Jesuhs loh ba: ―Basaaꞌn gahwxgah raꞌ lliiꞌn raꞌn, laasii ayi naa bwen chyu cooba xpahn raꞌ lliiꞌn raꞌn ya chubwihin loh bwehcu.

²⁸Chiꞌchi rahbi gunnaꞌh chi: ―Guchii luꞌh daada, per hasta bwehcu raꞌ rahw raꞌ guehta biuyiꞌhn nin riaaba llaaꞌn mwella nin rahw raꞌ lliiꞌn raꞌ luꞌh.

²⁹Chiꞌchi rahbi Ñiꞌh loh gunnaꞌh chi: ―Bwehngahca guñiꞌ luꞌh, zahca guziaa luꞌh, ya laꞌh bwiinndxaaba chi bariaꞌh stoꞌ lliiꞌndxaꞌpa luꞌh.

³⁰Ya chin bwaa gunnaꞌh chi yihdzi ba gwaguiaꞌha ba loh luꞌhn laꞌh lliiꞌndxaꞌpa ba bwiinndxaaba chi bariaꞌhala stoꞌ bi.

³¹Ya chin bariaꞌh Jesuhs guihdxyi Tiru, chiꞌchi gudiiꞌdxi Ñiꞌh nez guihdxyi Sidohn cun garaa raꞌ nezloh guihdxyi raꞌ nin rnabwaꞌ Decápolis, ya ziꞌchi zi badzihn Ñiꞌh hasta rwaaꞌ laguhn xteenn Galilea,

³²ya chin guyuuꞌ Ñiꞌh laꞌn guihdxyi xteenn Decápolis, gwanee paaldaa raꞌ bwiinn laꞌh tuhbi ndxiꞌhw nin naa goopa loh Ñiꞌh, ya gudxiꞌhn raꞌ ba gudziiꞌba naa Ñiꞌh yihca bwiinn goopa chi tin dxiaca ba,

³³ya chiꞌchi gwanee Ñiꞌh laꞌh bwiinn goopa chi tuhbi lahdu nez hasta ayi chyu bwiinn riiꞌ, riꞌchi guluꞌtee Ñiꞌh bacwihn naa Ñiꞌh laꞌn dxiahga bwiinn goopa chi, neezaa bagahdxyi xihin Ñiꞌh yihca bacwihn naa Ñiꞌh ya bidxiꞌ Ñiꞌh luudxyii ba,

³⁴chiꞌchi bwaꞌha Ñiꞌh nez llaaꞌndxibaaꞌ guñiꞌ biin lastoꞌ Ñiꞌh, chiꞌchi rahbi Ñiꞌh loh ndxiꞌhw chi: ―¡Efata! ―Naa ziga guiñiꞌ luꞌh: ¡Billaala!.

³⁵Ya hohra chi gahca ballaala dxiahga bwiinn goopa chi, neezaa luudxyi ba guhca bañiꞌ,