SAN MARCOS 7:24-35

²⁴Chica Dihvo vo min, ne cuahn ye cua̱hn ya̱hn yahn ya̱n Tiro ma̱n, Sidón ma̱n. Cuahn che nda̱ ye ne, nda̱ca ye a̱ma vah na̱n che conan ye. Hua nahn ye che cadino ihyan che min quenan ye, ate a ca̱de no che checadino ihyan.

²⁵Min va a̱ma ta̱hn dihn che quenun vaco chihnga̱ ta̱hn. Ndeta̱hno che checadino chaco te che nda̱ Dihvo vo ne, chahn te na̱n quenan ye, ne chehntihya te na̱n ye.

²⁶Ta̱hn min ne, ndiyu ta̱hn nación yahn Israel, te ta̱hn ta̱ma nación. A min Sirofenicia ya̱n va̱co te. Chica te Dihvo vo che ndetenda̱h ye vaco chihnga̱ che quenun ta̱hn dihn yahn te.

²⁷Ate ra̱hn Dihvo vo ri ye ta̱hn: ―Ihyan yáhn ne, a̱ma rendotenan ye che conán ihyan. Ndete che conán di ne, anduhneca̱ ndete che cahneví pa̱n che reh checa̱hya, cá̱h, cheh ya̱hna.

²⁸Ndaconan te, ne ra̱hn te ri te ihyan: ―Dihvé, cua̱co che ra̱hn ne. Ate ya̱hna ne, rahtenun te ma̱n mesa, ne renda̱ca da̱che chende checa̱hya reh te.

²⁹Tuhme ra̱hn ye ri ye ta̱hn: ―Nda̱hca̱ ndaconen. Co nahn. Vaco chihnga̱ me ne, a ndiquenda̱h ta̱hn daye.

³⁰Cona̱hn te, ne cuahn che nta̱ te ndeva̱co te ne, nta̱ca te da̱ya te che quendite te na̱n yundo. A ntiquenda̱h vaco chihnga̱ me ta̱hn.

³¹Chihno neve ro ne, nda̱ca Dihvo vo ya̱hn yahn Tiro, nchuh ye ya̱n Sidón ma̱n, te neve ya̱n ca̱hya che nino ya̱n Decápolis ma̱n, ne nta̱ ye na̱n va vine yahn Galilea.

³²Min nda̱ a̱ma o ihyan, nda ye a̱ma sa̱hn che nde chato se ma̱n, nde lihme se ma̱n, ne chica ye Dihvo vo che nahn ta̱h ye sa̱hn, din ye che ndoyahn se.

³³Quenda Dihvo vo sa̱hn a̱ma la̱do, ne terun ye ndutita̱h ye iverevan se ma̱n, nahn ta̱h ye chihya se nduco nunedan ye ma̱n.

³⁴Chenihyon na̱n ye cua̱hn na̱n ro, ne chena̱hn ino ye che chi nda̱che ye, ne ra̱hn ye: ―¡Efata! ―che nahn ca̱hma: ¡Condah!

³⁵Ndeta̱hno chihnevan se ma̱n, ndiquenda̱h ca̱hn se ma̱n.