ማርቆሳ 7:24-35

²⁴ዬሱሲ ሄዋፔ ኣጊዴ፥ ፂሮሳኔ ሲዶና ጊያ ካታማቱዋ ማታን ዴዒያ ጋዲያ ቢዴ፥ ኢቲ ጎሊያ ጌሌዳ፤ ቃሲ ኢ ያኒ ዴዒያዋ ኦኒኔ ኤራናዋ ኮዪቤና፤ ሺን ቆሴቲዴ ጋሚዓናው ዳንዳዪቤና።

²⁵ሺን ባሬ ጉꬃ ናቲ ቦላ ኢታ ኣያናይ ዴዒያ ኢቲ ሚሺራታ ዬሱሳባ ሲሳዴ፥ ኤሌካ ኣኮ ያኔ ኣ ጌዲያን ጉፋና ኣጋዱ።

²⁶ሄ ሚሺራታ ኣዪሁዳ ኣሳ ጊዱኩ፤ ኣ ዬሌቴዳዌካ ሶሪያ ጊያ ጋዲያና፤ ኣ ባሬ ናቲፔ ፃላሂያ ኬሳና ማላ፥ ዬሱሳ ዎሳዱ።

²⁷ሺን ዬሱሲ ዛሪዴ፥ «ናናይ ካሴቲዴ ቁማ ካሊኖ፤ ኣዪሲ ጎፔ፥ ናና ቁማ ኣኪዴ፥ ካናቱዋሲ ኦሊያዌ ሎዓ ጊዴና» ያጌዳ።

²⁸ሚሺራታ ዛራዴ፥ «ቱማካ ታ ጎዳው፥ ሃራይ ኣቶ ሳምፓ ሚዪያን ዴዒያ ካናቱካ ናናቱዋፔ ኣቴዳ ሱፓ ሚኖ» ያጋዱ።

²⁹ዬሱሲ ቃሲ ኢዞ፥ «ሃ ኔኒ ሃሳዬዳ ቃላ ዲራው፥ ፃላሂ ኔ ናቲፔ ኬሴዳ፤ ሲሚ ኔ ሶይ ባ» ያጌዳ።

³⁰ሚሺራታ ባሬ ሶይ ቢያ ዎዴ፥ ኢዚ ናቲፔ ፃላሂ ኬሲና፥ ሂፃን ጊሴዳዉኖ ዴማዱ።

³¹ዬሱሲ ፂሮሳ ጋዲያፔ ኬሲዴ፥ ሲዶናናኔ ታሙ ካታማ ጊያ ጋዲያና ካንꬂዴ፥ ጋሊላ ኣባኮ ቤዳ።

³²ኣሳይ ቱሌኔ ዱዴ ጊዴዳ ቢታኒያ ዬሱሳኮ ኣሂዴ፥ ባሬ ኩሺያ ኣ ቦላን ዎꬃና ማላ፥ ዬሱሳ ዎሴዲኖ።

³³ዬሱሲ ባሬካ ሄ ቢታኒያ ጮራ ኣሳፔ ጋፃ ኬሲዴ፥ ባሬ ቢራꬊያ ኣ ሃይꬃን ዬዴዳ፤ ቃሲ ጩቻ ጩቺዴ፥ ኣ ኢንፃርሳ ቦቼዳ።

³⁴ሳሉዋ ፑዴ ፄሊዴ፥ ቶኪ ሼምፒዴ፥ «ኤፍታሂ» ያጌዳ፤ ሄዋ ጊያዌ ዶዬታ ጊያዋ።

³⁵ቢታኒያ ሃይꬃይ ኤሌካ ዶዬቲ ኣጌዳ፤ ቃሲ ኣ ሃሳዬና ኢንፃርሳይካ ቢሌቲ ኣጌዳ፤ ቢታኒ ኣይኔ ዋዬቴናን ሃሳዪ ኣጌዳ።