Mɑriki 8

1

2

3

4

5

6

7

8

9

10

11

12

13

14

15

16

¹Diyiè tɛrì mɑrì kɛ̀ bɛnìtìbɛ̀ tó tíí nYesu borɛ̀ kɛ́nsũ bɛ̀ í mmɔkɛ bɛ̀ bo di mù,

²kɛ̀ Yesu yú o tɑncɔ́ùmbɛ̀ kɛ́ bɛ̀ nɑ̀kɛ́ kɛ dɔ̀: Mɛsémmɛ̀ mɛɛ̀ mpĩ̀ńnɛ̀ bɛnìtìbɛ̀ biɛ! Diyiè tɑ̃ɑ̃́nnì ndi yíe nkɛ̀ bɛ̀ m bonɛ̀ bɑ́ bɛ̀ í mɔkɛ bɛ̀ yo mmù.

³Kɛ̀ m bɛ̀ cíɛ mbɛ̀ bo duónɛ̀ dikònnì kucɛ kɛ yɛ̃́ bɛ̀mɑbɛ̀ bonnímɛ̀ dɛdɛ́tirɛ̀.

⁴Kòo tɑncɔ́ùmbɛ̀ɛ ò tɛ̃̀ńnɛ́ kɛ dɔ̀: Ti bo pɛ́tɛ́ dɛ pɛ̃́ɛ̃̀bɛ̀ dikpɑ́ɑ̀ dii mmiɛkɛ kɛ̀ bɛ̀ɛ di kɛ́nsɑ̀nnɛ̀?

⁵Kɛ̀ Yesu bɛ̀ bekɛ kɛ dɔ̀: Di mɔkɛ pɛ̃́ɛ̃̀bɛ̀ bɛ̀dɛ? Kɛ̀ bɛ̀ɛ ò tɛ̃̀ńnɛ́ kɛ dɔ̀: Pɛ̃́ɛ̃̀bɛ̀ bɛ̀yiekɛ̀.

⁶Kòo duɔ́ nkɛ̀ ditĩ̀nnì kɑroo kɛtenkɛ̀, kòo túótɛ́ pɛ̃́ɛ̃̀bɛ̀ bɛyiekɛ̀ bɛmbɛ kɛ́sɑ̃ntɛ Kuyie, kɛ́ bɛ̀ wɛ̀rí kɛ́duɔ́ nho tɑncɔ́ùmbɛ̀ kɛ dɔ̀ bɛ̀ɛ totí bɛnìtìbɛ̀, kɛ̀ bɛ̀ɛ bɛ̀ totí.

⁷Kɛ sɔ̃́ mbɛ̀ tɔnɛ̀ siyĩĩ sɑ́m̀pɔ́sì mɑsì kɛ̀ Yesu mɔɔ Kuyie nkó mɛsɑ̀ɑ̀ nkɛ́nɑ́kɛ́ o tɑncɔ́ùmbɛ̀ kɛ dɔ̀ bɛ̀ɛ sì totí.

⁸Kɛ̀ bɛ̀ɛ di bɛmɔu kɛ́nsɑ̀nnɛ̀ kɛ̀ dɛ̀ nsúɔ́ nkɛ píɛ́kɛ́ yɛmɔ́mmùyɑ́kɛ̀ yɛ̀yiekɛ̀ kɛ̀ bɛ̀ɛ tɔ.

⁹Dɛ kó bɛnìtìbɛ̀ do bo mbo sikɔupísìnɑ̀ɑ̀ (4000) ndi bɛ̀ɛ̀ di. Kɛ̀ Yesu duɔ́ nkɛ̀ bɛ̀ɛ kò.

¹⁰Yesu nɛ̀ o tɑncɔ́ùmbɛ̀ kɛ̀ bɛ̀ pɑ̃̀nkɛɛ tɑ kudɑbɛkù kɛ́kɔtɛ Dɑdimɑnutɑɑ kó kɛtenkɛ̀.

¹¹Kɛ̀ Fɑdisĩɛ̃bɛ ndíí Yesu kɛ́kɔtɛní kɛ́ nhò nɛ̀ìnɛ̀ kɛ tú: Dɔɔ̀ dɛ̀mɑrɛ̀ dɛ̀ɛ̀ bo cútɛ́ní kɛĩ́nkɛ̀, dɛ̀ɛ̀ bo bɛnkɛ Kuyie nkuù dɑ tɔ̃nnímɛ̀.

¹²Kɛ̀ Yesu wei mɛdiɛ̀ nkɛ dɔ̀: Bɑ nkpɛ́í nte kɛ̀ di mmɔ̀nnì kɔbɛ m békú kɛ tú n dɔɔ̀ tidiɛtì. Mɔ́mmuɔ nwe n di nɑ́ɑ́mmɛ̀ bɛ̀ bɑ́ɑ́ yɑ̀ tidiɛtì mɑtì.

¹³Dɛ kó difɔ̃nkúò kɛ̀ Yesu ítɛ́ dɛborɛ̀ kɛ́tɑ kudɑbɛkù kɛ́séntɛ́ mɛniɛ nyɑ́ɑ̀ tɛrì.

¹⁴Kɛ̀ Yesu tɑncɔ́ùmbɛ̀ɛ yɛ̃̀ mbɛ̀ bo ntɔmɛ̀ pɛ̃́ɛ̃̀bɛ̀ kɛ́ntɔ pɛ̃́ɛ̃̀ omɑ́ɑ̀ bɛ dɑbɛkù miɛkɛ.

¹⁵Kɛ̀ Yesu bɛ̀ nɑ̀kɛ́ kɛ dɔ̀: Dɑɑtɛnɛ̀ Fɑdisĩɛ̃bɛ nɛ̀ Edɔti bɛ kó mutie mùù muuti pɛ̃́ɛ̃̀ mu kpɛ́í.

¹⁶Kòo tɑncɔ́ùmbɛ̀ nnɑ́ɑ́ mbɛmɑ́ɑ̀ kɛ tú: Ò nɑ̀ɑ́ mmiɛ nti í tɔ mɛ̀ɛ̀ kpɛ́í nkɛ pɛ̃́ɛ̃̀bɛ̀.

¹⁷Kɛ̀ Yesu bɑntɛ́ bɛ yɛ̀mmɛ̀ kɛ́ bɛ̀ nɑ̀kɛ́ kɛ dɔ̀: Dɛ̀ dòmmɛ kɛ̀ di toti di yɛ̀mmɛ̀ pɛ̃́ɛ̃̀ ĩ́nkɛ̀, di mu nyí bɑntɑ́ɑ̀? Di mu nyí yĩ̀ɛ̃́tɑ́ɑ̀?

¹⁸Di to yɛɛ̀ kpeńnɑ̀ɑ̀? Di mɛ mmɔ̀kɛ inuɔ nkɛ í wúónɑ́ɑ̀? Di mɛ mmɔ̀kɛ yɛto kɛ í yoɑ̀?

¹⁹Di í kpɑɑ́ kɛ yɛ̃́ n sòò wɛ̀rí pɛ̃́ɛ̃̀bɛ̀ bɛ̀nùmmù kɛ̀ bɛnìtìbɛ̀ sikɔupísìnùmmùu (5000) cɑ́ɑ́kɛ́, kɛ̀ bɛ̀ɛ sùɔ́ nkɛ́mpíɛ́kɛ́ nyɛmɔ́mmùyɑ́kɛ̀ yɛ̀dɛ̀ kɛ̀ di tɔɑ̀? Kɛ̀ bɛ̀ɛ ò tɛ̃̀ńnɛ́ kɛ dɔ̀: Tɛpíítɛ̀ nɛ̀ yɛ̀dɛ́ɛ̀.

²⁰Kòo yíɛ́ kɛ́bɛ́i nkɛ dɔ̀: Kɛ̀ n wɛ́rí pɛ̃́ɛ̃̀bɛ̀ bɛ̀yiekɛ̀ kɛ̀ bɛnìtìbɛ̀ sikɔupísìnɑ̀ɑ̀ (4000) cɑ̀ɑ́kɛ́ kɛ̀ dɛ̀ɛ súɔ́ nkɛ́mpíɛ́kɛ́ nyɛmɔ́mmùyɑ́kɛ̀ yɛ̀dɛ kɛ̀ di tɔ? Kɛ̀ bɛ̀ dɔ̀: Yɛ̀yiekɛ̀.

²¹Kɛ̀ Yesu bɛ̀ bekɛ kɛ dɔ̀: Bɑ́ di mu nnɛ́ í bɑntɑ́ɑ̀?

²²Yesu nɛ̀ o tɑncɔ́ùmbɛ̀ kɛ̀ bɛ̀ɛ tuɔkɛ Bɛtisɑidɑɑ, kɛ̀ bɛ̀ɛ ò tɔní kuyũ̀ɔ̃̀nkù mɑkù kóò bɑ́ntɛ̀ kɛ dɔ̀ wèe kù kɑ̀ɑ́kɛ́ kɛ́ kù miɛkùnnɛ.

²³Kɛ̀ Yesu dɛtɛ kuyũ̀ɔ̃̀nkù kɛ́yɛ̀nnɛ̀ dihɛì mɑ̀nku, kɛ́sutɛ o nɔ́mbifɛ tinɔ́ntɔ̃ũtì kɛ́kɑ́ɑ́kɛ́ ku nuɔ, kɛ́nɔ́ɔ́ nho nɔu ku ĩ́nkɛ̀, kɛ́ kù bekɛ kɛ dɔ̀: A yɑ̀ dɛ̀mɑrɑ̀ɑ̀?

²⁴Kɛ̀ kuyũ̀ɔ̃̀nkùu wéntɛ́ kɛ dɔ̀: N yɑ̀ bɛnìtìbɛ̀ mbɛ kɛ̀ bɛ̀ dònnɛ̀ dɛtie nkɛ centì.

²⁵Kɛ̀ Yesu yíɛ́ kɛ́pi ku nuɔ, kù wèńtɛ́ dìì mɔ̀nnì kɛ́ nsɔ̃́ nkù wùó mpɑ́íí kɛ wúó ndɛmɔu.

²⁶Kɛ̀ Yesu ò nɑ̀kɛ́ kɛ dɔ̀: Kò nhɑ cĩ́ɛ̃̀tɛ̀ ɑ nɛ́ bɑ́ɑ́ kétɛ́ dihɛì miɛkɛ.

²⁷Yesu nɛ̀ o tɑncɔ́ùmbɛ̀ kɛ̀ bɛ̀ nkɔri Fidipu kóò Sesɑdee kó yɛhɛkɛ̀, kɛ̀ Yesu bɛ bekɛ kɛ dɔ̀: Bɛnìtìbɛ̀ yɛ̀mmɛ̀ dò n tú we?

²⁸Kɛ̀ bɛ̀ɛ ò tɛ̃̀ńnɛ́ kɛ dɔ̀: Bɛ̀mɑbɛ̀ yɛ̀mmɛ̀ dò nhɑ tú Isɑ̃ɑ̃-Bɑtiisi, kɛ̀ bɛtɔbɛ̀ yɛ̀mmɛ̀ dò nhɑ tú Kuyie mpɑ̃ɑ̃nɑ́ɑǹtì nɑ́ɑǹtò diɛwè Edii kɛ̀ bɛtɔbɛ̀ kɔ̃mɛ dò nhɑ tú Kuyie mpɑ̃ɑ̃nɑ́ɑǹtì nɑ́ɑm̀bɛ̀ kóò mɔù.

²⁹Kɛ̀ Yesu bekɛ o tɑncɔ́ùmbɛ̀ kɛ dɔ̀: Díndi yɛ̀mmɛ̀ dò n tú we? Kɛ̀ Piɛrii ò tɛ̃̀ńnɛ́ kɛ dɔ̀: A tú Kirisi nwe Kuyie ntɑ̃ɑ̃tɛ́ wè koò tɔ̃nní.

³⁰Kɛ̀ Yesu bɛ̀ cɑu nkɛ dɔ̀ bɛ̀ bɑ́ɑ́ yie nkoò mɔùu tì kèè.

³¹Dɛ mɔ̀nnì kɛ́ketɛ́ kɛ́ mbɛ̀ nɑ̀ɑ́ nkɛ tú: Onìtìbirɛ dò nkɛ́fɛ̃́ṹtɛ́mu mɛdiɛ̀, kɛ̀ Kuyie ncĩ́ɛ̃̀tɛ̀ kó bɛkótíbɛ̀ nɛ̀ ikuɔ́ nìùbɛ̀ kó bɛkótíbɛ̀ nɛ̀ ikuɔ́ wɑ̃ɑ̃̀bɛ̀ kɛ̀ bɛ̀ɛ ò yetɛ kóò kùɔ, diyiè tɑ̃ɑ̃́nnì yiè kòo yɑ̃́ntɛ́.

³²Kɛ̀ Yesu nti mbɛ̀ nɑ̀ɑ́ mbɑ́ ò í sɔrì, kɛ̀ Piɛrii ò yu kɛ́kɛntɛ́nɛ̀ kɛ́ nhò kpɑ̀nnɛ̀.

³³Kɛ̀ Yesu wɛ̃ɛ̃tɛ kɛ́wéntɛ́ o tɑncɔ́ùmbɛ̀ kɛ́pɛ́i mPiɛri kɛ dɔ̀: Fũtɛ m borɛ̀ fɔ̃́ ndibɔɔ̀, kɛ yɛ̃́ ɑ yɛ̀mmɛ̀ í túmɛ̀ Kuyie nkɔ̃mɛ, mɛ̀ tú mɛnitiyɛ̀mmɛ̀ mmɛ.

³⁴Kɛ̀ Yesu yú o tɑncɔ́ùmbɛ̀ nɛ̀ ditĩ̀nnì kɛ́ bɛ̀ nɑ̀kɛ́ kɛ dɔ̀: Kòò mɔù dɔ́ kɛ́ n tũnnɛ wèe duɔ́ nhomɑ́ɑ̀ kɛ́tɔ o dɑpɑ̃ɑ̃tí kɛ́ n tũnnɛ.

³⁵Kɛ yɛ̃́ wèè bo ndɔ́ kɛ́dɛɛtɛ́ o fòmmu ò bo mù fétinnɛ, kɛ̀ wèè yetɛ o fòmmu n kpɛ́í nɛ̀ n nɑ́ɑǹtì kpɛ́í kòo mù pɛ̀tɛ́.

³⁶Onìtì bo cɔ̃ntɛ bɑ kòò mɔ̀kɛ kutenkù kuu nkpɛrɛ dɛmɔu kòo wɛ̃nnì nɛ́ feti?

³⁷Onìtì bo yietí bɑ kòo wɛ̃nnìi yentɛ́!

³⁸Kɛ yɛ̃́ ifɛi bo mbo wè nɛ̀ n kpɛ́í nɛ̀ n nɑ́ɑǹtì kpɛ́í di mmɔ̀nnì kó bɛnìtìbɛ̀ bɛ̀ɛ̀ bùtínnɛ́ Kuyie nkɛ dɔɔri mɛyɛi mbɛ cuokɛ̀, mí nhOnìtìbirɛ m múnkɛ bo nhò mɔ̀kɛnɛ̀ ifɛi m bo nwɛ̃tiní dìì mɔ̀nnì nɛ̀ Kuyie nkó tikpetì kɛ nɛínɛ̀ Kuyie ntɔ̃rɛ̀.