San Marcos 7:24-35

²⁴Buzë́ꞌë niꞌ Jesús, bdxinëꞌ gal‑laꞌ ga nacuáꞌ yödz Tiro len yödz Sidón. Niꞌ gyaziëꞌ tu yuꞌu len guꞌnnëꞌ nutu nu gnözi, san cutu caꞌ guc ucachiꞌ cuinëꞌ.

²⁵Byö́ninu didzaꞌ rzë ca nac queëꞌ Jesús ngul, zoabiꞌ biꞌi nguldauꞌ queënu, yuꞌu lëbiꞌ böꞌ xöhuiꞌ, atiꞌ laꞌ bídtënu ga zoëꞌ Jesús, len buzechu zxibnu xniꞌë.

²⁶Ngul ni cutu nacnu judío, san nababnu bunách Sirofenicia. Gútaꞌyunu lahuëꞌ Jesús ubijëꞌ böꞌ xöhuiꞌ naꞌ yuꞌu‑biꞌ biꞌi nguldauꞌ queënu.

²⁷Niꞌr gudxëꞌ‑nu Jesús, rnëꞌ: ―Bëꞌ latj luhuö́lj ziꞌal nup nacgac ca zxiꞌn xan yuꞌu, le cutu nac dxiꞌa uguaruꞌ yöt quecbiꞌ biꞌi naꞌ len chuꞌnruꞌ lei laucbaꞌ bö́ꞌcuꞌdauꞌ.

²⁸Bubiꞌinu didzaꞌ ngul naꞌ, gudxnu Jesús: ―Ja, Xan, san yuguꞌ bö́ꞌcuꞌdauꞌ nacuaꞌbaꞌ zxani ga tágubiꞌ, tágubaꞌ le bizxj tuꞌhuö́xj ga naꞌ tágubiꞌ.

²⁹Niꞌr gudxëꞌ‑nu Jesús, rnëꞌ: ―Le gnauꞌ cni, huac huöjuꞌ. Chburúj böꞌ xöhuiꞌ naꞌ gyuꞌu‑biꞌ biꞌi nguldauꞌ quiuꞌ.

³⁰Catiꞌ budxinnu lidxnu, bléꞌinu‑biꞌ biꞌi nguldauꞌ queënu naꞌ, dëbiꞌ lu daꞌa len chnurúj böꞌ xöhuiꞌ naꞌ gyuꞌu lëbiꞌ.

³¹Burujëꞌ Jesús latj naꞌ nabáb yödz Tiro atiꞌ gdödëꞌ gap dë yödz Sidón len yuguꞌ yödz Decápolis, bdxinëꞌ raꞌ nis zxön qui Galilea.

³²Bunách niꞌ djuaꞌgac ga zoëꞌ Jesús tuëꞌ bönniꞌ nacödzuëꞌ len curnë́ꞌ, táꞌtaꞌyuëꞌ lahuëꞌ Jesús gxoa nëꞌë lëꞌ.

³³Bubijëꞌ lëꞌ tslaꞌl Jesús ladj bunách naꞌ, atiꞌ bnëꞌë xbönniꞌ nëꞌë yeru naguëꞌ bönniꞌ naꞌ. Gruꞌnëꞌ zxö́naꞌdauꞌ len gdanëꞌ ludxëꞌë.

³⁴Niꞌr buyúëꞌ luzxbál len gnë ladxëꞌë, rnëꞌ: ―Efata. Didzaꞌ hebreo ni rna lu didzaꞌ xidzaꞌ: “Gyalj”.

³⁵Laꞌ böaljtë naguëꞌ len laꞌ buguitjtë ludxëꞌë, gnëtëꞌ dxíꞌadauꞌ.