Maki 7:24-35

²⁴Jisasi'a otino ana mopa atreno Taia kuma kaziga vu'ne. Vuno mago nompi ufreno, vahe'mo'za emenine huza ontahisaze nehuno umanine, hianagi frakigara osu'ne.

²⁵Ana hianagi mago mofara havi avamumo agu'afi fre'nea mofa'mofo nerera'a Jisasi'ma emani'nea ke nentahino, ame huno eno agafi eme prihuno,

²⁶ana ara Sairofonesia kuma Griki megi'a vahepinti a'kino, Jisasinku muse hugantoanki havi avamura ome hunto huno asami'ne.

²⁷Jisasi'a anage huno ana aku hu'ne, mofavremofo bretima erita kramofo amizamo'a knarera osu'neanki, atregeno mofavremo kotazana nemu huteno.

²⁸Ana a'mo'a anage hu'ne, Ramoka tamage hananagi, itaretima mofavre'mo'za nenazageno, ankrama hermiama'a kramo'za zogi'za ne'naze.

²⁹Anante Jisasi'a anage hu'ne, e'inahu kenona hanku vuo, havi avamumo'a mofaka'amofo agu'afinti hago atiramino vu'ne.

³⁰Higeno noma'arega vuno ome keana, mofa'amofona havi avamumo ko atreno vigeno, sipare mase'negeno ome ke'ne.

³¹Anante Jisasi'a Taia kumara atreno, Saido kumapinti rugitagino Dekapolisi kaziga, Galili tirutega uhanatige'za,

³²mago agesa ankani neregeno kea nosia ne' avare'za e'za, Jisasinku muse hugantonanki kazana agofetu anto hu'naze.

³³Jisasi'a veara nezmatreno ana ne' avareno znagrake umanine'ne, agesa gampi azana nevazino, avetu aheno azankonu aganefunare avako nehuno,

³⁴kesga huno monafi negeno ra asimu nenteno, Efata huno hu'ne, (ana kemofo agafa'a ruhagro huo hu'ne.)

³⁵Ame huno ana ne'mofo agesamo'a ru hagro higeno, agefunamo'a oza higeno, knare huno kea hu'ne.