Mɑlǝkɩ 7:14-33

¹⁴Pǝlɛ pǝ wɑɑlɩ Yesu tɑsɑ sɑmɑɑ kɛ yɑɑʋ kɛ ɩ kiŋ nɑ ɩ́ tɔ sɩ: Mǝ tǝnɑ tǝpɑɩ ɩ́ nɩɩ mɑ tɔm nɑ ɩ́ nyɩ sɩ

¹⁵pʋlʋ fɛɩ mpi pǝ sʋʋkɩ yʋlʋ nɔɣɔ tɑɑ nɑ pǝ́ tii ɩ hiluɣu tɑɑ nɑ pǝ́ lɑpɩ-ɩ ɩsɑɣɑʋ tɔ. Amɑ mpi pǝ lɩɩkǝnɑ hɑtoo yʋlʋ lotu tɑɑ tɔ mpɩ pǝ lɑkǝnɑ-ɩ ɩsɑɣɑʋ.

¹⁶Ye wei ɩ kɛ tɔm nɩɩlʋ pʋntʋ ɩ́ nɩɩ.

¹⁷Yesu kɔmɑ nɑ ɩ́ yele sɑmɑɑ nɑ ɩ́ sʋʋ tǝyɑɣɑ, ɩlɛnɑ ɩ ɩfɑlɑɑ pɔɔsɩ-ɩ ɩtuule ńtɛ́ tǝ yɑɑsi.

¹⁸Ḿpʋ́ɣʋ́ ɩ pɔɔsɑ-wɛ sɩ: Pǝ kpɛŋnɑ-mɛ mǝ tɑ cɛkǝnɑ-tǝɣǝlɛ? Ɩ́ tɑ nyɩ sɩ pʋlʋ fɛɩ mpi pǝ sʋʋkɩ yʋlʋ nɔɣɔ tɑɑ nɑ pǝ tii ɩ hiluɣu tɑɑ nɑ pǝ́ lɑpɩ-ɩ ɩsɑɣɑʋ tɔ?

¹⁹Pǝ tɑɣɑ pʋlʋ tɔɔ, mpi pǝ sʋʋkɩ yʋlʋ nɔɣɔ tɔ ɩ hiluɣu tɑɑ kɛ́ pǝ tiiki. Ɩlɛnɑ pǝ́ polo pǝ́ lɩɩnɑ ɩ tɑpʋɣʋ tɛɛ, pɩɩ cɑkɩ ɩ lǝmɑɣɑsɛɛ kiŋ. (Yesu yɔɣɔtɑ ḿpʋ́ɣʋ́ sɩ pǝ́ hʋ́lɩ́ sɩ yʋlʋ pǝsǝɣɩ nɑ ɩ́ tɔɣɔ pǝ tǝnɑ).

²⁰Ɩlɛnɑ Yesu tɑsɑ-wɛɣɛ heeluɣu sɩ: Mpi pǝ lɩɩkǝnɑ yʋlʋ tɑɑ tɔ mpɩ pǝ lɑkǝnɑ-ɩ ɩsɑɣɑʋ.

²¹Pǝ tɑɣɑ pʋlʋ tɔɔ, hɑtoo yʋlʋ tɑɑ kɛ́ ɩ lotu tɑɑ mɑɣɑmɑɣɑ kɛ ɩ cɑɑlǝɣǝnɑ ɩsɑɣɑtʋ kɛ hʋʋʋ nɑ pǝ́cɔ́ ɩ́ lɑ-tɩ. Pɑɑ ɑsilimɑ kʋlɑpʋtʋ, pɑɑ ŋmɩɩlǝm, pɑɑ yʋlʋkʋlɛ,

²²pɑɑ wɑsɑŋkɑlǝtʋ, pɑɑ lɛlɑɑ nyǝm nyɩɩlʋɣʋ, nɑ nyǝmǝŋ nɑ puɣusuɣu nɑ yem yem lɑpʋ, nɑ ɩsɛsɛɛmlɛ nɑ yǝlɑɑ cɑɣɑnɑʋ, nɑ tǝhɔm nɑ kʋmɛlɛntʋ.

²³Pǝ tǝnɑɣɑ mpʋ yʋlʋ tɑɑ kɛ́ pǝ lɩɩkǝnɑ nɑ pǝ́ lɑkɩ-ɩ ɩsɑɣɑʋ.

²⁴Yesu lɩɩ tǝnɑ, ɩlɛnɑ ɩ́ polo tɛtʋ nti tǝ wɛ Tiii cɔlɔ tɔ tǝ tɑɑ, nɑ ɩ́ cɑɣɑ tǝyɑɣɑ nɑkǝlɩ kɑ tɑɑ. Ɩ tɑ sɔɔlɩ sɩ yǝlɑɑ ɩ́ nyɩ ɩ tɔɔ. Pɑɑ nɑ mpʋ tete ɩsɩɩ sɑŋɑ tɔ pɑ tɛmɑ ɩ tɔɔ kɛ́ kulusuɣu.

²⁵Alʋ nɔɣɔlʋ ɩ pɛɛliyɑ kɑ hiinɑ ɩlɔɣɔʋ. Ḿpʋ́ɣʋ́ pɑ heelɑ ɑlʋ ɩnǝɣɩ Yesu tɔm, ɩlɛnɑ ɩ́ polo kpɑkpɑɑ kɛ Yesu kiŋ nɑ ɩ́ hoti ɩ tɛɛ.

²⁶Alʋ ɩnɩ ɩ kɛ́ piitim lɛmpɩ tʋ kɛ́. Pɑ lʋlɑ-ɩ Fenisii kɛ Silii tɛtʋ tɑɑ. Ḿpʋ́ɣʋ́ ɑlʋ ɩnɩ ɩ tɔmɑ Yesu sɩ ɩ́ tɔɣɔnɩ ɩ pɛɛliyɑ ŋkɛ kɑ ɩlɔɣɔʋ.

²⁷Ɩlɛnɑ Yesu nɑ́ɑ́ cɔ-ɩ sɩ: Yele nɑ piyɑ hɑɣɑ nɑ pǝ́cɔ́. Pǝ tɑ mʋnɑ sɩ pɑ́ kpɑɣɑ piyɑ tɔɣɔnɑɣɑ nɑ pɑ́ tʋ hɑsɩ.

²⁸Tǝnɑɣɑ ɑlʋ ɩnɩ ɩ cɔ-ɩ sɩ: Hɑɩ, mɑ cɛ, ye piyɑ tɔkɩ nɑ pǝ pʋtʋtɑ ɑtɛ, hɑsɩ tǝŋǝɣɩ nɑ sɩ tɔɔsǝɣɩ mɛɛ.

²⁹Mpʋɣʋlɛ Yesu sɩ: Nyɑ́ kʋcɔcɔtʋ tǝnɛ tǝ tɔɔ kpe. Nyɑ́ pɛɛlɔ ɩlɔɣɔʋ sewɑ.

³⁰Tǝnɑɣɑ ɑlʋ ɩnɩ ɩ hɑ lumɑɣɑ nɑ ɩ́ kpe ɩ tɛ. Ɩ tɑlɑɑ ɩlɛnɑ ɩ́ mɑɣɑnɑ ɩ pǝyɑɣɑ hǝntɑ kɑto tɔɔ, nɑ ɩlɔɣɔʋ tɛmɑ seu.

³¹Pǝlɛ pǝ wɑɑlɩ Yesu lɩɩ Tiii tɛtʋ nɑ ɩ́ tǝŋnɑ Sitɔŋ nɑ ɩ́ fɑɣɑnɑ timpi pɑ yɑɑ sɩ Acɑlɛɛ Nɑɑnʋwɑ tɔ, nɑ ɩ́ mǝlɩ Kɑlilee teŋku kiŋ.

³²Ḿpʋ́ɣʋ́ pɑ kɔnɑ-ɩ ntɑm nɔɣɔlʋ, ɩ mɑtǝɣɩ kʋmɑtʋ kɛ́, ɩɩ pǝsǝɣɩ yɔɣɔtɑɣɑ. Nɑ pɑ́ wiinɑ Yesu sɩ ɩ́ tǝnɩ niŋ kɛ ɩ tɔɔ.

³³Yesu lǝsɑ-ɩ kpeeŋɑ, ɩlɛnɑ ɩ́ sʋsɩ ɩ mpee kɛ ɩ ŋkpɑŋŋ tɑɑ nɑ ɩ́ lɑ ntɑɣɑmɑ kɛ ɩ mpǝle tɔɔ nɑ ɩ́ tɑɑ ɩ nsǝmlɛ.