Maaruku 7:14-33

¹⁴Yinsa khuwaakharipusha theenya atthu apale khuwooza yoori: “Mwikisiileze mooshi na eweeleyeni epi saana yoori:

¹⁵khina etthu moote ya oje wa pinaatamu enraaye nonvira khunttha oharaamu, ila epile zininlankhaaye nroho mwawe ti eninharamushaaye.

¹⁶Nkhama ntthu onaaye mashiilo oosiila ti asiile!

¹⁷Paata ya owaalikha atthu apale olawa owaya, anakhiyoni khunvekela yoori awooze maana a nlikaniso aya opule.

¹⁸Yinsa khuwoozela yoori: ‘Kiri na mweeyo khiniweeleyani? Yoori khina etthu moote eninviraaye pinaatamu eninharamushaaye?

¹⁹Maana khineetta nroho mwawe, ila mwiijohojoho mwawe, nawiisha khwiitthiwamo.” Khwa etthiipo mattakhuzi apale, Yinsa khutukhuru ottha wiiya halaali vitthu zoojiwa zooshi.

²⁰Khurutela olupa yoori: “Etile eninsaruwaaye pinaatamu ti eninharamushaaye.

²¹Maana nrooho ti, enlakhaamo zawuupuweliwa zootakhala, oshawi akhapa, wiiya, wuula,

²²oraruwa, okhwiririwa,vitthu zootakhala, ohata, oralana woohiiyi wa halaali, nrima, waapa, ojoona na ololo.

²³Zootakhala zooshi zinlankha nroho wa ntthu na piitthiipo zininharamushaaye pinaatamu.”

²⁴Yinsa khulaawo okhule waya khulawa phantte ya Tiiro na Sitooni, khweetta nyuupa yaya eto na khaatakhiye ojuwiwa ti ntthu, ila khuhiwahi ojittha sirini.

²⁵Ila nasaapiru muukha mmote, aarina mwanawe wa nnatti ariina sheethwani, asiiliyeevo monkoni wa ye, khuta khukokhora nshini wa moolu a Yinsa.

²⁶Muukha otule aari nkereeka ya siiro-fineesiya aavokoliweewo, khusala anvekela Yinsa yoori amwikare sheethwani otule aari mmwiili wa mwanawe.

²⁷Ila Yinsa khumuuza yoori: “Owaalikhe khapula aana aje arupale. Khahi yoolotteya othuula phaawu ya aana khuwenkha anapwa.”

²⁸Muukha otule khujipu yoori: “Khweele, Mbwana aka, ila hatha anapwa, annja tathela vathi wa meeza eniwaakwaayo asimaana.

²⁹Aphano ye khumuuza yoori: “Mwaasa wa nanna ojipwiyeezo, weeyo, etta; sheethwani ansaruwa mwanawo.”

³⁰Muukha otule khurutela owawe na khunsikana mwanawe arapaleliye voolili, sheethwani otule anlikhiye.

³¹Elottelanaka, Yinsa khulankha mmuti mphule wa Tiiro na khulokha Sitooni mpakha ntthatta la Kalileya nti wa Tekapoliishi.

³²Aphano khutiiseliwa mwinyi mmote woohisiili na wookukuma, khunvekela yoori anttheele makhono ye.

³³Yinsa khunlazavo vakatthi wa atthu apale awaatta na khunttha zaala omashiilo wawe. Elottelanaka khutthema na khusapa nlimi la mwinyi aya otule.