San Marcos 7:14-33

¹⁴Ipare, “Perio” ehi iri ava rehɨi upe. —Peyapɨsaca, pesenducua tuprɨ che ñehe:

¹⁵Ndahei ocar sui tẽi ou ava recocuer monguɨha ãgua. Ahe rumo osẽ ipɨha sui.

¹⁶Acoi osendu pota vahe che ñehe, toyapɨsacaño sese —ehi.

¹⁷Ipare oseyapase ava, oique oɨ pɨpe. Aheve semimbohe eta oporandu yuvɨreco co porombohesa omombehu vahe rese chupe.

¹⁸Ahe evocoiyase aipo ehi güemimbohe upe: —Evocoiyase pe avei no, ¿ndapesenducuai? ¿Ndapeicuai vo acoi ocar sui oique vahe ava avɨterve nomboangaipai eté?

¹⁹Esepia niha, ndahei ipɨhave oso, ahe rumo oso yavɨterve. Ipare osẽ ichui —ehi ‘opacatu tembihu avɨyeño ité’ oyapave aipo ehi.

²⁰Ipare aipo ehi: —Ava pɨha sui osẽ vahe rumo mbahe, ahe omonguɨha ava recocuer.

²¹Esepia, ava pɨhañemoñetasa sui osẽ pɨhañemoñeta raisa, yemboaguasasa, mondasa, porapichisa,

²²mendasa sui yemboaguasasa, mbahe pota raisa, teco raisa, porombopasa, mbahe tẽi pota raisa, mbahe rese ñemoɨrosa, ava rese ñemoñeta tẽisa, teco ɨvate aisa, pɨhañemoñetasa nihɨvi vahe.

²³Co mbahe opacatu naporai vahe yuvɨnose ava sui imboangaipa uca ãgua —ehi.

²⁴Ichui Jesús osẽ oso tecua Tiro cotɨ. Aheve oique oɨ pɨpe, ndoyecua uca potai ava upe viña; ndoicatui rumo ava sui oñemi.

²⁵Oime cuña vɨreco vahe omembrɨ cuñatai, ahe vɨreco caruguar oyese; ahe cuña oicuase Jesús recosa, oso voi sovai oñenopɨha.

²⁶Ahe rumo ndahei judía, sirofenícia ɨguar ité. Ahe aipo ehi Jesús upe: “Enose che membrɨ sui caruguar” ehi.

²⁷Jesús rumo aipo ehi chupe: —Tahɨr judío rane toipɨsɨ mbahe yuvɨreco. Esepia, naporai yarocua pan tahɨr sui cave tohu imondo ãgua —ehi.

²⁸Co cuña aipo ehi: —Supi eté, che Yar, cave avei rumo ohuño ité pan rahɨcuer ovɨapi vahe tahɨr mesavrɨ pendar —ehi.

²⁹Aipo ihese, aipo ehi: —Avɨye ité nde ñehe. Eyevɨ eso. Caruguar osẽ nde membrɨ sui —ehi chupe.

³⁰Co cuña oyepotase güẽtave, osepia omembrɨ supave; yɨpɨve rumo osẽ caruguar ichui.

³¹Jesús oyevɨ oso Tiro ɨvɨ sui. Ipare osasa Sidón rupi oso, ambuae tecua eta Decápolis ɨvɨ rupi avei. Ichui oyepota ɨpa Galilea ve.

³²Aheve mbɨa ndayapɨsai, iñehe ɨpɨtɨ-pɨtɨ vahe rerasosar: “Emondomi tẽi nde po iharɨve” ehi yuvɨreco chupe.

³³Ichui Jesús vɨraso coi cotɨmi ava sui. Aheve ocuã omonde yapɨsa pɨpe. Ipare omondo güendɨ ñapecu rese.