San Marcos 7:14-33

¹⁴Lahwi tuꞌ yawtenti Comam anma tenanto iscawilal tuꞌ, yalni Comam xin: —Cam txumwelo yin̈ tzet chiwaltiꞌan.

¹⁵Maẍtaj haꞌ tzet chelo chexetanto yul sat Comam Dios, wal xin haꞌ istxꞌojal chitit yul heyanma haꞌ chexetanto yul sat Comam.

¹⁶Maquex cheyabe huneꞌ tiꞌ, akꞌwe heyanma hetxumniloj, ẍi Comam.

¹⁷Lahwi tuꞌ xin, yel Comam Jesús xol anma, isto Comam yul n̈a bayticꞌa aya. Haxa yet ay Comam bey tuꞌ, iskꞌamben ebnaj iscuywom Comam tet: —Mamin, ¿tzet chal yelapno huneꞌ yechel maxawal tuꞌ? ẍi ebnaj.

¹⁸Istakꞌwi Comam: —¿Tom haꞌ hunex mach maxetxum yin̈ tzet mawaltuꞌan? ¿Tom mach chetxumu tato sunil tzet chicolo mach chon̈yetato yul sat Comam Dios,

¹⁹yuto mach yulo janma chiapni, to yul cocꞌul chiapni, lahwi tuꞌ xin cat yel jin̈? ẍi Comam. Haꞌ chal yelapno tuꞌ tato sunil tzet ye tuꞌ cꞌul coloni machi xin chon̈yetato yul sat Comam Dios.

²⁰Yalnipaxo Comam tet ebnaj iscuywom tuꞌ: —Wal xin haꞌ istxꞌojal chitit yul yanma anma haꞌ chietanto yul sat Comam Dios.

²¹Yuto yin̈ yanma anma chipitzcꞌati isnani iswatxꞌen istxꞌojal hacaꞌ yixli, iswinajli, yelkꞌawi, ispotxꞌwahi,

²²maca mohyinaxa cat issayni hunuxa yetbi. Yin̈ yanma tuꞌ chipitzcꞌati yochenico hunu tzet ye tuꞌ yeb sunil istxꞌojal, yeb lekꞌtiꞌal, yeb iskꞌaycanico yin̈ istxꞌojal, yeb ischiwa iscꞌul yin̈ yet anmahil, yeb ishobnican̈ tzotiꞌ, yeb loloꞌal, yeb mach cꞌulo istxumni.

²³Sunil huntekꞌan tuꞌ yul yanma anma chipitzcꞌatij, haꞌ xin chietanto yanma anma yul sat Comam Dios, ẍi Comam.

²⁴Lahwi tuꞌ, isto Comam Jesús yul ismajul con̈ob Tiro. Hayet yapni Comam bey tuꞌ, yocto Comam yul huneꞌ n̈a, machi xin yoche Comam tato chiabelaxiloj, yajaꞌ hunepn̈echꞌan abchalo yu anma tato apni Comam bey tuꞌ.

²⁵Ay xin huneꞌ ix ayco ischejab naj matzwalil yin̈ huneꞌ nichꞌan yunin. Hayet yaben ix ta apni Comam, isto ix iscꞌatan̈ Comam, yay jahno ix sata Comam.

²⁶Huneꞌ ix ix tuꞌ mach Israelo ix, wal xin yul ismajul txꞌotxꞌ sirofenicia ay ix. Iskꞌanni ix tet Comam ta chílo Comam ischejab naj matzwalil ayco yin̈ nichꞌan yunin ix.

²⁷Yajaꞌ takꞌwi Comam tet ix, yalni Comam: —Waꞌojabcano ebnaj uninale babel, yuto mach cꞌuloj ta chiilaxilo tzet chislo ebnaj uninale cat yakꞌlax tet metx txꞌiꞌ, ẍi Comam.

²⁸Yalni ix tet Comam: —Yel Mamin, yajaꞌ metx txꞌiꞌ tuꞌ masanticꞌa chissicꞌcan̈ metx iskꞌal istiꞌ ebnaj uninale chiaycꞌay yalan̈ meẍa, ẍi ix.

²⁹Hayet yaben Comam yalni ix hacaꞌ tuꞌ, yalni Comam tet ix: —Caw haꞌ ye tzet maxawala, chisje hapaxtoj, maelna ischejab naj matzwalil tuꞌ yin̈ hawunin, ẍi Comam.

³⁰Haxa yet yapni ix yatut, hilanto ix nichꞌan tuꞌ sat txꞌat; xaelna ischejab naj matzwalil yin̈ ix.

³¹Lahwi tuꞌ, yel Comam Jesús yul ismajul con̈ob Tiro, isto Comam yul ismajul con̈ob Sidón yeb yulaj con̈ob ayco yul ismajul Decápolis. Lahwi tuꞌ yapnicano Comam istiꞌ haꞌ lago Galilea.

³²Yilaxti huneꞌ naj mach chu yabeni yeb mach chu istzoteli iscꞌatan̈ Comam. Iskꞌanni anma tet Comam tato chayo Comam iskꞌab yiban̈ iswiꞌ naj.

³³Yinilo Comam naj xol anma, yanicto Comam yiximal iskꞌab yul istxiquin naj, lahwi tuꞌ istzublico Comam yin̈ yiximal iskꞌab, yanayo Comam yiban̈ yakꞌ naj.