San Marcos 7:14-33

¹⁴Chiyru gurɨdx Jesús de bniety ax guniiny: —Gulcuadiag ne gulgacbee ni iniia laat.

¹⁵Gati ni rquiinti bniety ná ni run ná bniety bɨnduld sino que pur ni rdiia ruu bniety o ni runza bniety, niy ná ni run ná bniety bɨnduld.

¹⁶Ni rcaaz chané cuend de diidxquɨ, gulcuadiagni.

¹⁷Chi bsáan Jesús de bnietqui, deni biiuny laniuu ax gunabdiidx de xpɨnny laany xi zelo ni guniiny.

¹⁸Chiy raipny laadeb: —¿Ta néza laat quɨt racbeet ni caniia? ¿Ta quɨt gántɨ dec gati ni rquiinti bniety ná ni run ná bniety bɨnduld,

¹⁹te pur ni rquiiny bniety quɨt riabtini láani lazdoob sino que láanbɨy riabni chiyru rdiiani? Ziy xquel gudixtee Jesús dec quɨt náti bniety bɨnduld pur causɨzi comid ni iquiinbɨ.

²⁰Ax raipny laadeb: —Pur causɨ ni rdiia ruu bniety o ni runza bniety ningui run, run bniety duld.

²¹Te pur láani quia bniety zéed iralote de mal xgab, guél ibánydxab cun de saani, guelrbaan, guelrguinxusaa,

²²guelráp stuby nguiu o stuby gunaa, guelrzebylaaz xixte bniety, guelrun de mal, guelrun engany, guelráp de vicy, guelracnalaaz, guelruee dixú, guelnaroo, ne guelrun iraloizru de ni quɨt illiú.

²³Irate de cos malré zéed láani quia bniety ax ninguidey run, run bniety duld.

²⁴Deni bza Jesús ruy ax zégacny nez Tiro ne Sidón, chiy biiuny tuby yuu te pur quɨt rcaaztiny tu niacbee zuguaany ruy. Per quɨt nialeeti nicuatslony.

²⁵Te pur gucbeegac xnan tuby dxapeen, ne dxapeenqui nuu tuby bɨndxab láanby. Ax güe xnanby rut zuguaa Jesús guzullibbɨ lony.

²⁶Ne gati bniety Israelti laab sino que bniety Sirofenicia laab. Chiy baanlasbɨ lo Jesús cuéeny bɨndxabqui láani llindxapeenbɨ.

²⁷Per Jesús raipny laab: —Bsaan iquiinllga de bniiny, te quɨt náti güen idzɨcá bniety guechtily lo lliinni par ideedbɨni de beecu.

²⁸Chiy ax cuaibbɨ: —Guldícbiu, Dad, per de beecu ropacdem de guechtily biu xte de bniiny chi riabni niguét mɨlly.

²⁹Chiyru raipy Jesús laab: —Güenquɨ guniiu. Azelee yiuu, abdiia bɨndxabqui láani llindxaapu.

³⁰Chiy chi bdzɨnbɨ lizbɨ, allindxapeenbɨqui nágaa, per abdiia bɨndxabqui láanby.

³¹Jesús gubíi bdiiany nez Tiro, ax gudeedny nez Sidón ne de guɨdx xte Decápolis ax bdzɨnny ruu nis xte Galilea.

³²Ruy güené de bniety tuby bniety nguiu ni ná cuaat ne quɨtza ruezaactib diidx, chiy gunaabdeb lony izubnaany quiab.

³³Chiyru güené Jesús bnietqui tuby lad ax bzeeny xcuanaany iropte láani diagbɨ ne bguaaldny ludxbɨ cun xɨ́nny.