Luku 22:35-64

³⁵Jisasame dokaita lamaiyoo, “Wamba nambame nyakama pupa lao pituu, ‘Munipi, nokainapi, moko peepi mende namandyuu mee pupape,’ leo dokopa, nyakama pupala opale mende daa joo kateamipi?” lao pisia-pyaa. Dokopa dokaitame baa lamaiyoo, “Naima mende daa nanjoo kateamana,” leami-pyaa.

³⁶Dokopa baame dokaita lamaiyoo, “Mende daa nanjoo kateaminoaka doko, indupa nyakamanya akali mendeme muni pausapi mandipi mende setamo doko tange nyoo pupenge jilyamo. Dee akali mende konjua daa jetamo kandao doko, baanya yonge pee saketa dokome muni nyepala konjua mende sambapenge jilyamoaka.

³⁷Nambame nyakama langilyona, nambanya lao pii pepa pyapae singi dupa angi jina! Pii pepa pyapae singi dokonya dapa lapae silyamo: ‘Mana setapae nepenge akali dupa-pipa baa pyasoo itaki pyatamina,’ lapae silyamo pii doko indupa namba-kisa angi jalanya petelyamona,” lea-pyaa.

³⁸Dokopa dokaitame lao pituu, “Kamongo, konjua lapoma silyamo kanda!” leami-pyaa. Dokopa baame dokaita lamaiyoo, “Kapa lumuna kayalapa!” lea-pyaa.

³⁹Dopa latala Jisasame yuu taono doko yakinatala Olipimanda dokonya pengeliaka pyoo peamopa baanya disaipele dupa awapa peami-pyaa.

⁴⁰Baame yuu dokonya lai petala dokaita lamaiyoo, “Makande pingi dupanya nyakama pao koyatamane lao loma soo kalyepape,” lea-pyaa.

⁴¹Dopa latala baa kuki umbisale yandate pee mendai pyapengeli joo pupala luma lakao dapa lao loma sia-pyaa:

⁴²“Apane, embame namba-kisa kenda pipae silyamo dake nyoo nepakape! Dopaka doko, nambame masilyoli napinya, embame masetenoli pipina,” lea-pyaa.

⁴³Dokopa kaitinya enjele mendeme ipupala baa kyoto injisia-pyaa.

⁴⁴Dopa piamoaka doko, Jisasa baa mona kendame kumapala etete puu lao loma soo kateamopa baa-kisa enaputi piamo doko taiyokome endaki lee kuili pyoo yuunya dopa lea-pyaa.

⁴⁵Dopa piamopa baame loma soo etapala sakatao ipao disaipele dupa kandeamopa, dokaitame baa kandao mona kenda kayapala luu paliuu kateami-pyaa.

⁴⁶Dokopa baame dokaita lamaiyoo, “Nyakama aipuma luu paliuu kalyamipi? Makande pingi dupanya pao koyatamane lao sakatatala loma soo kalyepape,” lea-pyaa.

⁴⁷Jisasame dopa lao dutupa lamaiyoo kateamopa, baanya disaipele kingi ita-kisa dee lapoma dutupanya mende Jutasa lenge dokome akali kambu mende laminao baa wambao epea-pyaa. Baame Jisasa kateamo dosa tengesa ipupala Jisasa nunu pyaanya pia-pyaa.

⁴⁸Dokopa Jisasame baa lamaiyoo, “Jutasa, embame Endakalinya Ikiningi doko yandapipi dupa laitaka pyoo nunu pyaa epelepe?” lea-pyaa.

⁴⁹Dopa lateamopa akali epeamino dokaitame Jisasa-kisa pitamino dupa baanya disaipele awapa kateamino dupame kandatala, “Kamongo, naimame dokaita uaa pepome pokamape?” leami-pyaa.

⁵⁰Dopa latala disaipele mendeme pitisa mupa dokonya kendemane mendenya kale tolae-kaita taka lanya nepea-pyaa.

⁵¹Dopa piamosa Jisasame kandatala, “Kayalapa!” lea-pyaa. Dopa latala akali dokonya kale doko watandateamopa katengeli pyakamaiya-pyaa.

⁵²Dokopa Jisasame pitisa mupapi, losuu anda andake isingi akalipi, Jutamanya isingi akalipi baa anjala epeamino dupa lamaiyoo, “Nyakamame akali pake nao makongao paenge mende anjala epele lao konjuapi kolyepepi dupa minao epelyamipi?

⁵³Koteaka lao namba nyakama-pipa losuu anda andake dokonya katengeaka doko, nyakamame namba anjala nayami. Indupa iminjingi dokome kalai isoo pipenge gii doko ipatelyamona, nyakamame dokonya kalai pyakamaiyepalena,” lea-pyaa.

⁵⁴Jisasame dopa lateamopa dokaitame baa puu lao minatala laminao pitisa mupa dokonya andaka peami-pyaa. Peaminopa Pitame dokaita watao tependale joo pea-pyaa.

⁵⁵Anda kamapisa ita yangatala endakali peteamino dokonya Pita pao konda pia-pyaa.

⁵⁶Dopa petala ita petesa peteamopa kalai pyakamaiyoo petenge enda mendeme baa kandokondape petala lao pituu, “Akali dake Jisasapa awapa katengembana,” lea-pyaa.

⁵⁷Dopa leamopa Pitame tanga lao, “Wanaku! Nambame baa nakandengena,” lea-pyaa.

⁵⁸Dopa lateamopa kuki tendale akali mendeme baa kandatala, “Emba akali dupanya mendeaka lamona,” lea-pyaa. Dopa leamopa Pitame lao pituu, “Akali yaa! Namba dupanya mende daana,” lea-pyaa.

⁵⁹Dee kiloko gii mendai jowapi mende pateamopa, akali mendeme, “Kini etete, baa akali dokopa awapa kateambina, baa Galili tangeakana!” lao kyoto joo lea-pyaa.

⁶⁰Dopa leamopa Pitame baa lamaiyoo, “Akali yaa! Embame pii leleno akali doko namba nakandengena,” lea-pyaa. Dopa leamo awapa yaka pauli pii mende lalu pia-pyaa.

⁶¹Dopa lateamopa Kamongo dokome kapilyetala Pita kandokondape pia-pyaa. Dopa piamopa Kamongome baa kandao, “Indupa kuka gii dakenya yaka pauli pii nalatamopa paa tepomasa embame namba nakandengena laapenona,” leamo pii doko Pitame masia-pyaa.

⁶²Masetala kamaka pupala etete yamataka lao ee lea-pyaa.

⁶³Dokopa Jisasa minatae kateamino akali dupame baa minoko pyoo minakaseta pyapa pyoo kateami-pyaa.

⁶⁴Dokaitame baanya lengelyaapi yaki petala pyao pituu, “Emba pilyamo doko dokome pilyamo lao naima langipi!” leami-pyaa.