Lucas 22:35-64

³⁵G̃ebuje o'jekawẽn wara'acayũ eju―jeweju etaybitbinayũ eju. — Patorõn kug̃'ũm cuk adi õn eymuju, sako kug̃'ũm tak, bolsa kug̃'ũm tak, eyiuk kug̃'ũm tak — io'e. — Irerem tu juk adi epekuku? — io'e. — Ka'ũma. Xipan cuk adi ocekuku — io'e ip.

³⁶— G̃asũ bit — io'e cebe ip — patorõn kug̃ pima juy epetujowat eyekuap tag̃ — io'e. — Sako kug̃ pima juy epetujowat. Payao kug̃'ũm pima juy eyeekabek epeteida ibu am — io'e.

³⁷— Imẽn e'em Deus ekawẽntup―omuwẽg̃aptup: “Ikẽrẽat mug̃ẽg̃ẽ'ukat ẽn,” i napa ma ijodiat e'em Deus emunaẽ be, i. Ibodup ekawẽn tag̃ je'e ip owebe g̃asũ — io'e Jesus.

³⁸— Kariwa, ak'i ece — io'e ip. — Xepxep oceju payao kug̃ — io'e ip. — O'e ma burut — io'e.

³⁹Ibocewi o'jẽm ip jekõnkõnap'a bewi umat'abi bewi. Jesus o'ju co'a kay―Oliveira dip'a kay―cucu'uk osunuyiap'a kay. Ceweju etaybitbinayũ dak o'ju tomuju.

⁴⁰O'jekawẽn ceweju ip yajẽm puje. — Epeyekawẽn cuy Deus eju eywebe ikẽrẽat kukap puxim — io'e.

⁴¹Jesus o'jewerũg̃ jeweju etaybitbinayũ xewi. Bosusu o'ju. Jag̃ẽpũg̃ ma o'e. G̃ebuje Jesus o'jekawẽn Deus eju. Jẽg̃'aecõg̃cõg̃ o'jekawẽn.

⁴²— Bay, ebu'u bima bit ipiat esupi'ajoat g̃u owebe — io'e Deus pe. — Imẽnpit obikuyap tag̃ g̃u juy ece―ebikuyap tag̃ acã — io'e.

⁴³Ibocewi Deus ekawẽn tojotjot'ukat o'kop kabi kadiwi Jesus a'õmucan am.

⁴⁴Big̃ ma ja'õbuyxim o'jekawẽn Deus eju. Jeg̃uycũg̃at pibun ma oe'ũ pin. Topa'adiayey o'e toy buxim, ig̃uycũg̃ cĩcã buye. O'jedopadoyebot ipi ju.

⁴⁵Deus eju jekawẽn epere buje o'ãy. Kirik'ãy. Jeweju etaybitbinayũ kay oajẽm. Jay. Ixexet ma ip o'tobuxik. Ixexet ip jeg̃uycũg̃ap kug̃ ip yobog̃ cĩcã buye.

⁴⁶— Apẽnpuye eyxexet? — io'e. — Epeyewurũg̃ cuy! — io'e cebe ip. — Epeyekawẽn cuy Deus eju eywebe ikẽrẽat kukap puxim — io'e.

⁴⁷Warara'acayũ dak oajẽm Judas eju. Ixe Judas warara'acayũ wap oajẽm jaku Jesus iam imutaybin am ip. Ixe 12 beayũ'in osunuy. Oajẽm Jesus kay Judas. Oajẽm Jesus ag̃obu kõn ãm tobede am.

⁴⁸— Judas — io'e Jesus. — Soat wag̃o õn — io'e. — Wag̃obu kõn tu ẽn oũm ãm okay itakomaayũ be? — io'e.

⁴⁹G̃ebuje Jesus eju etaybitbinayũ itaybit o'e Jesus pum ip iam. — Kariwa, oceyaoka du ip pajam? — io'e ip Jesus pe.

⁵⁰Pũg̃ ixeyũ'in tak paĩyũ kukukat puywatwat'ukat o'sug̃uybu'uk pajam. Tep. Iba'at kadiat g̃uybu o'sug̃uybu'uk.

⁵¹— Imẽn g̃u bit epesop! — io'e Jesus jeweju etaybitbinayũ be. Cay. O'sug̃uybumucay. O'sug̃uybumuwedap. G̃uybudip o'e.

⁵²G̃ebuje Jesus o'jekawẽn Judas ejuayũ eju―paĩyũ kukukayũ eju, Deus eju kawẽnwẽnap'a wiwi'ukayũ kukukayũ eju dak, Judeuyũ kukukayũ eju dak. — Epajẽm odaomũn ãm ibukurukat taomũnap puxim — io'e. — Eyba'ip kukug̃ epajẽm — io'e Jesus.

⁵³— Soat kabia Deus eju kawẽnwẽnap'a be juk adi og̃uy. Epesot g̃u juk adi odaomũn ãm ig̃o'a be bima — io'e. — G̃asũ bit okuk put eywebe eybikuyap tag̃. Eybikuyap tag̃ eyeku but g̃asũ. Kabiokbog̃ tag̃ jekuku'ukayũ kukat ijodiat kukat g̃asũ. Satanás ijodiat kukat g̃asũ. Eyju dak kũyjobit ixe a'õ kay — io'e Jesus.

⁵⁴Judas ejuayũ Jesus o'jat. O'tujowat ip paĩyũ kukukat duk'a kay. Pedro dak o'ju Jesus nomuju. Wũy ma oeku Jesus nomuju. Oajẽm ip.

⁵⁵G̃ebuje daxa o'g̃usop ip paĩyũ kukat tuk'a xe, uk'a ekorara be. Oabikbik ip daxa etako be. Pedro xik'i o'e ixeyũ parakpe.

⁵⁶G̃ebuje ayacat Pedro o'jojojo―yaypan'isuat―paĩyũ kukukat puywatwat'ukat. O'jojojo Pedro daxa ekabia dag̃ puye. O'jeak cekay. — Ixe dak Jesus eju oeku — io'e ixe ayacat.

⁵⁷— Ka'ũma — Pedro bit o'e napa ma. — Tũ'ũ, ixe bure g̃u õn — io'e napa ma jebuap puxim.

⁵⁸Wara'acat Pedro o'jojojo ibun'ũm pima ag̃okatkat. — Ẽn tak ejeku Jesus eju — io'e cebe. — Ka'ũma — Pedro o'e. — Jekukum g̃u õn ceweju. Ojeku g̃u õn pit ceweju — io'e napa ma.

⁵⁹Pũg̃ hora kap puje, wara'acat o'jekawẽn. — Icẽmãn ẽn ma Jesus eju ejeku — io'e. — Galiléia eipi bewiat ẽn — io'e Pedro be.

⁶⁰— Tapu — Pedro bit o'e. — Wetaybit g̃u apẽn ẽn e'em iam — io'e napa ma. — Ixe bure g̃u õn pit — io'e napa ma. Sapokay o'jede iboam i'e buje. Kariwa Jesus o'jekorepẽn.

⁶¹G̃ebuje o'jeak Pedro kay. Pedro dak o'jeg̃ebu Jesus a'õ kay―kuy bimaap a'õ kay. — Ebapũg̃ em napa ma ece'e “Jesus bure g̃u õn,” i — i juk o'e Jesus Pedro be.

⁶²Kacũg̃ kay Pedro o'ju. Jesus bure g̃u õn iap kay o'jeg̃ebu. Imẽnpuye o'tõn cĩcã.

⁶³Iwiwi'ukayũ Jesus o'jowayway―o'jat'iayũ. Jesus o'g̃upokupok ip.

⁶⁴Jesus eta o'sutamuekabek ip pag̃õm. — Abu emupok exe? — io'e ip cebe iwaywayway am.