Luk 22:35-64

³⁵Goio, e Iesus veia giteu mago “Pala mugati, eau baha taro amutou, eau mera taro amutou te la ilabi la uati, me la kela me la silipa te la tuluga tamutou. Mave, te la imamalale, amuto savele isa la paga?” Tio, egite goio veiala mago “Ouka.”

³⁶Goio, eia solo lou la vikararala tetala soio tegiteu mago “Eala moli te la imamala ale igoie, mai eme tahola la uati ilua, eme ge abia te la tuluga taume. Mai tai lou ele, la kela. Mai eme la viso ouka, eme ge sugu taro la lavalava taume, eme ge abiamu ilua la uati ovola, ge loto hari moliamu la viso ge igo la toromu.

³⁷Ale eau tutu tatolea mutou mai ele, la vuhula la merera te Aisaia te La Buk Tabu Ale Pala, eia ge puru somai taku, ale eia veia maie: La Riau te La Tahalo Uru, egite kakauala veia eia la tahalo la pakalila. La merera tomi te La Buk Tabu Ale Pala ale koramuliau, eia hagagaviti ge puru.”

³⁸Tio, egite loloa mai ele, egite goio veiala mago “Tahalo Uru, male, la viso ilua omaie!” Eala moli e Iesus goio baoli rivua giteu mago “Eia korati ele!”

³⁹Goio, e Iesus miteu me la valalua la vimari tetala, egite hiliti taro e Ierusalem te la maulavi, egite goio la gove e Oliva mai la vulovulo giteu ele.

⁴⁰Egite goio guvi ovola, eia veia giteu mago “Taritigi amuto ge kaka gogogo La Tahalo Uru veia amuto ge vulo taro tomi egiteu la tovolalaila ale ge sibitala tavu amutou.”

⁴¹Goio, eia goio tasuku gale taro egiteu bakisi soio, eia goio toto tulu, eia goio kaka maie

⁴²“Tete, mai eme masagea, eme ge abi taro leau la igogolu taku ele. Eala moli eau kama ge tilimuli la masasagala taku, eau ge tilimuli moli la masasagala taume sekela.”

⁴³Goio e angelo isasa sibitala tavua, eia guvi loata mai ele veia ge siobua.

⁴⁴Eala moli e Iesus goio ilo buruko sesele, eia goio kaka vagari lou, la maholola pusi soa tola, eia saisali sotalo la magasa mai la silali la kasoso sesele.

⁴⁵Eia goio kaka kaluvu, eia hiliti, eia goio beua soio tegiteu la valalua la vimari tetala, eia hilo egiteu oio mamavuta moli, la mata giteu tabibi la iloburukola tegiteu soio tetala.

⁴⁶Eia goio palo egiteu, eia goio tahi egiteu mago “Amuto mavuta ilava? Amuto hiliti! Amuto ge kaka vagari veia amuto ge vulo taro la tovolalaila ale ge sibitala tavu amutou gageie!”

⁴⁷E Iesus so vikarakara soio tegiteu la valalua la vimari tetala, la valalua la gima usu sibitala tavua, e Iudas eia muga egiteu. Ale e Iudas moli, ale isa tegiteu la valalua te Iesus ale savulusa gete lua. Goio, eia hari tavu e Iesus veia ge lao roboa,

⁴⁸eala moli e Iesus goio tahia mago “Iudas, eme veia ge lao robo golo moliau veia eme ge sugu taro e Latu La Tahalo soio tegiteu la valalua la gima, ia!”

⁴⁹Tio, egiteu la valalua la vimari tetala, egite hiloa mai ele veia egite ge lao tola e Iesus, egite goio tahia mago “Mave, Tahalo Uru, eme masagea veia amite ge kolime, ge vaubi robomei?”

⁵⁰Goio, isa tegiteu hiliti, eia goio barautu la gavusa la tahalo isasa oio te la galela e gata, eia la bilalaha te la mulugaluga tegiteu e pris.

⁵¹Eala moli e Iesus hiloa mai ele, eia veia giteu mago “Umalati!” Eia goio sau te la gavusa la tahalole, la gavusala goio taritigi tataho lou.

⁵²Goio, e Iesus vulo gele tavu egiteu la mulugaluga tegiteu e pris, me egiteu la mulugaluga tegiteu la valalua ale tala robo la luma la lotu, me egiteu la ururu, egite tomi ele ale guvi veia ge lao tolea, eia goio tahi egiteu mago “Mave, amuto soioge veia eau la tahalo la pakalila, ia, ale amuto guviti omai la lima mutou la voviso me la obobu veia ge kue leau?

⁵³Eau pou kabili tamutou oio te la luma la lotu la haroharo tomi, amuto kama masaga ge lao toleau. Eala moli ale la paga logoti, eia koramuli amuto ge lao toleau ovola, la vuhula la maligoma sibitala vagariti.”

⁵⁴Egiteu goio lao tolea, lapua soio te la luma te la mulugaluga tegiteu e pris. E Pita mulimuli tatau moliale Iesus miteu ebikoka.

⁵⁵La valalua isahari, egite isuti la havi isa uru oio te la mata la luma, egite pou malululu, e Pita goio vipou tomi legiteu.

⁵⁶La sobe isa bisi, eia la bilalaha, eia hiloa popou ele, eia goio tabatitiroa, eia goio veia giteu mago “La tahalo tai aleie ge, eia tai tilimulimuli e Iesus!”

⁵⁷Eala moli e Pita goio giriri, eia veiala mago “Eme la tavile bisi ele, eme makovu, eau kama rovi la tahalo alele!”

⁵⁸Goio, eia kama tabaa, isa lou loio goio hilo loua, eia veiala mago “Eme tai ele, amuto me Iesus.” Eala moli e Pita veiala mago “Ae, emei ele, eau ouka sesele oio te Iesus ele.”

⁵⁹Goio, tabaa moli bakisi, la tahalo isa lou loio, eia goio vei vagaria giteu ale popou ele, mago “La tahalo ale, eia isa sesele tegiteu ele. Hiloa, eia la tau Galilea.”

⁶⁰Eala moli e Pita goio baoli rivuala soio mago “Ko, tabaragu, eau kama rovi gologolo la paga ale eme veveiale.” Tio oio moli ovolale, eia so vikarakara, e kukureko goio tali,

⁶¹e Iesus goio vulo gele tavua loio, eia mata tavu vagari molia mai ele. Tio e Pita goio gabutatala rivu loua mai ele la vikararala ale La Uru veitiala mago “Gageie, e kukureko soukama ge tali, eme ge tahi tarotiau vaka tolu.”

⁶²Tio eia gabutatala mai ele, eia goio hele sogala, e maura goio tali pepeho seseletio.

⁶³Goio, egiteu la valalua ale tala tavu e Iesus, egite pigi malikiala, egite lubi vulo taia.

⁶⁴Egite kisi robo la matala la lavalava, egite goio tahia mago “Ioge, eme la bilalaha te La Uru, eme ge veia miteu veia ere tahalo sesele ale kuetimei ele?”