LUCAS 22:35-64

³⁵Zhich guin wnabdiiz Jesus lo men yra men, re Ne: ―Chene wxaal noo de yra de sin bols, sin med, sin gyël, ¿pe nuu ne wak falt lo de? Wke men re men: ―Bettee.

³⁶Lex re Ne lo men: ―Orrenaa, log mén ne rap bols, gweey meno no sen men med; log mén ne yëten spad, ytoo men lër ne rrël men, yka men tebo.

³⁷Porke yna noo lo de yra de ne rap noo degne sak noo ne zëëd lo xgyiich Dëdyuzh ledne re: “Wun mén men kwent lad menmal.” Per yrandxee ne ka lo xgyiich Dëdyuzh ne sak noo, rapo degne gako.

³⁸Orguin re men lo Ne: ―Dechey, nee neey noo txup spad. Wke Ne re Ne: ―Negwaguestee.

³⁹Zhich guin wruu Jesus, za Ne gyey-Olivos zegnak xkoxtumber Ne. Lex zanal yra xpén Ne Ne.

⁴⁰Chene wdxiin Ne nga, re Ne lo yra xpén Ne: ―Gunab lo Dëdyuzh, chen ysegyeedet Bzelo lextoo de.

⁴¹Orguin wrunsu Ne lo men yra men, wa Ne zeg medid ne rtxoon mén te gye. Lex wzuzhib Ne nga, wnab Ne lo Dëdyuzh.

⁴²Re Ne: ―Dëde, belne yna de, guselaa noo lo gyelenlesree; per gakdet zegne rlaan noo, sinke zegne rlaan de.

⁴³Orguin wlalo te angel ne wruu gyeybaa, wdee angel fwers lo Ne.

⁴⁴Per por tant nles nuu lextoo Ne, mazre rnab Ne lo Dëdyuzh ydebxfwers Ne, no axtegue lyu ryab nis ne rzenisen Ne; nak nis guin zegnak tebgyese tebgyese ren.

⁴⁵Chene wzuli Ne ne wluzh wnab Ne lo Dëdyuzh, wa Ne ledne ndxin xpén Ne. Wdxiin Ne, le men ndxinguees, tant nles nuu lextoo men.

⁴⁶Lex re Ne lo men: ―¿Penak ndxinguees de? Gutsaxee, gunab lo Dëdyuzh, chen ysegyeedet Bzelo lextoo de.

⁴⁷Benak kanii Jesus chene wdxiin ndalyaa mén. Men ne la Judas te ke men ne nak xpén Ne chibtxup zaner lo men yra men, lex wbig Judas lo Ne, woo Judas te bzhid gyedkwes Ne.

⁴⁸Lex re Ne lo Judas: ―Judas, ¿pe kon te bzhid ydekwent de Men ne wdxiid wak Mén?

⁴⁹Chene wii yra men ne ndxinno Ne neguin ne kayak, re men lo Ne: ―Dechey, ¿pe skyits noo spad?

⁵⁰Orguin wkyits te men guin xespad men gyedyagbëë xmos fxuz ne mazre nondee, wtxugnëz meno.

⁵¹Per re Ne lo men: ―Zeka men; che we naa. Lex wtee nya Ne gyedyag mén guin, wkyeed ke No zegnako.

⁵²Zhich guin re Ne lo yra fxuz ne rnebééy lo yra fxuz no le lo men ne rnebééy lo men ne rapkwent xeydoo Dëdyuzh no le lo men ne rnebééy lo men-Israel ne zaxii Ne: ―¿Penak zëëd de zëdnëëz de noo kon spad, kon yag, zeg teleg ngbaan nak noo?

⁵³No yzaandxee dxe wzu noo lenxeydoo Dëdyuzh, wnëëzdet de noo; per laa xor de nee yra de ne gun Bzelo gan ynebééy Bzelo lo de.

⁵⁴Orguin wnëëz men Jesus yra men, lex wano men Ne ruxyuu fxuz ne mazre nondee. Le Bëd zanal Ne nat nat.

⁵⁵Nga wzuul mén gyi gwrooltee lo leey, lex wzob men kbii gyi, no Bëd wa wzob lad men yra men.

⁵⁶Chene wii te wnaa ne rlaa dxiin nga ne zob Bëd lo gyi, rwii men lo Bëd, lex re men: ―No ménree nak xpén Jesus.

⁵⁷Per wkedxnruu Bëd, re Bëd: ―Wnaae, axtegue rnebeeydet noo mén gwa.

⁵⁸Orsegue wako, wii men ste men ne zob Bëd, lex re men lo Bëd: ―¿No de nak te xpén men gwa ye? Wke Bëd, re Bëd: ―Let nodet noo.

⁵⁹Wako zeg ste or, re men ste men: ―Nlipee ne no ménree nak te xpén Jesus, porke no men nak men-Galilea.

⁶⁰Lex re Bëd lo men: ―Nandet noo gan pe rnii de. Orke guin ne benak kanii Bëd, wkarëz te ngyedgol.

⁶¹Lex wcheree lo Jesus wii Ne lo Bëd. Orguin wnileedx Bëd ne re Ne lo Bëd: “Negyëëlkeree, antes ne ykarëz ngyedgol, che wyon tir wkedxnruu de ne rnebeey de noo.”

⁶²Lex wruu Bëd nga; baanske woon Bëd.

⁶³Yra mén ne ndxinnap Jesus, wzelo men rzhidxno men Ne no wdee men xkwent Ne.

⁶⁴Wtsëë men bzalo Ne no rdee men xkwent Ne, lex re men lo Ne: ―¿Txu rniiz xkwent de gan?