Luke 22:35-64

³⁵Me ga’ar Jesus ngorad, “Fare ngiyal’ i n’en ni gu l’oegmed ngu’um marod i yan nda mfeked tafen e salpiy, nge tutuw, ara sus, e bay ban’en ni m’ay romed fa?” Miyad fulweg ngak ni lungurad, “Dariy ban’en ni m’ay romed.”

³⁶Me ga’ar Jesus, “Machane chiney e en ni bay tafen e salpiy rok ara ba tutuw e thangri fek; ma en ndariy e saydon rok e thangri pi’ wuru’ e mad rok ni chuway’ nge fek e salpiy riy nge chuw’iy reb ngay.

³⁷Ya nggog ngomed ni fa gin’en ni bay u lan e babyor nib thothup ni fa’ani be ga’ar, ‘Min uneg fa’anem nga fithik’ e pi’in kar th’abed e motochiyel,’ e thangri yib i m’ug nib riyul’ u murung’ageg. Ya n’en nni yoloy ni murung’ageg e bay yib i m’ug nib riyul’.”

³⁸Me ga’ar pi gachalpen, “Somol, a mu sap! l’agruw e saydon ni ba’aray!” Me fulweg ngorad ni ga’ar, “Ke yag!”

³⁹Me sak’iy Jesus nge yan ko burey nu Olive ni kmarin’; me un pi gachalpen ngak ngranod.

⁴⁰Ma fa’an rabad ko fa gin’em me ga’ar ngorad, “Mu meybilgad ngak Got nge siy mpaged gimed ngak e pin’en nma pingeg e girdi’ nge denen.”

⁴¹Ma aram me yan rorad nga orel ni bod pal’afngin ba malang nnin’, me yan i ragbug nga but’ nge meybil.

⁴²Me ga’ar, “Chitamag, fa’anra mm’agan’um ngay ma ga fek e re kap ney ngam chuweg rog. Machane gathi tin nib m’agan’ug ngay e ngam rin’, ya tin nib m’agan’um ngay.”

⁴³Me yib ba engel nu tharmiy i m’ug ngak nge pi’ gelngin.

⁴⁴U fithik’ e re thamtham nem ni tay ni gowa kan chuchuy nga but’ e ri tay ir riy ko meybil; ma athuw u downgin e bod yu mey i racha’ ni be map’ nga but’.

⁴⁵Ma fa’ani mu’ ko meybil, me sul ngak pi gachalpen me pir’egrad ni yad be mol, ni bochan e taganan’ rorad ni kayigi ga’.

⁴⁶Me ga’ar ngorad, “Mang ni gimed be mol? Mu odgad ngam meybilgad ngak Got nge siy mpaged gimed ngak e pin’en nma pingeg e girdi’ nge denen.”

⁴⁷Ka be welthin me taw ba ulung i girdi’; ni Judas, ni ir reb fare ragag nge l’agruw i gachalpen e bay ngam’on ni be pow’iy fapi girdi’, me yib ngak Jesus ni aram e nge faray owchen.

⁴⁸Machane me ga’ar Jesus, “Judas, kam finey ni ba faray owchef e ngam yagnag e en ni Fak e Girdi’ ngay?”

⁴⁹Ma fa’ani guy e tin ni gachalpen Jesus ni yad bay rok ni aram rogon e n’en ni ngan rin’, me lungurad, “Somol, rayag ni gu li’ed yad ko saydon romad fa?”

⁵⁰Me toy bagayad e sib rok fare Prist ni Th’abi Ga’ nge luf e ba’ ni mat’aw i yuwan tel.

⁵¹Me fulweg Jesus ni ga’ar, “Ke yag!” Me math Jesus nga yuwan tel fa’anem nge faseg.

⁵²Me ga’ar Jesus ngak e pi tolang ko prist nge pi pilungen matnagen e Tempel nge pi’in pi’ilal ni karbad ngaram ni ngar feked Jesus, “Mang ni kambad ni kam feked e saydon nge gul, ni gowa gag be’ ni kug th’ab e motochiyel?

⁵³Ug moy romed u lan e Tempel ni gubin e rran, ma da mu guyed rogon ni ngam koled gag. Machane re awa ney e gimed nge gelngin e lumor e ke milfan ngomed.”

⁵⁴Miyad kol Jesus ngar feked ngalan e naun rok fare Prist ni Th’abi Ga’; me un Peter u daken nib mal’af rok nga tomur.

⁵⁵Ma bay ba nifiy ni kan ko’reg u lulukngun lan e yoror, me yan i ma’athuk Peter nga fithik’ e pi’in kar longobiyed ni kar pired nga but’.

⁵⁶Ma fa’ani guy reb fapi bpin ni tapigpig Peter nike par u rom nga but’ u to’oben e nifiy, me changar ngak me ga’ar, “Ku errogon e re mo’on ney ni i un ngak!”

⁵⁷Machane me mithag Peter ni aram rogon ni ga’ar, “Bpin, i mus nga owchen ma da gu nang!”

⁵⁸Ma fa’ani n’uw nap’an boch, me changar be’ nib mo’on me guy Peter me ga’ar, “Ku errogon gur ni gur bagayad!” Machane me fulweg Peter ni ga’ar, “Gathi gag!”

⁵⁹Ma gonap’an reb e awa nga tomur riy me yog reb e mo’on nri be ga’ar, “Kari muduwgil nre mo’on ney e immoy rok, ya ku ir be’ u Galile!”

⁶⁰Machane me fulweg Peter ngak facha’ ni ga’ar, “Da gu nang e n’en ni ga be weliy murung’agen.” Ka chingiyal’ nem ni ka be welthin, me chochol ba nimen.

⁶¹Me cheal Somol u yuwan nge changar ngak Peter, me yib e thin rok Somol ngan’ Peter, nge rogon ni yog ni ga’ar, “Ra dawori chochol e nimen e daba’, ma dalip yay ni bay mog nda mu nangeg.”

⁶²Me yan Peter nga wuru’ e yoror ngi i yor ni kari kireban’.

⁶³Ma fapi pumo’on ni yad be matnagiy Jesus e ur moninggad ngak ma yad be toy.

⁶⁴Miyad m’ag e mad nga owchen mu ur fithed ni lungurad, “Mog ko mini’ e ke bat nigem!”