ᤗᤢᤁᤠ 22:35-64

³⁵ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤡᤏᤡ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤛᤢ᤺ᤰᤘᤠ. ᤛᤠᤒᤪᤡ ᤏᤢ ᤗᤠᤱᤛᤢ᤺ᤵ ᤌᤣᤀᤠᤱ ᤔᤧ᤺ᤴᤏᤣ ᤐᤠᤱᤏᤡᤱᤅᤡᤸᤗᤧ ᤂᤡᤏᤡ᤹ ᤁᤧᤛᤠᤰᤐᤥ ᤁᤧᤎᤩᤧ᤹ᤀᤡᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤔᤧᤎᤩᤧ᤹ᤀᤡᤃᤧᤴᤗᤥ॥”

³⁶ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤖ ᤀᤠᤸᤗᤥ ᤂᤡᤏᤡ᤹ ᤛᤢ᤺ᤰᤘᤠ ᤛᤠᤒᤪᤡᤜᤠ᤹ ᤕᤠᤱᤛᤡᤱᤅᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤋᤠᤓᤣ᤺ᤴ ᤔᤧᤱᤃᤵᤔᤏᤠᤒᤠᤸᤗᤧ ᤜᤠᤖᤠ᤹ ᤁᤢᤛᤢᤱᤄᤧ᤹ᤘᤠ᤺ᤴ ᤛᤱᤄᤢᤀᤠᤱ ᤗᤳᤌᤡᤰ ᤋᤠᤓᤣᤎᤡᤰᤁᤠᤱ ᤀᤡᤅᤢᤖᤖᤥ॥

³⁷ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤂᤢᤏᤧ᤹ᤃ ᤜᤠᤱᤒᤡᤑᤩᤢᤱᤒᤠᤜᤠ᤹ᤏᤢ ᤔᤧᤍᤱᤄᤢᤖᤥ॥’ ᤁᤴ ᤐᤠ᤺ᤴᤏᤡᤴ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤥ ᤀᤡᤱᤃᤠ᤹ ᤀᤠᤔᤧᤴᤏᤥ ᤛᤠᤵᤋᤧᤀᤠᤱ ᤐᤵᤐᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤁᤧᤳᤗᤥ॥”

³⁸ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤧ ᤏᤧᤳᤇᤡ ᤋᤠᤓᤣ ᤁᤳᤋᤢᤶᤒᤧᤖᤥ॥” ᤕᤧᤛᤢᤖᤧ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤶᤔᤩᤠᤰᤁᤠᤱ ᤐᤥ᤺ᤱᤗᤥ॥”

³⁹ᤜᤧᤰᤁᤩᤠᤱ ᤕᤧᤛᤢ᤺ᤴ ᤌᤥ᤺ᤛ᤻ᤔᤠ ᤕᤠᤰᤑᤠᤱᤅᤥᤏᤢ ᤗ᤺ᤴᤍᤧᤀᤠᤱ ᤛᤍᤠᤍᤡᤱ ᤜᤧᤰᤁᤣ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤔᤧᤒᤣᤖᤥ॥

⁴⁰ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥”

⁴¹ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ.

⁴²“ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠ᤺ᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣ᤺ᤛᤧ᤹ᤀᤥ॥ ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤧ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥ᤺ᤱᤗᤖᤥ॥”

⁴³((ᤜᤧᤰᤁᤩᤠᤱ ᤂᤧᤵᤔᤥ ᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤌᤠ᤺ᤶᤛᤡᤱᤅᤠᤱ ᤂᤢᤏᤧ᤹ ᤁᤢᤓᤠ᤹ ᤐᤡᤖᤢᤖᤥ॥

⁴⁴ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤛᤠᤶᤃᤧᤴ ᤏᤡᤱᤘᤠ᤹ᤖᤧ ᤏᤠᤕᤥ ᤐᤥ᤺ᤰᤂᤧᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤖᤢᤀᤠᤱ ᤋᤢᤘᤠ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠ᤺ᤶᤒᤪᤡᤰᤘᤠ᤺ᤴ ᤕᤶᤒ᤻ ᤕᤶᤒᤠ ᤔᤠᤰᤂᤡ᤹ ᤋᤧᤵᤐᤰᤘᤠ ᤁᤢᤀᤡᤛᤡ᤺ᤰ ᤂᤠᤶᤔᤥ ᤔᤰᤌᤩᤧᤖᤥ॥))

⁴⁵ᤕᤧᤛᤢ᤺ᤴ ᤋᤢᤘᤠᤀᤥᤗᤠᤶ ᤐᤥᤃᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤕᤢᤅᤧᤒᤠ ᤋᤧᤴᤏᤥ ᤐᤣ॥ ᤂᤧᤱᤜᤠ᤹ ᤁᤧᤖᤧᤰ ᤔᤡᤱᤘᤠ᤺ᤸᤗᤧ ᤔᤧᤏᤠ᤺ᤛᤧᤀᤠᤱ ᤔᤧᤀᤡᤵᤛᤧᤒᤠ ᤋᤢᤔᤢᤛᤡ॥

⁴⁶ᤂᤧᤱᤜᤠ᤹ ᤑᤥ᤺ᤰᤂᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤌᤣᤀᤠᤱ ᤁᤧᤀᤡᤵᤛᤡᤖ ᤁᤧᤏᤧᤛ᤻ᤛᤡᤒᤠᤒᤣ᥅ ᤐᤥᤃᤧᤶᤔᤧ᤹ᤀᤠᤱ ᤜᤱᤛᤠ᤹ᤔᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹॥”

⁴⁷ᤁᤖ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤖ ᤐᤳᤇᤧᤸᤗᤧᤛᤠ. ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤗᤳᤇᤠ ᤕᤜᤢᤍᤠ ᤔᤧᤵᤔᤏᤠᤒᤧᤸᤗᤧ ᤔᤏᤠᤜᤠ᤹ ᤗᤠᤶᤗᤥᤛᤢᤛᤡᤖ ᤂᤧᤵᤔᤥ ᤋᤠᤖᤢᤛᤡ॥ ᤜᤧᤰᤁᤩᤠᤱ ᤕᤧᤛᤢ᤺ᤴ ᤆᤢᤵ ᤔᤧᤵᤔᤠᤀᤠᤱ ᤛᤣᤘᤠ ᤔᤧᤳᤇᤧ ᤁᤢᤒᤣᤛᤠᤱ ᤐᤣ॥

⁴⁸ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤕᤜᤢᤍᤠᤀᤣ. ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤆᤢᤵ ᤁᤧᤔᤧᤳᤋᤠᤀᤠᤱ ᤂᤧᤏᤧ᤹ ᤀᤡᤱᤃᤧᤗᤧᤰᤁᤠᤒᤠᤒᤡ᥅”

⁴⁹ᤜᤧᤰᤁᤩᤠᤱ ᤀᤠᤸᤗ ᤂᤧᤵᤔᤥ ᤌᤣ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤸᤗᤥ ᤀᤠᤏᤡᤃᤧ ᤋᤠᤓᤣ᤺ᤸᤗᤧ ᤁᤱᤜᤠ᤹ ᤆᤧᤵᤳᤋᤢᤶᤛᤡᤶᤒᤧ᤹ᤒᤡ᥅”

⁵⁰ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤌᤡᤰᤁᤡᤸᤗᤧᤃ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤒᤠᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥

⁵¹ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤏᤠ᤹ᤖᤧᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤛᤢ᤺ᤛᤢᤀᤠᤱ ᤏᤢᤛᤢᤖᤥ॥

⁵²ᤜᤧᤰᤁᤩᤠᤱ ᤕᤧᤛᤢᤖᤧ ᤂᤢᤏᤧ᤹ ᤁᤢᤍᤧᤶᤛᤧ ᤁᤧᤍᤠ᤺ᤒᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤔᤠᤱᤜᤡᤶ ᤁᤧᤃᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣᤏᤢ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅

⁵³ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ. ᤁᤖ ᤂᤠᤍᤠᤶᤔᤠ ᤔᤢᤰᤛᤠᤶᤔᤡᤸᤗᤧ ᤕᤢᤰᤋᤢᤸᤗᤧᤀᤣ ᤂᤡᤏᤡ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤶ ᤐᤥ᤺ᤱᤗᤥ॥”

⁵⁴ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢ॥ ᤐᤋᤪᤢᤛᤧᤴᤏᤠᤱ ᤔᤠ᤺ᤱᤄᤠᤗᤠᤶ ᤂᤧᤱᤜᤠ᤹ ᤋᤡᤶᤍᤢᤛᤡᤖ ᤂᤧᤵᤔᤥ ᤋᤩᤧᤖᤥ॥

⁵⁵ᤂᤧᤱᤜᤠ᤹ᤖᤧ ᤗᤰᤂᤢᤶᤗᤢᤶᤔᤥ ᤔᤡ ᤔᤧᤍᤢᤵᤋᤢᤀᤠᤱ ᤔᤡᤈᤠ᤹ᤏᤢ ᤔᤧᤕᤢᤅᤧᤸᤗᤧ ᤐᤋᤪᤢᤛᤧᤴᤏᤠᤱ ᤂᤢᤏᤡ᤹ ᤗᤢᤶᤔᤥ ᤐᤣᤀᤠᤱ ᤕᤢᤱᤛᤡᤱ॥

⁵⁶ᤜᤧᤰᤁᤩᤠᤱ ᤂᤧᤵᤔᤥ ᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰᤗᤧ ᤂᤢᤏᤧ᤹ ᤂᤠᤃᤧᤀᤥ᤺ᤵᤐᤠᤀᤥ ᤕᤢᤅᤧᤸᤗᤧ ᤏᤢ᤺ᤖᤡᤰ ᤀᤥᤔᤧᤳᤋᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤴ ᤔᤏᤠ᤺ᤴᤏᤠᤱ ᤕᤧᤛᤢ᤺ᤴᤏᤢᤀᤣ ᤘᤕᤧᤒᤠ ᤜᤧᤰᤁᤣ ᤗ᤹ᤖᤥ॥”

⁵⁷ᤁᤖ ᤐᤋᤪᤢᤛᤖᤧ ᤂᤧᤴ ᤏᤠ᤹ᤖᤢᤖ ᤔᤧᤳᤋᤢ. “ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤌᤣ᤺ᤴᤏᤧ ᤐᤠ᤺ᤳᤋᤢᤒᤣ᥅ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ॥”

⁵⁸ᤛᤵᤑᤠ ᤀᤣᤃᤠᤱ ᤘᤣ᤹ᤛ᤻ᤔᤠ ᤌᤡᤰᤗᤧ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ᤃ ᤂᤧᤱᤜᤠ᤹ᤏᤢᤀᤣ ᤁᤧᤘᤕᤧᤖᤥ॥” ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤧ᤺ᤴᤗᤥ. ᤀᤡᤱᤃᤠ᤹ᤃ ᤔᤧᤘᤕᤠᤱᤅᤡᤴᤗᤥ᥄”

⁵⁹ᤕᤠᤱᤛᤡ ᤁᤢᤔᤢᤰ ᤌᤡᤰ ᤀᤣᤃᤠᤱ ᤁᤢᤓᤠᤎᤡᤰᤗᤧ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤂᤢᤏᤧ᤹ᤃ ᤕᤧᤛᤢ᤺ᤴᤏᤢᤀᤣ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤃᤠᤗᤡᤗᤗᤠᤶ ᤁᤧᤍᤠ᤺ᤒᤠᤖᤥ॥”

⁶⁰ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤧ᤺ᤶᤒᤧ ᤜᤦ᥄ ᤌᤧᤔᤠᤏᤡ ᤁᤧᤒᤠ᤺ᤳᤋᤢᤒᤣ᥅ ᤀᤡᤱᤃᤠ᤹ᤃ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤴᤗᤥ॥” ᤂᤡᤔᤥ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤀᤡᤱᤘᤠ᤺ᤴ ᤁᤠ᤺ᤛᤧ॥

⁶¹ᤕᤧᤛᤢᤖᤧ ᤂᤡᤖᤡ ᤜᤡᤛᤡᤱᤅᤠᤱ ᤐᤋᤪᤢᤛᤧᤴ ᤀᤥᤔᤧᤳᤋᤢ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ. “ᤀᤠᤀᤡᤴ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ” ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤐᤋᤪᤢᤛᤖᤧ ᤁᤢᤏᤡᤱᤘᤠ᤹ ᤛᤢᤶ ᤗ᤹ᤖᤧ॥

⁶²ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤰᤂᤢᤶᤔᤥᤏᤢ ᤗ᤺ᤴᤍᤧᤐᤣᤀᤠᤱ ᤀᤢ᤺ᤰᤁᤠᤱ-ᤀᤢ᤺ᤰ ᤜᤠᤒᤧᤖᤥ॥

⁶³ᤀᤠᤸᤗ ᤕᤧᤛᤢ᤺ᤴ ᤁᤧᤃᤥ᤺ᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤔᤠ ᤔᤧᤜᤣ᤺ᤰᤋᤢᤖ ᤔᤧᤜᤡᤵᤋᤢ॥

⁶⁴ᤁᤢᤔᤡᤰᤁᤡᤴ ᤋᤣ᤺ᤳᤋᤡᤸᤗᤧ ᤔᤧᤍᤧᤵᤋᤢᤖ ᤔᤧᤜᤡᤵᤋᤢᤀᤠᤱ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤜᤠ᤺ᤳᤗᤧ ᤁᤧᤜᤡᤵᤋᤧᤒᤣ᥅ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤧ᤹ᤀᤥ᥄”