Luka 22:35-64

³⁵Go Jesu kêsôm gêdêŋ êsêac gebe “Gêdêŋ taŋ kasakiŋ amac aja akôc awa kêsêp ômbiŋkap ŋaatali ma abic atali to asô atapa atom naŋ, gêŋ teŋ gêjô amac me masi.” Ma êsêac sêjô eŋ awa gebe “Masianô, gêŋ teŋ gêjô aêac atom.”

³⁶Tec eŋ kêsôm gêdêŋ êsêac gebe “Mago galoc amboac teŋ. Ŋac taŋ nê awa to atali gêc naŋ, êkôc gêŋ tau. Ma ŋac taŋ kêkôc siŋ atom naŋ, êkêŋ nê ŋakwê êndêŋ lau sênam ôli ma êkôc ŋaawa naênam ôli siŋ teŋ.

³⁷Ma aê jasôm êndêŋ amac gebe Biŋ taŋ teto amboac tonec naŋ, oc êtu tôŋ êpi aê gebe ‘Sêsam eŋ gêwiŋ kêjaŋgowaga.’ Biŋ taŋ teto kêpi aê naŋ, oc ŋanô êsa.”

³⁸Ma êsêac sêsôm gebe “Apômtau, alic acgom, siŋ luagêc tec gêc.” Go eŋ kêsôm gêdêŋ êsêac gebe “Kêtôm su.”

³⁹Go Jesu kêsa gêja ma kêpi Lôckatêkwi amboac gêgôm-gêgôm gêmoa ma ŋacseŋomi têdaguc eŋ.

⁴⁰Sêô lasê gamêŋ tau acgom, go kêsôm gêdêŋ êsêac gebe “Ateŋ mecmaŋ, gebe lêtôm êtap amac sa atom.”

⁴¹Go gêwi êsêac siŋ ma kêsu tau su kêsa gêja ŋasawa kêtôm têtuc poc naêsêpŋa, go kêpôŋ aduc ma keteŋ mec gebe

⁴²“O Tamoc, embe aôm têmtac teŋ, naŋ ôkôc laclu tonec su aŋga aêŋoc. Mago aêŋoc biŋ êtu tôŋ atom, aôm taôm nêm êtu tôŋ.”

⁴³Go aŋela teŋ aŋga undambê mêŋgêôc tau lasê gêdêŋ eŋ ma kêpuc eŋ tôŋ.

⁴⁴Biŋ tonaŋ kêmônaŋ eŋ ŋanô e keteŋ mec ŋajaŋa. Ma nê waeŋ keseleŋ jatep-jatep amboac dec kêsêp nom.

⁴⁵Keteŋ mec su ma gêdi gêdêŋ nê ŋacseŋomi gêja e gêlic biŋ gêjac êsêac êndu ma sêc bêc sêc.

⁴⁶Tec Jesu kêsôm gêdêŋ êsêac gebe “Amac aêc bêc kêtu asageŋŋa. Andi sa ma ateŋ mecmaŋ, gebe lêtôm êtap amac sa atom.”

⁴⁷Jesu kêsôm biŋ tonaŋ gêmoa ma sêlic lau pom teŋ sêmêŋ, naŋ êsêac 12 nêŋ ŋac teŋ, ŋaê Juda, gêwê êsêac. Juda tau kêtu gasuc gêdêŋ Jesu gêja gebe êIêsôp eŋ alianô.

⁴⁸Tec Jesu kêsôm gêdêŋ eŋ gebe “Juda, aôm kôlêsôp Ŋamalacnê Latu gobe oc eŋ lasê me.”

⁴⁹Ma êsêac taŋ sêsap Jesu tôŋ sêmoa naŋ, sêlic gêŋ tonaŋ e sêsôm gebe “Apômtau, aêac oc anac êsêac ŋa siŋ me masi.”

⁵⁰Ma nêŋ ŋac teŋ gêjac dabuŋsêganê sakiŋwaga kêpa eŋ taŋalauŋ anôŋa su.

⁵¹Tec Jesu kêsôm gêdêŋ êsêac gebe “Andec, agôm kêtôm.” Ma kêmoasac ênê taŋalauŋ e ŋajam kêsa.

⁵²Ma Jesu kêsôm gêdêŋ lau dabuŋsêga to siŋwaga lôm dabuŋŋa ma laumata, taŋ têtu oloŋ-oloŋgeŋ dêdêŋ eŋ sêja naŋ, gebe “Amac alic aê amboac kêjaŋgowaga teŋ me, tec aôc siŋ to olopoac adêŋ aê amêŋ.

⁵³Kêtôm bêcgeŋ gawiŋ amac gamoa lôm dabuŋ, mago êu lemem teŋ kêpi aê atom. Ma onec amac to ŋakesec ŋaŋaclai tau nêm nocgoc.”

⁵⁴Êsêac sêkôc Jesu tôŋ ma sêwê eŋ sêsô dabuŋsêganê andu sêja. Ma Petere gêjac tau susu kêdaguc.

⁵⁵Lau sêboa ja kêsa andu tau ŋamalacluŋ ma sêsêlu sêŋgôŋ. Tec Petere jakêsêp êsêac ŋasawa.

⁵⁶Ma sakiŋwagao teŋ gêlic ja kêpô Petere ma kêpuc mata tôŋ eŋ e kêsôm gebe “Ŋac tônê gêwiŋ Jesugoc.”

⁵⁷Ma Petere kêpa tau gebe “Awê, aê gajam kauc eŋ nec.”

⁵⁸Têlageŋ ma ŋac teŋ gêlic eŋ e kêsôm gebe “Êsêacnêŋ teŋ aôm amboac tonaŋ.” Mago Petere kêsôm gebe “Ŋac tau, aê atom.”

⁵⁹Ma kêtôm ockatu ŋasawa teŋ gêbacnê, go ŋac teŋ kêsôm ŋajaŋa gebe “Biŋŋanô, ŋac tônê gêwiŋ eŋ amboac tonaŋgoc, gebe eŋ ŋac Galilaiaŋa.”

⁶⁰Tec Petere kêsôm gebe “Ŋac tau, biŋ taŋ aôm kôsôm naŋ, aê gajam kauc.” Kêsôm biŋ tonaŋ gêmoa ma gaôgeŋ talec kêtaŋ.

⁶¹Tec Apômtau kêkac tau ôkwi mêŋmata gê Petere e Petere taê gêjam Apômtaunê biŋ, taŋ kêsôm gêdêŋ eŋ gebe “Êmbêc tonec talec oc êtaŋ atomgeŋ ma aôm ônsa aê auc êtu dim têlêac.”

⁶²Tec kêsa gêja ma kêtaŋ ŋanô.

⁶³Lau taŋ sêkôc Jesu tôŋ naŋ, sêsu eŋ susu to sêjac eŋ.

⁶⁴Êsêac sêkwa eŋ laŋôanô ŋa obo auc, go têtu kênac eŋ gebe “Ôsôm lasê gebe asa gêjac aôm.”