San Lucas 22:35-64

³⁵Evocoiyase Jesús oporandu güemimbohe eta upe: —Opomondose acoi mbahe rɨru porẽhɨ, guarepochi rɨru porẽhɨ, ambuae pe pɨtaqui ndugüer rerasoẽhɨse, ¿ipane vo acoi mbahe ahese pẽu? —ehi. —Aní eté —ehi yuvɨreco chupe.

³⁶Evocoiyase, —Cũritei, acoi mbahe rɨru vɨreco vahe, tovɨrecoveño, guarepochi rɨru vɨreco vahe, tovɨrecoveño avei; acoi ndovɨrecoi vahe quɨse pucu, tomondo oyeaosa quɨse repɨrã.

³⁷Supi eté amombehu pẽu: iyacatu ité imboavɨye tuprɨ ãgua co che rese ñehesa imombehuprɨ aipo ehi vahe: ‘Ava vɨreco ndaseco põrai vahe nungar yuvɨreco’ ehi vahe. Supi eté yavɨyera co icuachiapɨrer che resendar —ehi.

³⁸Evocoiyase semimbohe aipo ehi yuvɨreco: —Ore Yar, cohave oime ñuvɨrío quɨse pucu —ehi. —Ahe güeraño ité avɨye —ehi güemimbohe eta upe.

³⁹Ipare Jesús osẽ oso ɨvɨtrɨ Olivo ve. Ahe ɨvɨtrɨve oso yepi, aheve semimbohe yuvɨraso yuvɨreco supi.

⁴⁰Oyepotase aheve yuvɨreco, Jesús aipo ehi güemimbohe upe: —Peyeroquɨ angaipa pe yapoẽhɨ ãgua —ehi.

⁴¹Ipare oyepepɨ güemimbohe sui, inungar ita imombosa vahe amombrɨmi, aheve oñenopɨha, oyeroquɨ

⁴²aipo ehi: “Che Ru, ereipotase, che renose eve co mbahe tẽi sui; tayapo eme che remimbotar tẽi, nde remimbotar rupira rumo” ehi.

⁴³Evocoiyase oyemboyecua Tũpa rembiguai chupe, seco momirata ãgua.

⁴⁴Mbahe-mbahe tẽi porarasa pɨpe oyeroquɨ catu. Ahese sacuvor inungar tuvɨ osẽ ichui otɨquɨ ɨvɨve.

⁴⁵Oñarapuhase oyeroquɨsa sui, oyevɨ oso güemimbohe uve. Ahe rumo opaño yuvɨroque yuvɨrocua ovɨharẽhɨsa pɨpe.

⁴⁶Evocoiyase, —¡Mahera opaño peque! Peñarapuha, peyeroquɨ catu pe vɨapiẽhɨ ãgua mbahe tẽi pɨpe —ehi güemimbohe upe.

⁴⁷Jesús ñehe vɨteseve, oyepota atɨ ava yuvɨreco chupe. Judas doce semimbohe pãhu pendar tenonde secoi. Ahe oyemboya oso sese sovaupɨte ãgua.

⁴⁸Evocoiyase aipo ehi Judas upe: —Judas, ¿mahera vo che, Ava Rɨquehɨr, rovaupɨtesa pɨpe che mondo eve che amotarẽhɨmbar upe? —ehi.

⁴⁹Semimbohe eta rumo, mbahe-mbahe tẽi repiase, oporandu yuvɨreco: —Ore Yar, ¿yavavara yande quɨse pucu pɨpe? —ehi yuvɨreco chupe.

⁵⁰Ñepei rumo supindar, pahi rerecuar ɨvate catu vahe rembiguai nambi yasu cotɨndar oyasɨa.

⁵¹Ahe rumo, —Teheni, evocoi rupive —ehi güemimbohe eta upe. Ipare opoco inambi rese ombogüera voi.

⁵²Ichui aipo ehi güecasar opacatu pahi eta rerecuar upe, tũparo rãrosar upe, tecua pɨpendar rerecuar upe avei: —¿Quɨse pucu, ɨvɨra reseve-seve rutei co peyu che ropeña, imonda rai vahe nungar che rereco peye?

⁵³Aicose tũparo pɨpe pe pãhuve arɨ yacatu rupi, na ndapeyapoi eté co nungar cheu. Avɨyeño rumo, oyepota ité niha pẽu imombehuprɨ Caruguar pĩratasa pɨpe mbahe-mbahe tẽi apo ãgua —ehi.

⁵⁴Evocoiyase Jesús oipɨsɨ yuvɨreco, ovɨraso pahi eta rerecuar ɨvate catu vahe rẽtave yuvɨreco. Pedro rumo amombrɨ rupive tẽi osaquɨcue moñaño oso.

⁵⁵Aheve ñachimbrɨ pɨpe oyatapɨ yuvɨreco, oyere tuprɨ tata rese oyepehe yuvɨnoi. Aheve avei Pedro ipãhuve chini.

⁵⁶Evocoiyase cuña mbiguai, osepiase Pedro, omahe tuprɨ iri sese aipo ehi: —Co ava avei niha acoi Jesús rupindar —ehi.

⁵⁷Ahe rumo aipo ehiño: —Cuña, ndaicuai vahe ité ahe mbɨa —ehi.

⁵⁸Iparemi tẽi ambuae osepiase aipo ehi chupe no: —Nde ité niha acoi supindar ereico —ehi. —Aní mbɨa, aipo ere tẽi, ndahei eté rumo che supindar aico —ehi.

⁵⁹Ñepei hora paremi tẽi, ambuae aipo ehi chupe: —Supi eté rumo co ité supi secoi vahe. Esepia, Galilea ɨguar ité niha —ehi.

⁶⁰Sese aipo ehi: —¿Mbahe vo catu aipo nde ñehesa? Ndasenducuai eté —ehi. Aipo ihe vɨteseve, oñehe tacura.

⁶¹Evocoiyase yande Yar oyemboyere sese. Ahe ramoseve oyemomahenduha: “Co pɨpe tacura ñehe renondeve, ‘Ndaicuai vahe’ erera mbosapɨ oyupagüer rupi cheu” ihe agüer rese.

⁶²Ahese osẽ, oyasehó iteanga oso.

⁶³Evocoiyase ava Jesús rãrosar iguayɨ tẽi yuvɨrocua-rocua yuvɨreco sese.

⁶⁴Osesacua yuvɨreco. Ipare oporandu yuvɨreco chupe: —¡Eicua ité ru, ava evocoi ocua nde rese! —ehi yuvɨreco chupe.