San Lucas 22:35-64

³⁵Orzeꞌ gazeꞌ nu Jesuuz bdugyiꞌm lo dey. Orzeꞌ nam: ―Ornu ya̱ bzuu neza̱ de ru nu char riiñ, mas sac gyish gyit ni der, mas sac nerbid tiñ ni der, mas sac reñaꞌ gyid lab der, tees ¿a yuꞌ coz nu bicy falt ni der? ―nam. Orzeꞌ na dey: ―Se la la coz bicy falt ne̱ de̱ ―na dey.

³⁶Orzeꞌ nam: ―Tees na reñaꞌ mod gyicy der. Benu mbecy ricy cup yu gyish gyit niy, orzeꞌ cha nuy ñi. Niꞌ ziꞌl benu ricy cup yu nerbid tiñ, orzeꞌ cha nuy ñi. Nunu benu tub mbecy sac mandzicy niy, orzeꞌ rlagy ñi cut yu chacyet niy. Orzeꞌ gad tiñ nu ziy mandzicy niy.

³⁷Gun ya̱ rne̱e̱ lo der nu rlagy ñi nu gyuꞌ niñ gal nu bi cañ lat de riidz ni Ñgyoozh nu nac ya̱. Rniiñ: “Briib cuen dey mi lat de mbecy a̱ꞌ nap”, rniiñ. Tees dela coz nu bi cañ nu nac ya̱ rlagy ñi nu gyuꞌ niñ ―nam.

³⁸Orzeꞌ na dey: ―Shuaan de̱, ii mbish cyup mandzicy ―na dey. Orzeꞌ nam rab mi dey: ―Beñ ndeꞌ ―nam.

³⁹Orzeꞌ gazeꞌ nu Jesuuz gush nez mi zam. Laab gal mod nu nil ricy mi, zam bicy ni Ya Oliva. Orzeꞌ de yu nu rsyaꞌ lom za ca dey ich mi.

⁴⁰Na ornu bruꞌñam lugaar zeꞌ, orzeꞌ nam rab mi dey: ―Mnii nu der Ñgyoozh, gun orzeꞌ cueꞌ nu gyicy de coz cyi gan der ―nam.

⁴¹Orzeꞌ bruu chum lo dey. Nu rnii gal nu tuñ nu zaan na tub gyitaꞌ ni tuñ bruu chum lo dey. Orzeꞌ gusu tib mi nu mnii num Ñgyoozh.

⁴²Orzeꞌ nam: ―Ñgyoozh uza̱, benu gac, bloo chu taz nu rlagy ñi nu gzuub ru̱ꞌ. Tees cueꞌ gac ñii gal nu rlagy ya̱, sinu gal nu rlagy ru ―nam.

⁴³Orzeꞌ lat nu rnii num Ñgyoozh, orzeꞌ bet tub anc nu bruu gyibaa par nu cuic yu fers nim.

⁴⁴Orzeꞌ par nu tonaꞌ la deet rac nañ lardoom, orzeꞌ fert zir mnii num Ñgyoozh. Orzeꞌ nis nu rlag lom, ndeꞌ nañ gal nu na ndzuj reñ yet ñi lo yu.

⁴⁵Na ornu blazh mnii num Ñgyoozh, orzeꞌ zam zeꞌ nu nguaa de yu nu rsyaꞌ lom. Na ornu bruꞌñam lo dey, orzeꞌ nguaa nas dey, gun rsuun lañ dey nu dzi ricy shni dey.

⁴⁶Orzeꞌ nam rab mi dey: ―¿Walab gaal nguaa nas der? Wesh te der nunu mnii nu der Ñgyoozh, gun cueꞌ nu gyicy de coz cyi gan der ―nam.

⁴⁷Lat nu gabee rnii Jesuuz zum, orzeꞌ bruꞌña mbecy zigy. Orzeꞌ Judas, tub yu nu bruu lat trocyup de yu nu bloo sum zeꞌ, yu zeꞌ zub loy lo dey. Orzeꞌ bechaꞌy lom nu bdoy chit lom.

⁴⁸Tees Jesuuz nam rab mi yu: ―Judas, ¿a nu nac tub chit guꞌr ya̱, biñ nu byac mbecy, yaa de yu nu rzi lagy lo̱? ―nam.

⁴⁹Na ornu bzaac de yu nu yuꞌ nu Jesuuz de coz nu bicy nu dey mi, orzeꞌ na dey rab yum: ―Shuaan de̱, ¿a shet yaa de̱ yu nu mandzicy? ―na dey.

⁵⁰Orzeꞌ tub de yu zeꞌ pcad güiiy tub moz ni yu nu riib ic de uz. Orzeꞌ pcyug yu gyidag beey.

⁵¹Orzeꞌ na Jesuuz: ―Bzaan nu ndeꞌ ―nam rab mi yu. Gazeꞌ nu gul yaam gyidag nu guud güii ni moz zeꞌ. Orzeꞌ bicy mi nu byanapaꞌñ.

⁵²Orzeꞌ gazeꞌ nu nam rab mi de yu zub lo ni uz, gal nu de yu nu rña nañ yuꞌ nu driib zily mbecy Ñgyoozh, gal nu de yu bel ni de mbecy Israeel, de yu nu yad teem zeꞌ. Orzeꞌ nam: ―¿Lagu yad tub der ya̱ gal nu rza tub dey tub gubaan: nu mandzicy nu garot?

⁵³Gun de dzi la bri̱ du̱ der nañ yuꞌ nu driib zily mbecy Ñgyoozh. Tees ni wancuꞌ yaa der ya̱. Tees na pshuub or nu gyicy der gal nu rlagy ru, tub or nu riib ic nuras ―nam rab mi dey.

⁵⁴Gazeꞌ nu za nu dey Jesuuz pres par yuꞌ yu nu riib ic de uz. Orzeꞌ Bed zet zet ziꞌl zaab yu za cay ich mi.

⁵⁵Na gazel la loliꞌ ni yuꞌ zeꞌ nguaa gyi. Orzeꞌ zeꞌ nguaa de mbecy rbidz dey gyi. Na ornu bruꞌña Bed, orzeꞌ gusubaꞌy lat dey.

⁵⁶Na ornu bzaac tub criad nu zub yu rbidz yu gyi zeꞌ, orzeꞌ mbi la bgüiim loy. Orzeꞌ nam: ―Fiñ ii laabaꞌ Jesuuz re rded nuñ ―nam.

⁵⁷Tees Bed mniiy nu walab. Orzeꞌ nay rab yu criad zeꞌ: ―Biñ mñaa, ni a̱ꞌ yuꞌ lo̱ ya̱ yu zeꞌ ―nay.

⁵⁸Na guchi gaꞌ ziꞌl nu mnii criad zeꞌ, orzeꞌ bzaac tuubaꞌy Bed. Orzeꞌ nay rab yu Bed: ―Ru laab losaꞌr yu re ―nay. Orzeꞌ Bed nay: ―Walab. Walab losa̱ꞌ ya̱ yu re ―nay.

⁵⁹Tub or gaal guc nu ni mniiy nu Bed, orzeꞌ na tuubaꞌy: ―Wanted la nu yu ii nac nuy yu re. Gun gazaꞌ yu ii nac yu mbecy Galilea ―nay.

⁶⁰Orzeꞌ Bed nay: ―Walab. Ni wagad lagya̱ la coz rniir ―nay rab yuy. Orzeꞌ laab or la zeꞌ, lat nu gabee rnii ruꞌ Bed, orzeꞌ bredz ngüel.

⁶¹Orzeꞌ Shuaan na Jesuuz bish cyam bgüiim lo Bed. Orzeꞌ Bed byezaꞌ lagy yu de riidz nu mnii Jesuuz loy ornu nam: “Dzi na, anzir nu cuedz ngüel, orzeꞌ ru niir nu a̱ꞌ yuur lor ya̱ chon tir”, nam.

⁶²Gazeꞌ nu bruu Bed zeꞌ zay. Nunu tonaꞌ la zi ruun yu zay.

⁶³Orzeꞌ de yu nu rña Jesuuz rgubdzaa dey mi, nunu ii rgyi su dey mi.

⁶⁴Orzeꞌ psoow dey lom. Orzeꞌ na dey rab yum: ―¡Mnii ben cyu bdi ru! ―na dey.