Luka 22:35-64

³⁵Iesu i ribalau aridi eai, i ene, “Nabada wa ea hetamarimiu wa, nige moni tobona, eo nige tobo, eo nige ae’um, ginauri esau au hedeha?” Isi si ene, “Nige’e.”

³⁶Abo i ribalau aridi eai, i ene, “Teina huia ta ia taba moni tobona i abi abo i abi, eo lauwasi tobona hinage: ia hinage nige ena elepa, ena lulu i uneunei, abo ena elepa ena abaabina.

³⁷Paana ea heribamiu ta, ea ’ne, teina ta se uriyao debagu eai abo se hemamohoiei, si ene, ‘Laugagaeo tauutuutusina maedi se heoiesegai,’ paana ede saha enagu si uri, abo se hemamohoiei.”

³⁸Isi si ene, “Guiau e, hage u ita elepa labui ede ina.” I ribalau aridi eai, i ene, “Gonoana.”

³⁹Ia ie pesa ie lau Oliveta tupina eai, doha ia kamanina; ena heaheatayao ia se hemuriwatai.

⁴⁰Ie lage dimona eai, i ribalau aridi eai, i ene, “Au lau‐uura, ata noho se hearomiu.”

⁴¹Ia i lausuara siuna lohana doha we’u ta tu, i turibono, i lau‐uura.

⁴²I ene, “Tamagu e, ena nuam u ene i lolo, teina kaputi ta u laehesuara: Taiede eau nuagu nige’e, oa mo nuam ta abi.”

⁴³Aneru esau galewa eai i lagema ia arinai, ia i headidiri.

⁴⁴Ia amamna lailai i nuhuri ena uura i uura adidiri: i muiasa doha osina i namtutu lailai dobi tano eai.

⁴⁵I lau‐uura nonoha abo i toro, eo ie lau ena heaheatayao aridi eai i lobaidi ma enodi, paana se nuadubu ariri.

⁴⁶I ribalau aridi eai, i ene, “Saha au enoi? Au toro au uura, noho ata i hearomiu.”

⁴⁷Ia ma ribaribana na tatao moutuana se lagelage, tau wa esana se tore Iuda, saudoudoi‐labui wa esau, i eda‐bagubagunaedi, i lau e Iesu gegesina eai ia bena i alagoiei.

⁴⁸Na Iesu i ribalau ia arinai, i ene, “Iuda e, Tau Natuna em alagoi ta arinai u morui?”

⁴⁹Isi se torogogo ia gegesina eai tatao edi nuatu se itayao, se ribalau Iesu arinai si ene, “Guiau e elepa eai ai lauelepai wa?”

⁵⁰Tau esau aridi eai, kohena lailai ena heaheari tauna i lauelepai, ia bea tutuna i sapihai.

⁵¹Iesu arinadi i heuio, i ene, “Besi!” Ia beana i abiitalaei eo i hemauri.

⁵²Iesu abo i ribalau kohena lailaidi, eo numa uura kapenadi, eo babadadi aridi eai, isi ede se laoma ia arinai, i ene, “Au laoma, ma elepamiu eo ma alahiamiu, doha eau tauaiaiyahari?

⁵³Asubena gamagamagari eau maemiu numa uura alona eai, nimamiu nige au heleleama arigu eai: emi huia ede ina ta, eo masigiri gigiborina hinage.”

⁵⁴Isi ia abo se woeai, se laei, kohena lailai ena numa eai se lage. Na Petero isi muriariridi eai i laolaoma.

⁵⁵Isi oeagi se iuhi numa lailai alona eai, eo se bawagogo, Petero hinage maedi se bawa.

⁵⁶Sine esau ia ie ita, oeagi gegesina eai ie bawa wa, i itaitasipoilaei, eo i ene, “Teina tau ta ia hinage maena.”

⁵⁷Ia abo i halele, i ene, “Sine e, ia nige ea itaitai.”

⁵⁸Nige baeaona abo tau esau hinage ia ie ita, eo i ene, “Oa hinage adi sagu esau.” Petero abo i ene, “Tau e, eau nige’e.”

⁵⁹I lau e, doha mahana esega, tau esau hinage i riba adidirilau, i ene, “Mamohoi ina tau ta ia hinage maena: ia Galilaia tauna.”

⁶⁰Petero abo i ene, “Tau e, em riba me ea hekau.” Ma esega abo, ma ribaribana, na kamkam ie dou.

⁶¹Guiau abo i sinibui, i italau Petero arinai. Petero Guiau ena riba wa abo i henuaisini, doha i ribalau ia arinai, i ene, “Kamkam sora nige ie dou, oa ma haiona abo u halelegu.”

⁶²Petero abo ie pesa murimuri eai, ie dou ma gado kalapina.

⁶³Tatao wa Iesu se abididini ia se talatalawasiei, eo se laulauwapai.

⁶⁴Isi ia matana abo se suma, pareana se wa’i, ia se oimurini, si ene, “U riba peroveta, eai i lubilubim?”