San Lucas 22:35-64

³⁵Satepan oquimiluih: —Ihcuac onnamechontitlan uan onnamechoniluih amo ixconuicacan tomin, dion tlen nanconcuasqueh itich in ohtli, dion ocse pantli namoticacuan, ¿max itlah onamechonpoloh? Yehuan otlananquilihqueh: —Amo, amotlen.

³⁶Uan Jesús oquimiluih: —Pero axan, naquin icpia tomin macuica, uan noiuqui macuica tlen quicuas itich in ohtli. Uan tla acah amo icpia iespada, macnamaca niololol uan macmocoui se.

³⁷Ohcon innamechoniluia nic moniqui mochiuas notich ohcon quemeh ihcuiliutoc itich in Teotlahtolamatl: “Uan octaqueh quemeh se tlen amo cuali ayini.” Tlamilauca, nochi tlen ihcuiliutoc de neh, yoehcoc in tonal ohcon mochiuas.

³⁸Yehuan oquiluihqueh: —ToTecotzin, nican cateh ome espadas. Yeh oquimiluih: —Ya, san xonican.

³⁹Ihcuacon Jesús oquis uan oyah, ohcon quemeh ya nochipa, itich in tipetl Olivos. Uan nitlasalohcauan iuan oyahqueh.

⁴⁰Uan ihcuac oahsitoh ompa, oquimiluih: —Xonmotlatlautican inauactzinco Dios manamechonmatlani amo xonuitzican ihcuac namechonyoltilanas in tlahtlacol.

⁴¹Uan Jesús oquincauteu, uan oyah uehcatzin quemeh campa ahsi se titl ihcuac setlatimaca, uan ompa omotlancuaquitz uan opeu icmonochilia Dios.

⁴²Oquihtoh: —NoTahtzin, tla itcomoniquiltia, amo ixnechoncauili manconi nin xaloh ica tlahyouilistli. Tlen quemah, amo mamochiua tlen neh inniqui, yehyeh mamochiua tlen Tehuatzin motlaniquilitzin.

⁴³Ihcuacon omonextih se iluicactlatitlantli ocmactico chicaualis.

⁴⁴Itich nitlahyouilis ocachi omotlatlautaya inauactzinco Dios, uan niitonil omocuip queh istli titzauac tlen ochipinia itich in tlali.

⁴⁵Ihcuac omoquitzteu campa omotlatlautihtoya, oyah campa ocatcah nitlasalohcauan, uan oquimahsico cohcochtoqueh nic oquincochtlas in tlaocol.

⁴⁶Uan oquimiluih: —¿Tleca namoncochtoqueh? Xonmeuacan uan xonmotlatlautican inauactzinco Dios manamechonmatlani amo xonuitzican ihcuac namechonyoltilanas in tlahtlacol.

⁴⁷Ihcuac Jesús oc ohcon otlahtohtoya, oahsitoh miqueh. In Judas, semeh nimahtlactlamome itlasalohcauan, oyaya tlaixpan, uan omotoquih inauac Jesús quixtenamiquis.

⁴⁸Jesús oquiluih: —Judas, ¿ica se ixtenamictli itcontemactia niConeu in Tlacatl?

⁴⁹Naquin ocatcah iuan Jesús, ihcuac oquitaqueh tlen omochiutoya, octlahtlanihqueh: —ToTecotzin, ¿itquimixnamiquisqueh ica espada?

⁵⁰Uan semeh nitlasalohcauan Jesús occohcocoh se itlaqueual in ueyiteopixcatlayacanqui, octiquilih niyecmapannacas.

⁵¹Pero Jesús oquihtoh: —San xonican, ixquimoncauacan. Uan octzitzquih campa ninacas non tlacatl, uan ocpahtih.

⁵²Satepan Jesús opeu quimiluia in teopixcatlayacanqueh, uan nintlayacancauan in teopanpianih uan tiquiuahqueh judíos naquin octzitzquicoh: —¿Tleca onamoualahqueh onannechontzitzquicoh ica espadas uan ica pouitl, quemeh oisquia onancontzitzquicoh se ichtic?

⁵³Mostlah namouan oncatca icah in teopantli, uan yeh ompa amo onannechontzitzquihqueh. Tlamilauca, yoehcoc in hora tlen namoyohca, ihcuac in tlayouilotl icpia nichicaualis.

⁵⁴Ihcuacon octzitzquihqueh Jesús uan ocuicaqueh ichan in ueyiteopixcatlayacanqui. Uan Pedro san uehca oyaya icuitlapan Jesús.

⁵⁵Ompa tlahcoquiyauac otlatlatihqueh uan ocyaualohqueh in tlitl, uan ompa teuan omotlalih in Pedro.

⁵⁶Ihcuacon se siuatl tlaqueual oquitac in Pedro ompa inauac in tlitl, ocyequixitac, uan oquihtoh: —Nin tlacatl noiuqui iuan ocatca.

⁵⁷Pero Pedro amo ocmopantih uan oquihtoh: —¡Ixconmati siuatzintli, neh amo inquixmati!

⁵⁸Tipitzin satepan, ocse oquitac uan oquihtoh: —Touatzin noiuqui tonpoui iuan nitlasalohcauan. Pedro otlananquilih: —Amo, touatzin, neh amo inuan inpoui.

⁵⁹Quemeh se hora satepan ocse noiuqui ohcon oquihtoh: —Yeh milauac, nin noiuqui iuan ocatca, pues yeh galileo.

⁶⁰Pedro oquihtoh: —Nocnitzin, amo inmati tlenoh itcontohtoc. Uan sanniman ihcuac oc ohcon octohtoya, otzahtzic in gallo.

⁶¹Ihcuacon in toTecotzin omocuip uan ocnalixitac in Pedro, uan ihcuacon yeh oquilnamic in tlahtol tlen in toTecotzin yoquiluihca: “Achtoh ihcuac tzahtzis in gallo, touatzin yexpa itconihtos amo itnechonixmati.”

⁶²Pedro ihcuacon oquis quiyauac uan tlailiuis otlaocolchocac.

⁶³In tlacameh tlen ocpixtoyah Jesús ocuitzcayah uan ocmacayah.

⁶⁴Oquixtzahtzacuqueh uan ocmacayah itich nixayac, uan octlahtlanayah: —Tla tonteotlanauatani, ¡ixtechonmatilti aquih omitzonmacac!