LUUKAS 22:35-64

³⁵Junak intok ju'u Jesus inen ameu nattemaek: ―Sejtul, junak nee enchim naas saweko, enchim ama nu'u sakanee'uta oo tomi boosata intok kia bocham juni'i ka enchim weiyaane'eti jiakai, jaisa junak jita emou be'eka ja'ani ―ti ameu nattemaek. Bempo intok: ―Tua kaita ―ti au jiiak.

³⁶Junak intok aapo inen jiiak: ―Taa i'ani, wa'a ama a' nu'unee'uta oo tomi boosata a' jipueme, ini'i a' weiyaane. Ju'u intoko ka tebe sisi'iwook kuchi'im jipueme, ini'i jume' a' bepa supewam nenkaka junae tomie am jinune.

³⁷Bwe'ituk inepo nee a' lutu'uriatune'eti jiia, inika'a, jum Liojta nok lutu'uriapo inen ji'ojteita junuen neu a' chupne'po: “Intok ini'i, jume' ka tu'i yoememmak na'ikiatuk”, ti jiamta. Bwe'ituk si'ime ju'u Liojta nok lutu'uriapo nee betana ji'ojtei, utte'a junuen a' chupnee'u ―ti ameu jiiak.

³⁸Junak intok bempo: ―Yuu achai, woika im aayuk jume' tettebe sisi'iwook kuchi'im ―ti jiiak. Aapo intok: ―Inime'e jibatune ―ti jiiak.

³⁹Junak intok ju'u Jesus junama yeu sikaa, jiba aapo'ik aman yeepsa'a benasia, oliibo'okawi' tea'u bicha siika. Jume' a' majtim intok aamak yeu sajak.

⁴⁰Junak, jum a' sika'u yepsakai, inen ameu jiiak: ―Liojtau bicha eme'e emo nokriane, junuen ka tu'ik enchim ya'anee'ut ka enchim ji'opne' betchi'bo ―ti ameu jiiak.

⁴¹Chukula sep ju'u Jesus, junama'a am ane'epo, che'a bichau jeela siika, senuk tetata a' mekka a' jimmaala'abe'emu. Junama intok Liojtau bicha nok betchi'bo tonommea kiktek.

⁴²Intok: ―In yo'owa, empo junen ea'ateko, inika'a bettesi jiokot machika neu weyemta betana ka nee a' bittuane. Taa ka in ea'po amantunee taa tua em junen ea'po amani ―ti jiiak.

⁴³Junak intok teeka betana senu Liojta ankeles junama au yeu machiak, ini'i junuen utte'ata aet autuasekai.

⁴⁴Intok aapo junuen tua jiokot bettesi au bichakai, che'a juni'i bepa Liojtau bicha au nokria simen. Ju'u intok a' tata bujtiawa, kia bwere ojbo chaktiam benasi bwiau ko'om yojten.

⁴⁵Junama'a Liojtau bicha a' noka'apo kikteka, jume' a' majtim tawala'u bicha siika. Inime'e intok siokrimmea yumiataka, kokocheme teak.

⁴⁶Junak intok: ―Jaisaaka eme'e kokoche. Jote'em intok Liojtau bicha emo nokrianee junuen ka tu'ikut, ka enchim ji'opne' betchi'bo ―ti ameu jiiak.

⁴⁷Juka' Jesujta junama'a ketuni a' nokao su, waate juebenaka ama au yajak. Ju'u Juuraj ti teaka'u, ini'i jiba jume' woj mamni ama wooika Jesujta yeu pu'arimmak na'ikiatuka'u, juname bepat weyen. Intok ini'i Jesujtau ruktek a' pujbawat aet tente betchi'bo.

⁴⁸Junak ju'u Jesus: ―Juuras, jaisa empo inien aet tenteka, juka' inim emo benasi yoemta, yeu a' bwiseka, watem mampo a' su'u toja ja'ani ―ti au nattemaek.

⁴⁹Jume' Jesujtamak rejteme, juka' ama weyemta bichakai aapo'iku: ―Achai, jaisa tua itepo inime'e tettebe sisi'iwook kuchi'immea nassuanee ja'ani ―ti au nattemaek.

⁵⁰Jume' Jesujta mak rejteme betana, seenu, ju'u te'opopo tekiakammeu yo'ota sawee'uta, batatana naka chukti a' beebak.

⁵¹Taa ju'u Jesus: ―Kate'em ameu suua, ini'i jibatune ―ti jiiak. Junak intok ju'u Jesus, junaka'a ya'uraapo sawamta nakammet mamteka, a' tu'utek.

⁵²Junama sep, te'opopo tekiakammeu yo'owemmeu intok jume' te'opopo nesaweme intok ju'u yoemratau yo'owemmeu, jume' a' weiyaabaeka aman au yajilammeu: ―Eme'e tettebem kukuche'ekai intok kukutakai, nee jita etbwareo tuka'a benasia eme'e a'abo neu yeu sajak ―ti ameu jiiak―.

⁵³Junako chikti ta'apo jum te'opopo nee emo nasuk aneeo, eme'e kia juni'i ka neu suuak. Taa i'an ka machiku emou tu'i, juka' bebeje'erita utte'ata emot ayuka a' weyeo.

⁵⁴Junak intok inime'e, juka' Jesujta bwiseka, ju'u te'opopo tekiakammeu che'a yo'ota kariu aman wajiwa a' tojak. Ju'u Peeo intok mekka aet cha'aka weyen.

⁵⁵Junama'a wajiwa, waate jum bwe'u tebat nasuku nayaka intok junama ameu jootek. Ju'u Peeo intok ket amemak ama yejtek.

⁵⁶Junak intok senu jamut, junama sawame, aapo'ik junama tajiu katekamta bichakai, tua a' bitchuka, intok: ―Ini'i o'ou ket Jesujtamak weaman ―ti jiiak.

⁵⁷Taa ju'u Peeo, ka a' lutu'uria'ati jiubaeka: ―Kannee a' ta'aa ―ti jiiak.

⁵⁸Che'a chukula intok juchi senu a' bichaka: ―Empo ket juname betana weye ―ti au jiiak. Taa ju'u Peeo: ―E'e, kannee juna'a ―ti jiiak.

⁵⁹Che'a chukula, jumak senu orata weyekai, juchi senu ket: ―Tua lutu'uriapo ini'i yoeme aamak weaman bwe'ituk Kalilea bwiaarapo joome ―ti jiiak.

⁶⁰Junak intok ju'u Peeo inen jiiak: ―Empo achai, tua kannee ju'unea jitat em etejoo'ut ―ti jiiak. Jiba junama lautipo juka' Peota ketuni a' nokao su, totoi o'owia kukussuk.

⁶¹Junak intok ju'u yo'owe Jesukrijto au bicha kuakteka junama'a Peotat remtek. Ju'u Peeo intok, ju'u yo'owe Jesukrijtota au teuwaala'u wawaatek: “I'an empo, totoi o'owiata kee kuseo, bajisi empo ka nee emo ta'a'ati jiulatune”, ti au a' jiaka'ubewi.

⁶²Junak intok ju'u Peeo junama yeu sikaa, intok tua ka alleaka bwaanak.

⁶³Jume' Jesujta a' suuatuawame, ka a' yo'oreka au nookan intok ko'okosi a' jooan.

⁶⁴Intok a' puj pattaika, pujbat a' chonaka au nattemaek: ―Ka ju'uneaka itom tejwaa, jabeta enchi chochonak ―ti jiakai.