Luku 11:41-47

⁴¹Pǝ kǝlɑ teu sɩ ɩ́ hɑ mpi ɩ wɛnɑ mǝ iyisi nɑ mǝ nyǝnɑsɩ tɑɑ tɔɣɔ kʋnyɔntʋnɑɑ, ɩlɛ pǝ tǝnɑ pɩɩ wɛɛ-mɛɣɛ teu.

⁴²Pɔpɔtʋ fɛɩ, Fɑlisɑnɑɑ mɛ, mǝ tɔm wɛ wɑɩyo kɛ́. Ɩ́ kpɛsǝɣɩ nyɩɩtʋ nti pɑ yɑɑkɩ sɩ mɑntɩ nɑ luu tɔ nɑ tuusi hɑtʋ tǝnɑ nɑ ɩ́ hiliɣi nɑ ɩ́ lǝsǝɣɩ Ɩsɔ kɛ́ pǝ hɔɣɔlǝŋ nɑɑnʋwɑ tɑɑ kʋlʋm. Pǝyele mǝ pɑɑ fɛɩnɑ tɑmpɑnɑ tǝŋʋɣʋ nɑ Ɩsɔ sɔɔlʋɣʋ tɔm. Amɑ tɑmpɑnɑ tǝŋʋɣʋ nɑ Ɩsɔ sɔɔlʋɣʋ tɔm kɛ pɩɩ mʋnɑ ɩ́ sɛɛsǝnɑ ɩsǝlɛ, ɩlɛ ɩ́ tɑɑ sɔɔ hɔɣɔlǝŋ nɑɑnʋwɑ tɑɑ kʋlʋm ɩnɩ ɩ tɔɔ.

⁴³Fɑlisɑnɑɑ mɛ, mǝ tɔm wɛ wɑɩyo kɛ́. Yutɑ nyǝ́mɑ tǝkotilenɑɑ tɑɑ, teeli teeli tǝcɑɣɑlɛnɑɑ kɛ ɩ́ pɛɛkǝɣɩ. Nɑ ɩ́ sɔɔlɑ pɑ sɛɛkɩ-mɛɣɛ sɑmɑɑ tɑɑ kɛ́ nɑ pɑ́ luŋiɣi.

⁴⁴Fɑlisɑnɑɑ mɛ, mǝ tɔm wɛ wɑɩyo kɛ́. Ɩ́ wɛ kɛ́ ɩsɩɩ pǝlɑɑŋ wei ɩ sɑlǝtɑɑ nɑ pɑ́ tɔŋ ɩ tɔɔ kɛ́ yem, nɑ pɑ́ tɑ nyɩ sɩ pǝlɑɑŋ tɔ.

⁴⁵Tǝnɑɣɑ Ɩsɔ Tɔm sɛɣɛsǝlʋ sɔsɔ nɔɣɔlʋ ɩ pǝsǝnɑ-ɩ sɩ: Tɑcɑɑ, n yɔɣɔtʋɣʋ mpʋ tɔ n kpɛntǝnɑ tɑ́ tɔtɔɣɔ nɑ ń tʋʋ.

⁴⁶Ḿpʋ́ɣʋ́ Yesu cɔwɑ sɩ: Ɩsɔ Tɔm sɛɣɛsǝlɑɑ sɔsɑɑ mɛ, mǝ tɔm nɑ́ wɛ wɑɩyo tɔtɔɣɔ. Ɩ́ sʋkǝɣɩ yǝlɑɑ kɛ sǝɣǝlɑ yuŋ nyǝnɑ. Pǝyele mɩɩ tɩɩ tɑɑ-wɛɣɛ tɑɑʋ mɑɣɑmɑɣɑ.

⁴⁷Wɑɩyo nɑ mǝ tɔm kɛ́, mǝ cɑɑnɑɑ nɑ́ kʋnɑ Ɩsɔ kʋyɔɣɔtʋtʋ tɛlǝsǝlɑɑ, nɑ mɩɩ hǝlǝɣɩ pɑ pǝlɑɑŋ nɑ ɩ́ tɑɣɑnǝɣɩ tǝtetete.