Lom 3:5-27

⁵Amɑ ye ɩsɑɣɑtʋ nti tǝ lɑkɩ tɔ tǝ kʋsɑ Ɩsɔ nyʋɣʋ, hɑlǝnɑ pɑ́ sɑ ɩ tɑmpɑnɑ tǝŋʋɣʋ, ɩlɛ tɩɩ tɑsɑ suweɣe yɔɣɔtʋɣʋ tɔtɔ? Yɑɑ tɩɩ tɔ sɩ timpi ɩ tʋkʋɣʋ-tʋɣʋ cɛɣɛcɛɣɛ kɛ́ tɑ́ ɩsɑɣɑtʋ tɔɔ tɔ ɩ yʋwɑɣɑlɛ? Aɑɩ. (Amɑ nti yǝlɑɑ yɔɣɔtǝɣɩ tɔɣɔ mɑ yɔɣɔtǝɣɩ cǝnɛ.)

⁶Tɔfɔ ye pɩɩ wɛ mpʋ, ɩlɛ ɩsǝnɑɣɑ Ɩsɔ kɑ́ tɛ nɑ ɩ́ lɑ nɑ ɩ́ hʋʋnɑ yǝlɑɑ tǝnɑ tǝpɑɩ kɛ́ tɔm?

⁷Ye mɑ pɔpɔtʋ lɑkǝnɑ nɑ pǝ́ hʋ́lǝ́ɣɩ́ Ɩsɔ tɑmpɑnɑ tǝkelekele nɑ ɩ́ hikiɣi teeli, ɩlɛ pepe tɔɔ kɛ́ pɑ nyǝnǝɣɩ-m ɩsɑɣɑʋ tɔtɔ?

⁸Yɑɑ pepe tɔɔ kɛ́ tǝ kɑɑ tɔ sɩ tǝ́ lɑ ɩsɑɣɑtʋ nɑ pǝ́ kɔnɑ kʋpɑntʋ ɩlɛ? Hɑlǝnɑ lɛmpɑ cɑɑkɑɣɑ mɑ nyʋɣʋ kʋɣʋ, ɩlɛnɑ pɑ́ wɑɑnɑ sɩ ḿpʋ́ɣʋ́ mɑ tɔŋnɑ sɛɣɛsʋɣʋ. Pɑɑ kʋ yǝlɑɑ mpɑ pɑ wɑɑnɑ-m mpʋ tɔ pɑ tɔm, nɑ pɑ tɔm kʋɣʋ mɑɣɑɑ.

⁹Ɩlɛ ɩsǝnɑ tɔɔ kɛ́ pǝ wɛɛ? Yutɑ nyǝ́mɑ tɑ́ tǝ tɛɛ piitim lɛmpɩ nyǝ́mɑ yɑɑ ɩsǝnɑ? Aɑɩ, pǝ tɑɣɑ mpʋ. Mɑ tɛmɑ hʋ́lʋ́ɣʋ́ sɩ ɩsɑɣɑtʋ tɔkɑ yǝlɑɑ tǝnɑɣɑ tǝkem, pɑɑ Yutɑ nyǝ́mɑ, pɑɑ yǝlɑɑ mpɑ te.

¹⁰Ɩsɔ Tɔm tɑɑ pɑ ŋmɑɑwɑ mpʋ sɩ: Yʋlʋ fɛɩ wei ɩ siɣisɑɑ tɔ, pɑɑ kʋlʋm kʋŋ.

¹¹Nɔɣɔlʋ tɑ cɛkǝnɑ pʋlʋpʋɣʋ pɑɑ pǝcɔ. Pǝyele nɔɣɔlʋ ɩɩ pɛɛkǝɣɩ Ɩsɔ.

¹²Pɑ tǝnɑ pɑ toolɑɑ nɑ pɑ́ hɑtǝlǝnɑ Ɩsɔ, pɑ kpɛntɑ pɑ tǝnɑ nɑ pɑ́ lɑ yem. Pɑ tɑɑ kʋlʋm mɑɣɑmɑɣɑ ɩɩ lɑkɩ kʋpɑntʋ.

¹³Pɑ nɔɣɔ tɑɑ wɛ ɩsɩɩ pǝlɑɑʋ ŋku kʋ kulɑɑ tɔ. Pɑ puɣusiɣi lɛlɑɑ nɑ pɑ nɔɔleleŋ. Pɑ ntompee ɩ́ nyǝpǝtɑɑ, pǝ wɛ kɛ́ ɩsɩɩ ɑkɑlɑ sɔtʋ.

¹⁴Mpusi koolee nɑ tɔm ɩsɑɣɑtʋ wɛnnɑ pɑ nɔɔsɩ tɑɑ.

¹⁵Pɑ niŋ wɛ lɔŋ kɛ yǝlɑɑ tǝkʋlɛ.

¹⁶Pɑ́ kʋlɑ timpi, wɑkǝlʋɣʋ nɑ ɩsɑɣɑtʋ kɛ n mɑkǝnɑ.

¹⁷Pɑ tɑ nyɩ ɩsǝnɑ pɑɑ lɑ nɑ pɑ́ lɩɩ pǝ tɑɑ nɑ pɑ́ hɛɛsɩ tɔ.

¹⁸Pɑ fɛɩnɑ Ɩsɔ sɔɣɔntʋ kɛ pʋlʋ tɑɑ.

¹⁹Tɔʋ, tǝ nyǝmɑ́ sɩ Ɩsɔ kʋsǝsɩɩtʋ yɔɣɔtǝɣɩ pǝ tǝnɑ mpi tɔ, pɑ tǝnɑ mpɑ pɑ tǝŋǝɣɩ-tɩ tɔɣɔ pǝ nɑwɑ. Ɩlɛnɑ pǝ́ tǝkɩ sɑmɑɑ tǝnɑ nɔɔsɩ, nɑ pɑ́ tɑɑ hiki tǝwɑɑnlɛ kɛ tiili, yɑɑ nɔɣɔlʋ fiti Ɩsɔ hʋʋnɑʋ tɑɑ.

²⁰Pǝ tɑɣɑ kʋsǝsɩɩtʋ lɑkǝnɑ nɑ Ɩsɔ nyǝnǝɣɩ yʋlʋ kɛ yʋlʋpɑŋ, pɑɑ pʋntʋ kɛ́ ɑwe. Amɑ kʋsǝsɩɩtʋ tǝmlɛ ntɛ́ sɩ pǝ́ hʋlɩ-ŋ nyɑ́ tǝpǝntǝlɛ, pǝ tǝnɑ ntɛ́.

²¹Amɑ pǝnɛntɛ Ɩsɔ hʋlɑ-tʋɣʋ ɩsǝnɑ ɩ lɑkɩ nɑ tǝ́ pǝsǝɣɩ yʋlʋpɑmɑ kɛ ɩ ɩsɛntɑɑ nɑ pǝ tɑ́ lɩɩ kʋsǝsɩɩtʋ tǝŋʋɣʋ tɔm tɔ. Hɑlɩ kʋsǝsɩɩtʋ tɑkǝlɑsɩ nɑ Ɩsɔ kʋyɔɣɔtʋtʋ tɛlǝsǝlɑɑ nyǝnsɩ tɑɑ kɛ́ pɑ yɔɣɔtɑ pǝ tɔm kɛ mpʋ sɩ:

²²Ɩsɩɩ yʋlʋ tɛŋʋɣʋ ɩ tɑɑ nɑ Yesu Kilisiti tɔ, mpʋ pǝ yekinɑ nɑ ɩ́ pǝsɩ kʋpɑŋ. Wei ɩ́ tɩɩ lɑɑlɑɑ nɑ ɩ́ tɛmɩ-ɩ nɑ ɩ tɑɑ te, ɩ lɑkɩ nɑ ɩ́lɛ́ ɩ́ pǝsɩ kʋpɑŋ kɛ ḿpʋ́ɣʋ́. Ɩsɔ nɑɑ fɑɣɑsǝɣɩ yǝlɑɑ.

²³Pǝ tɑɣɑ pʋlʋ, yǝlɑɑ tǝnɑ lɑpǝnɑ ɩsɑɣɑtʋ, ɩlɛnɑ pǝ́ pɛ-wɛɣɛ Ɩsɔ teeli.

²⁴Amɑ Ɩsɔ kʋpɑntʋ tɔɔ ɩ yelɑɑ nɑ Yesu Kilisiti wei ɩ wɑɑsǝɣɩ-wɛ tɔ ɩ́ lɑ nɑ pɑ́ pǝsɩ yʋlʋpɑmɑ kɛ Ɩsɔ ɩsɛntɑɑ kɛ fɑɑlɑɑ.

²⁵Sǝm mpi ɩ sǝpɑ tɔ, Ɩsɔ lɑpǝnɑ-ɩ kɔtɑɣɑ sɩ ɩ́ pǝsɩ wei ɩ kiŋ yǝlɑɑ mpɑ pɑ nɩɩkǝnɑ-ɩ tɔ pɑɑ hikinɑ suulu kɛ pɑ ɩsɑɣɑtʋ tɔm tɑɑ nɑ pǝ́ hɩɩsɩ-wɛɣɛ-tɩ tɔ. Ɩsɔ lɑpɑ ḿpʋ́ɣʋ́ sɩ pǝ́ hʋ́lɩ́ sɩ ɩ siɣisɑɑ. Hɑtuu lɔŋ Ɩsɔ hʋlɑ suulu nɑ ɩ́ yele yǝlɑɑ kɛ pɑ ɩsɑɣɑtʋ pɔɔsʋɣʋ.

²⁶Amɑ kɑɣɑnɑ ɩlɛ ɩ pɑɑsǝnɑ ɩsɑɣɑtʋ ntɩ ɩnɩ, nɑ ɩ́ hʋ́lǝ́ɣɩ́ ɩsǝnɑ ɩ lɑkɩ nɑ yǝlɑɑ pǝsǝɣɩ kʋpɑmɑ kɛ ɩ ɩsɛntɑɑ tɔ. Mpʋ ɩnɩ pǝ tɑɑ kɛ́ ɩ hʋ́lǝ́ɣɩ́ sɩ ɩ mɑɣɑmɑɣɑ ɩ kɛ́ kʋpɑŋ, pǝyele ɩ lɑpɑ nɑ mpɑ pɛlɛ pɑ nɩɩkǝnɑ Yesu tɔ pɑ́ pǝsɩ kʋpɑmɑ tɔtɔ.

²⁷Ye mpʋ pʋlʋ kɑɑsɑɑ mpi yʋlʋ kɑ́ hɔŋnɑ ɩ tɩ tɔ? Pɑɑ pǝcɔ pʋlʋ fɛɩ. Ɩlɛ pepe tɔɔ? Pɑ tǝŋǝɣɩ kʋsǝsɩɩtʋ tɔ pǝ tɔɔ yɑɑ? Aɑɩ, tɑɑ tɛmnɑʋ tɔɔ kɛ́.