Lom 4

1

2

3

4

5

6

7

8

9

¹Tɔʋ, tǝ́ nyǝnnɑ tɑ́ cɑɑnɑɑ cɑɑ sɔsɔ Apǝlɑhɑm kiŋ nɑ tǝ́ nɑ́. Pepeɣe ɩ hikɑɑ?

²Ye tǝmɑ kʋlɑpɛɛ tɔɔ kɛ́ Ɩsɔ kɑ nyǝnɑ-ɩ yʋlʋpɑŋ ɩlɛ ɩ tɑɑ lɑŋ mpi ɩ kɑ́ sɑnɑ ɩ tɩ tɔ. Amɑ ɩ kɑɑ tɩɩ pǝsɩ nɑ ɩ́ sɑ ɩ tǝɣɩ Ɩsɔ ɩsɛntɑɑ mɛɛ.

³Pǝ tɑɣɑ pʋlʋ, pɑ yɔɣɔtɑ Ɩsɔ Tɔm tɑɑ kɛ́ sɩ, Apǝlɑhɑm tɛmɑ Ɩsɔ nɑ ɩ tɑɑ, nɑ ɩ tɑɑ tɛm mpǝɣɩ Ɩsɔ nɑ́ nɑwɑ nɑ ɩ́ yɑɑ-ɩ yʋlʋpɑŋ nɑ ɩ́ mʋ-ɩ.

⁴Yʋlʋ ɩ́ lɑkɩ tǝmlɛ, pɑ fɛlǝɣɩ-ɩ kɛ́ mɛɛ. Ɩlɛ pɑ kɑɑ yɑɑ ɩ kʋfɛlʋɣʋ ŋkʋ sɩ kʋhɑʋ, ɩ ɩwɩɩlɛ lonte kɛ pɑ fɛlɑ-ɩ.

⁵Ɩlɛ pɑɑ yʋlʋ tɑ lɑ tǝmlɛ nɑ ɩ́ tɛ Ɩsɔ wei ɩ wiiki ɑsɑɣɑɑ kʋnyɔŋ tɔ nɑ ɩ tɑɑ kɛ́ kʋtɛm, Ɩsɔ nyǝnǝɣɩ pʋntʋ tɑɑ tɛm tɔtɔɣɔ, nɑ ɩ́ mʋ-ɩ sɩ ɩ kɛ́ kʋpɑŋ.

⁶Pǝ tɔɔ mɑɣɑmɑɣɑ kɛ Tɑfiiti yɔɣɔtǝɣɩ wei Ɩsɔ mʋwɑ sɩ ɩ kɛ́ yʋlʋpɑŋ nɑ ɩ́ tɑ́ kɛɛsǝnɑ ɩ tǝmɑ tɔ ɩ lɑŋhʋlʋmlɛ tɔm sɩ:

⁷Leleŋ nɩɩlɑɑ ntɛ́ mpɑ pɑ pǝntɑɑ nɑ Ɩsɔ hʋ́lɩ́-wɛɣɛ suulu tɔ. Pǝyele ɩ hɩɩsɑ pɑ ɩsɑɣɑtʋ.

⁸Leleŋ nɩɩlʋ ntɛ́ wei ɩ ɩsɑɣɑtʋ Ɩsɔ lɔwɑ tɔ.

⁹Pɛllɑɑ tike nɩɩkǝnɑ leleŋ ɩnɛ? Kʋtɑpɛlǝŋ nɑɑ nɩɩkɩ-ɩ? Tǝ tɛmɑ yɔɣɔtʋɣʋ kɛ nɔɔnɔɔ sɩ Apǝlɑhɑm tɛmɑ Ɩsɔ nɑ ɩ tɑɑ, nɑ ɩ tɑɑ tɛm mpǝɣɩ Ɩsɔ nɑ́ nɑwɑ nɑ ɩ́ yɑɑ-ɩ yʋlʋpɑŋ nɑ ɩ́ mʋ-ɩ.

¹⁰Ɩlɛ wɑɑtʋ wei kɛ́ pǝ lɑpɑ mpʋ? Wɑɑtʋ wei ɩ pɛlɑɑ tɔ, yɑɑ nɑ pǝ́cɔ́ ɩ́ pɛlǝɣɩ? Aɑɩ nɑ pǝ́cɔ́ ɩ́ pɛlǝɣɩ kɛ́.

¹¹Wɑɑlɩ wɑɑlɩ kɛ́ pɑ pɛlɑ-ɩ, nɑ ɩ pɛlʋɣʋ mpɩ pǝ hʋlɑɑ kɛ́ sɩ ɩ lɑɑlɑɑ nɑ ɩ́ tɛ Ɩsɔ nɑ ɩ tɑɑ tɔɣɔ ɩ́lɛ́ ɩ mʋ-ɩ sɩ yʋlʋpɑŋ. Pǝ́cɔ́ wɑɑtʋ ɩnɩ ɩ tɑɑ pɛlǝtɑ. Ḿpʋ́ɣʋ́ pǝ lɑpɑ nɑ Apǝlɑhɑm pǝsɩ pɑ tǝnɑ mpɑ pɑ tɛŋnɑ Ɩsɔ kɛ́ pɑ tɑɑ kɛ́ mpʋ nɑ ɩ́ mʋɣɩ-wɛ sɩ kʋpɑmɑ tɔ pɑ cɑɑ, pɑɑ pɑ tɑ pɛlɩ.

¹²Ɩ pǝsɑ pɛllɑɑ cɑɑ tɔtɔ. Ɩlɛ pǝ tɑɣɑ mpɑ pɑ mʋɣʋlǝɣǝnɑ pɛlʋɣʋ tɔm tike tɔɣɔ mɑ tɔŋ. Amɑ mpɑ pɑ tǝŋɑ tɑ́ cɑɑ Apǝlɑhɑm ɩkpɑtɛ nɑ pɑ́ tɛ Ɩsɔ nɑ pɑ tɑɑ ɩsɩɩ ɩ́lɛ́ ɩ kɑ tɛmnɑʋ Ɩsɔ nɑ ɩ tɑɑ nɑ pǝ́cɔ́ pɑ́ pɛlǝɣɩ-ɩ tɔɣɔ.

¹³Ɩsɔ kɑ heelɑ Apǝlɑhɑm nɑ ɩ piyɑ sɩ kɑteŋɑ kɑnɛ kɑ tǝnɑ kɑɑ tɛ nɑ kɑ́ pǝsɩ pɑ nyǝm tǝkpɑtɑɑ. Ɩlɛ pǝ tɑɣɑ kʋsǝsɩɩtʋ tǝŋʋɣʋ tɔɔ kɛ́ pɑ heelɑ Apǝlɑhɑm kɛ mpʋ. Amɑ ɩ tɛmnɑ Ɩsɔ kɛ́ ɩ tɑɑ nɑ ɩ́lɛ́ ɩ́ mʋ-ɩ sɩ yʋlʋpɑŋ tɔɣɔ.

¹⁴Ye kɑteŋɑ ŋkɛ kɑɑ tɛ nɑ kɑ́ pǝsɩ kʋsǝsɩɩtʋ tǝŋlɑɑ tike nyǝŋkɑ, ɩlɛ tɑɑ tɛmnɑʋ kɛ Ɩsɔ ɩɩ wɑɑsǝɣɩ pʋlʋɣʋlɛ, nɑ mpi Ɩsɔ tɔŋ sɩ ɩ kɑ́ lɑ tɔ pǝlɛ pǝ mǝlɑ yem.

¹⁵Kʋsǝsɩɩtʋ yekinɑ nɑ Ɩsɔ pɑ́ɑ́nɑ́ kɔŋ, nɑ kʋsǝsɩɩtʋ wɛnnɑ nɑ tǝ pǝntʋɣʋ wɛɛ tɔtɔ.

¹⁶Mpi Ɩsɔ kɑ sɩɩwɑ sɩ ɩ kɑ́ lɑ tɔ, tɑɑ tɛmnɑʋ tɔɔ kɛ́, ɩlɛnɑ pǝ́ pǝsɩ pʋlʋ mpi Ɩsɔ hɑɑ fɑɑlɑɑ tɔ, pǝ tɑɑ wɛɛ kʋsǝsɩɩtʋ tǝŋlɑɑ tike nyǝm. Amɑ nɑ pɑ tǝnɑ mpɑ pɑ tɛŋ pɑ tɑɑ nɑ Ɩsɔ kɛ́ teitei ɩsɩɩ Apǝlɑhɑm lɑpʋ tɔ pɑ nyǝm tɔtɔɣɔ. Apǝlɑhɑm kɛ́ tɑ́ tǝnɑ tɑ́ cɑɑ kɛ́.

¹⁷Hɑlɩ pɑ ŋmɑɑwɑ ḿpʋ́ɣʋ́ Ɩsɔ Tɔm tɑɑ sɩ: Mɑ lɑpɑ nɑ ń pǝsɩ piitimnɑɑ pɑɣɑlɛ cɑɑ. Ɩsɔ wei Apǝlɑhɑm tɛmnɑ ɩ tɑɑ kɛ́ mpʋ tɔ, ɩ́lɛ́ ɩ ɩsɛntɑɑ Apǝlɑhɑm ɩnǝɣǝlɛ tɑ́ cɑɑ. Ɩsɔ ɩnɩ ɩ feesiɣinɑ sǝtɑɑ nɑ ɩ́ lɑkɩ nɑ mpi pǝ tɑɑ wɛɛ tɔ pǝ́ wɛɛ.

¹⁸Nɑ pɑɑ nɑ pɩɩ tɛɛ pǝ tɔɔ tɔ, Apǝlɑhɑm tɛmɑ-tɩ nɑ ɩ tɑɑ nɑ ɩ́ tɛɛlǝɣɩ. Pǝ tɔɔ kɛ́ ɩ pǝsɑ piitim pɑɣɑlɛ cɑɑ, ɩsɩɩ Ɩsɔ kɑ yɔɣɔtʋɣʋ tɔ sɩ: Nyɑ́ piyɑ nyʋɣʋ kɑ́ wɛɛ mpʋ.

¹⁹Pɑɑ nɑ ɩ pɩɩsɩ kɑ wʋsǝnɑ ɩsɩɩ nɩɩnʋwɑ (100) nɑ ɩ́ kpɑtǝlɑ tǝkuŋkuŋku, nɑ Sɑɑlɑ nɑ́ tɑɑ fɛɩ lʋlʋɣʋ tɔm tɑɑ tɔ, ɩ tɑ nyǝnnɑ tǝnɑ. Amɑ ɩ tisɑ ɩ yuŋ kɛ Ɩsɔ tɔɔ kɛ́ tɑm.

²⁰Ɩ tɑɑ tɛm mpɩ pǝ tɑ pɑsɑ. Pǝyele ɩ tɑ lɑ sikɑ nɑ mpi Ɩsɔ tɔmɑ sɩ ɩ kɑ́ lɑ tɔ. Hɑlɩ ɩ nɑɑni sɔɔsɑ kʋsɔɔsʋ kɛ́, nɑ ɩ́ nyɔɔ toŋ, nɑ ɩ́ tɔŋnɑ Ɩsɔ kɛ́ sɑm.

²¹Ɩ kɑ tɛmɑ ɩ tɑɑ tǝkpɑtɑɑ sɩ Ɩsɔ pǝsǝɣɩ nɑ ɩ́ lɑ pǝ tǝnɑ mpi ɩ kɑ tɔmɑ sɩ ɩ kɑ́ lɑ tɔ.

²²Mpi pǝ tɔɔ Ɩsɔ mʋ-ɩ sɩ ɩ kɛ́ yʋlʋ kʋpɑŋ kɛ ɩ tɑɑ tɛm tɔɔ tɔɣɔlɛ.

²³Ɩlɛ pǝ tɑɣɑ ɩ nyʋɣʋ tɔɔ tike kɛ pɑ ŋmɑɑ mpʋ sɩ: Pɑ mʋ-ɩ sɩ ɩ kɛ́ yʋlʋ kʋpɑŋ.

²⁴Amɑ nɑ tɑ́ mpɑ tɑ́ tɑɑ tɛmnɑ wei ɩ kʋsɑ Tɑcɑɑ Yesu kɛ sǝtɑɑ tɑɑ nɑ pɑɑ mʋ-tʋ sɩ kʋpɑmɑ kɛ mpʋ tɔtɔ tɔ, tɑ́ tɔɔ kɛ́ pɑ ŋmɑɑwɑ tɔtɔ.

²⁵Tɑ́ ɩsɑɣɑtʋ tɔɔ kɛ́ pɑ kʋ-ɩ, nɑ pɑ feesɑ-ɩ sǝtɑɑ tɑɑ kɛ́ sɩ ɩ́ lɑ nɑ tǝ́ pǝsɩ kʋpɑmɑ kɛ Ɩsɔ ɩsɛntɑɑ.