Romo 3:5-27

⁵Kiado tokoriano nalo bova ga, a titai napano bo kija, tokoriano nalo na amila meravo ea tomu nalo miralo ka Atua kiano tuboiano nalo napano juko vio ka tokoriano nalo na, nalo amemedu mia amemedu. Kiniou neber jibe na, p̃eli mia kelvovu nalo tai atumolu averinavo “A verver kiado tokoriano nalo amila tenalo na bo nei, ka venia Atua tinien jer kito jidom sian vironiano van kito bereio riviorio?” Mia makanio, nina toro kiano jidomiano ga,

⁶maka tibe na leleio! Verver Atua naio maka tibure kito kulo Ju, p̃eli maka rivu ka naio tibure kulo dolu napano maka ave Ju, mia makanio, naio memedu a naio takurano ga be natibureano.

⁷Vikadeniano dolu jibe nei mijikia rimei bereio, napano naio ber jibe nei, berinavo “Beamu neber nomonea Atua, mia iorou maka neiagago ka naio, naruei jibe nojo nemila sibi ga. Mia kiaku sibiano na jo berialio ka Atua kiano iliano ga be riano, a jibe na jo rila siano ka rivavin. Ana ver tibe na, ka venia naio jidom to tibure kiniou kia na vo ka nobova?”

⁸A mia tomu nalo dolu aviligvilig iliano kinkin nalo tibe na riva vova lie vo, nalo aver “Verver bajago va berialio ka Atua kiano iliano be riano, bo ka kito rotu raladu bogo nonovio ka rala kariano ve miroano, ka rila Atua kiano iliano ve riano lie vo.” Nalo tealo aber nojo nomioliolu ka jibe nei, a nina be sibiano ga, a nalo na napano aju aber, mia nalo avar vironiano rimemedu ka kialo iliano va nalo nene.

⁹Kiniou nejidom navan bere ea tena roju roberiio, na rober toro na bar sio na Ju, mia tum̃abe ka naio? P̃eli tomu tealo be kialo vikadeniano ka mia bo lie ka naio jovulu toro napano maka rivar sio na jibe na, p̃eli makanio? Bo ga, kiaku verdop̃eiano, neber maka tibe na. Jibe ka napano neber ruei, kulo Ju nalo bija kulo Kiriki, abiniu aju yetano ka moroano na kariano bare ga.

¹⁰A jibe ka iliano nalo na niosi lu aberenio, Maka lele toro tai na kiano meuliano memedu.

¹¹Makanio, maka toro tai na bitilubar m̃arabo, maka tai na jo milavio jikili ka rial Atua ea kiano meuliano.

¹²Tomu nalo ajitetere den m̃arabo na memedu, nalo abano bova laka, maka lele tai na mim̃au memedu bo.

¹³Kialo iliano nalo bova, jibe tanunu na jono, buruminalo aju amim̃auka sibiano nalo, ililelaniano nalo aju amiyotuba ea kuluniolo nalo, jibe ka maro va naio jerbin toro.

¹⁴Riano ga, niolo ju bujo ka ilikakarioano va bija ilijaleleiano nalo ga.

¹⁵Jaalo nalo aju abarlo ajikiti jan ea vio ka ala burukija riou,

¹⁶kanalo ieliano nalo aba amila bulag vite nonovio, amila tomu nalo amijog bova.

¹⁷Maka asidom asidomii ka m̃arabo tai na tum̃aro jo,

¹⁸miralo maka leleio abitilubar ka Atua naio jo bitikarlo.

¹⁹Ee, iliano nalo na amiyotuba ea Atua kiano tuboiano, a kito romijikia ka venia napano Atua kiano tuboiano berenio, naio jo jiloglog kito kulo Ju. Kito roju yetano ka tuboiano na, a toro na bitilubar venia na tuboiano na berenio, naio maka bunu iliano ka verenio, naio mijikia ka yetemeriba reraio amila kokorovio, monoka aviniu ka avar vironiano kanio.

²⁰Maka toro tai rijogkar ka tuboiano na Atua kanano rivare ka naio rimemedu ka Atua mirano, a tuboiano na mila na abiniu amijikia vatitig ka kariano joalo.

²¹Jibe ka, m̃arabo na monmoneano ea tuboiano, maka toro tai rijikia takii rivanvano-o rimei rimemedu ea Atua mirano, a nina mila na Atua mial bo ka naio mila vatitig m̃arabo vou dolu tai napano romijikia ratakiio. M̃arabo vou dolu na naio bo laka, bior napano maka ve kiano tuboiano nalo napano mia toro monoka rijogkarlo. M̃arabo na, ilivivitauiano lu moruo nalo bija naverialiano nalo kialo iliano, nalo aberiio ruei tertelisu beamu nua, a vonganei Atua berialio ka kito ruei.

²²A m̃arabo nene jibe nei: naio be m̃arabo na moneano. Jibe na, toro kei napano biekouo ea Yesu Kristo, mia Atua rila naio rimemedu ea naio mirano kario. M̃arabo na maka ve tena tomu tealo ga, a tena tomu nonovio,

²³ka napano abiniu amila kariano, maka tai na kiano meuliano rimemedu rivokar jeleig meuliano novo napano Atua jidomio.

²⁴Mia bo ga, bior Kristo Yesu naio bulu bulag kito ruei, mila na Atua rila kito romemedu ea mirano, jibe ka jidomiano tai napano naio jian ban kito, binimei ea kiano tinieseseiano ga.

²⁵Naio bulu bulag kito ka napano Atua bitirilar naio jibe ka sida napano kiano burukija miou ka sekon bulag kiado kariano nalo kito napano romonea naio. A jum̃abe ka tomu nalo na jikar yuka nalo re nua binimei, bogo na Yesu maka rimei vo? Maka reialio napano Atua rije vironiano vanlo ka kialo kariano nalo, ana p̃eli be jidomiano ka p̃eli Atua mije vironiano na kariano na tomu tealo ga, a tomu tealo maka rije vironiano na kialo kariano? Mia makanio, nina maka river tibe na. Bogobe nua ruei, na Atua jo mila kiano jidomiano tebievi ga, a jo jokoko vio ka kiano tiniememiano, a naio mila jibe na ba bokar bogo na Yesu m̃aro ka kialo kariano na re nua bunu.

²⁶Jibe na, Atua berloglogial ka kito vonganei ka naio mim̃au memedu bogo nonovio ga, mila na toro kei napano balea ga Yesu, mia naio meravo rivu ea mirano.

²⁷Ver tibe na, mia kito romijikia ravarvar ka kito kar venia bereio? Maka titai, bior venia mila kito robo bija Atua bereio? Maka bajago na bo na jogkariano na kiano tuboiano napano rojidomii ka romila, mia maka leleio, bulapati nene, kiado moneano ea Yesu ga.