Roma 3:5-27

⁵Ena eda laulau gewagewa Eaubada ena laulau dudurai i hemasaraha abo ita ta ’ne edoha? Bena Eaubada ena laulau se gewagewa tatao ena i hemaisadi, wa? (Egu riba ta ea riba doha tatao edi riba.)

⁶Nige ariariri! Ena meta doha Eaubada tanoubu edoha i heduheduduraidi?

⁷Ena egu riba borabora Eaubada ena riba mamohoina i hemasaraha, arinai ia se hedebasae; ie saha se lauhetalagu doha eau tau baabaaeana?

⁸Hinage ie saha nige ta ’ne (doha hinage tatao borabora headi si ene ai ene), “Besi, ta laulau baaea, arinai lolo ta hetubu”? Tatao doha nei maisana lailai abo se abi, i dudurai.

⁹Abo edohana? Ita Iudea ta saetawatawaidi? Nige’e, nige ariariri: nabada wa Iudea eo Heleni eau ea heoiesegaidi baaea eai se laulau.

¹⁰Doha se uriyao si ene, “Nige esau ena laulau se dudurai, nige esega;

¹¹nige esau i nuatulobai, nige esau Eaubada i eooi.

¹²Gamagaridi dobila eai se laulausuara, se baaeagogo; nige esau ena laulau se lolo, nige esega.” (Psa. 14.1-2; 53.1-2.)

¹³“Gadodi doha bousa se soeauri, memenadi eai se ribaborabora; “Sopa aloalodi eai mota edi haha abamate.”

¹⁴“Awadi ribahemate eo kalapi se monau.”

¹⁵“Aedi se heula, osina bena se heboriri,

¹⁶sabom eo nuadubu edi dobila eai se toro.

¹⁷Loni dobilana nige abina se ata.”

¹⁸“Eaubada matausina matadi eai nige’e.” (Psa. 5.9; 140.3; 10.7; Is. 59.7-8; Psa. 36.1.)

¹⁹Na, ta nuatui riba gamagamagari laugagaeo eai se uridi isi laugagaeo tauabidi edi riba: awadi gamagamagari bena se guduohidi, abo tanoubu gamagamagari se ohihai, Eaubada matana eai se hegirudi.

²⁰Arinai ede laugagaeo abiabidi eai nige tau esau ia matana eai abo se hedudurai; paana laugagaeona eai baaea se nuatulobai ede.

²¹Na abotai abo Eaubada ena laulau dudurai se hemasarahayama, laugagaeona eai nige’e, ia ede laugagaeona eo peroveta se hemasaraha mo,

²²Eaubada ena laulau dudurai, ia ede Iesu Keriso sunumana tauataataiena gamagamagaridi enadi. Nige hinehinerina,

²³paana tatao gamagamagari edi laulau se baaea Eaubada ena namanamari sora nige se lobai;

²⁴ena ainauia eai se hedudurainapaidi, abihemauri debana eai Keriso Iesu boeana eai.

²⁵ia Eaubada i hetoro hemasarahayao, baaea bena i saugabaei, ia osinana eai, sunuma eai ta abi enada. Teina arinai Eaubada ena laulau dudurai i masaraha, nabada wa baaeadi i nuatugabaedi ena healapaipai debana eai;

²⁶ena laulau dudurai aba‐italobaina, ea ’ne teina huia ena laulau dudurai abo i masaraha, iaede Iesu tausunumaena ia abo i hemauri ede.

²⁷Eda ribapasipasi wa haedi? Se guduhai. Aitea laugagaeona eai? Laulau laugagaeona? Nige’e, na sunuma laugagaeona mo.