Rom 3:5-27

⁵Hita e huriki a bakovi hale, pali a naro hale ne hita i vakasiri kavakava a Vure i malamala. Pali si gi ta navai? Si gi taki a Vure i uka ma i ramai a naro kamumu na tahuna i habi a nimadihi ne hita na naro hale ne hita? Ngane a ta manga a bakovi tavula kunana.

⁶Nahea si gi ta maea! Ge mavonga, ge pelekado navai e huriki lobo na malala?

⁷Pali a viri tara bara i koke, i ta maea, “Na tahuna iau a tatami, e huriki ri matakilalea a Vure a Viri ni ta muholi, lakea ri kavurikea. I mavonga, a Vure, i navai ge taki iau a bakovi hale?

⁸O Paulus, a ngavamu ge muholi, i kamumu si gi rata a naro hale, lakea e huriki bara ri kavurikea a Vure!” E huriki ranga ri ratea a ngava hale iea, ri padi virihi tavula iau, ta a ratea a ngava iea. I kamumu a Vure ge habi a nimadihi ne ria vona a naro hale iea ri ratea.

⁹Pali hita e huriki a Iuda, si rangi e huriki ranga, o i uka? I uka liu! A ngava si ratea pali i maea, e huriki a Iuda ri manga kunana e huriki i uka ma ria a Iuda. Hita lobo si rata pali a naro hale, lakea a Vure ge pelekado hita.

¹⁰A ngava ni here puru na Hinere i ta maea, “I uka tara viri i malamala na matana Vure. I uka liu.

¹¹I uka tara viri ge longokilalea a Nitana Vure. I uka tara viri ge toni ni laho turana Vure.

¹²E huriki lobo ri ngalahere na Vure. Ria lobo a bakovi tavula na matana. I uka tara viri ge rata a naro kamumu. I uka liu.”

¹³“Na ngavane ria, ri bimate e huriki. A tabelene ria, ri tatami kunana.” “A nitane ria i ratapile e huriki, i manga a mata hale i kara mate a viri.”

¹⁴“Ri ruduraha, ri biu kato vakaroro e huriki.”

¹⁵“Ri kapi kunana ri gi rabalaki a viri.

¹⁶Na tabeke lobo ri lakea vona ri ratapile, ri vakamadihi e huriki.

¹⁷Ri keri ni made na nivalemu.”

¹⁸“I uka ma ri mangenge na Vure.”

¹⁹Si lohoka vona, a Vinara ne Moses ni here virihi mae e huriki a Iuda, re huriki a vinara i matakari ria. I mavonga, e huriki lobo na malala bara ri keri ni koli a ngava. E huriki lobo bara ri tahoka a ngava na matana Vure; e huriki a Iuda, e huriki i uka ma ria a Iuda.

²⁰I uka tara viri ge ramai a vinara lobo, lakea a Vure ge takia, ta ia a bakovi malamala. A leho na vinara, i rata hita si gi matakilaka vona a naro hale ne hita.

²¹Ngane i bele kavakava a dala a Vure i ravunu vuroki a naro hale ne hita. I uka ma i bele na ni longototo a Vinara. I bele na dala tara. A dala iea, a Vure i vakalongo muga vona hosi na Hinere i maea,

²²a Vure ge ravunu vuroki a naro hale ne huriki lobo ri luhoi torea e Isu Kristo, a vuhuna e huriki lobo ri palupulupu na matana; e huriki a Iuda, e huriki i uka ma ria a Iuda.

²³Hita lobo si rata pali a naro hale, si marava basi na bagetuanga na Vure.

²⁴Pali a Vure i rata kamumu hita, i taki hita si malamala. I uka ma si ratea tara maki a Vure ge vivi ne hita, ge konamule hita. I rata tavula kunana. E Isu Kristo i ratea a dala iea na nimatena.

²⁵A Vure i rudua ge mate, ge bole a murine hita, ge vakalobo a rongova na Vure, lakea a Vure ge puga vuroki a naro hale ne huriki ri luhoi tora ia. I rata mavonga si gi matakilaka vona a narona i malamala, a vuhuna hosi i hatenono ne huriki a bakovi hale, i uka ma i habi a nimadihi malaviriri ne ria.

²⁶I rata mavonga, na tahuna mona si gi matakilaka vona, ia i malamala. A Vure i rata e huriki lobo ri luhoi torea e Isu ri gi malamala.

²⁷I mavonga, i uka tara viri ge bibi rike mulea, a vuhuna si lohoka vona i uka tara viri ge longototo lobo a Vinara, lakea a Vure ge ravunu vuroki a naro hale vona. A Vure i ravunu vuroki a naro hale ne huriki ri luhoi torea e Isu.