1Mürin, Moses me Aaron ra feila ren Farao o üreni, “Iei alon ewe Samol mi Lapalap ewe Koten Israel, ‘Kopwe mwüt ngeni nei aramas pwe repwe feila o föri eu chulap fän itei lon fanüapö.’”
2Nge Farao a pälüeniir, “Iö na ewe Samol mi Lapalap pwe üpwe aüselinga alon o mwütala Israel? Üsap silei ewe Samol mi Lapalap, üsap pwal mwüt ngeni Israel epwe feila.”
3Iwe, ra pälüeni, “Än chon Ipru Kot a churikem. Kose mochen mwüt ngenikem pwe äm aipwe saila lon fanüapö lon ükükün ülüngat rän. Pun aipwe asor ngeni äm we Kot ewe Samol mi Lapalap, pwe esap apwüngükem ren mätter ika maun.”
4Nge ewe kingen Isip a üreni Moses me Aaron, “Pwota oua mochen uweela ekewe aramas seni ar angang weires? Oupwe feila, föri ämi angang.”
5Farao a pwal üreniir, “Nengeni, ekewe aramas ra kon chomong seni chon Isip, nge ämi oua mochen aüküretiu seni ar angang.”
6Lon ewe chök rän, Farao a allük ngeni ekewe chon nemeni ekewe aramas fän pöchökül me ekewe souemwenin angang,
7“Ousap chüen ngeni ekewe aramas fetilipwas le föri pilak usun me lom, pun repwe feila püsin ioni.
8Nge repwe chök föri ükükün förier pilak usun me mwan. Ousap fokun akisikisätiu, pun ra chipwang. Iei mine ra apasa lon ar siö, ‘Kopwe mwüt ngenikem pwe aipwe feila o asor ngeni äm we Kot.’
9Oupwe achouu ar angang. Oupwe angangeer pwe esap wor fansoun ar rongorong kapas chofana.”
10Mürin ekewe chon nemenem fän pöchökül me ekewe souemwenin angang ra feila ren ekewe aramas o üreniir, “Iei alon Farao, ‘Üsap chüen ngenikemi fetilipwas.
11Oupwe püsin feila o kütfetal fetilipwas, nge iteiten föriemi pilak esap fokun kisikisitiu.’”
12Iei mine ekewe aramas ra fetalfeil won unusen ewe fanü Isip pwe repwe ionifengeni fetilipwas.
13Iwe, ekewe chon nemenem fän pöchökül ra inemoucheer o apasa, “Oupwe awesöchü ükükün föriemi pilak lon eu me eu rän usun chök me mwan, lupwen a wor ämi fetilipwas.”
14Iwe, ekewe souemwenin angang seni Israel mi kefilitä me ren nöün Farao chon nemenem ra kawet. Iwe, ra aisiniir, “Pwota ousap awesöchü föriemi pilak näneu me ikenai usun me mwan?”
15Mürin ekewe souemwenin angang seni Israel ra feito ren Farao o siö ngeni, “Pwota ka föri iei usun ngenikem äm noum chon angang?
16Resap ngenikem fetilipwas, nge ra ürenikem pwe aipwe föri pilak. Iei ra wichikem äm noum chon angang, nge ei püsin mwälin noum aramas.”
17Nge Farao a pälüeniir, “Oua chök chipwang, oua chök chipwang, iei mine oua apasa, ‘Kopwe mwüt ngenikem pwe äm aipwe feila o asor ngeni ewe Samol mi Lapalap.’
18Oupwe liwinla iei o angang. Esap wor eman epwe ngenikemi fetilipwas, nge epwe chök wor ükükün föriemi pilak usun me mwan.”
19Iwe, ekewe souemwenin angang seni Israel ra küna pwe ra nonom lon osupwang watte, lupwen ra rongorong pwe ükükün förier pilak lon eu rän esap fokun kisikisitiu.
20Nge lupwen ra towu seni Farao, ra churi Moses me Aaron, pun ra witiwitiir.
21Iwe, ra üreniir, “Ewe Samol mi Lapalap epwe nenengeni o apwüngükemi, pun oua apwongauakem fän mesen Farao me nöün chon angang, oua pwal föri met repwe niikem ren.”
22Mürin, Moses a sap ngeni ewe Samol mi Lapalap o apasa, “Ai Samol, pwota ka afeiengaua ekei aramas? Pwota mwo chök ke fen akünöüeito ikei?
23Pun seni ewe fansoun üa churi Farao o kapas ngeni fän itom, a fen afeiengaua ekei aramas, nge kosap föri och pwe kopwe angasala noum kei aramas.”
