1Ewe Samol a uwato rochopwak won Sion lon an song. A aturätiu seni läng lingen Israel we won pwül, Lon ränin an song esap ekieki mwo nge imwan imwenfel.
2Ewe Samol a ataela imwen ekewe mwirimwirin Jakop meinisin, nge esap eäni tong. A ataetiu ekewe imwen maun mi pöchökül me lon Juta lon an lingeringer. A awarato itengau won ewe mwü me nöün kewe sounemenem.
3A atatakisi pöchökülen Israel meinisin lon an song mi fokun watte. Esap mochen alisikich, lupwen chon oputach kewe ra feito. An lingeringeritikich a usun chök eu ekkei lon Israel mi kenala mettoch meinisin mi nom ünükün.
4A äpera an likepich ngenikich usun eman chon oputach, pöüifichin a molotä. A niela chokewe meinisin sa pwapwaitiir. A ninätiu an lingeringer usun ekkei won ekewe imwen Sion.
5Ewe Samol a ataela Israel usun chök eman chon oputach. A ataela an Israel kewe imwen king meinisin o atatakisi an kewe imwen maun mi pöchökül. A pwal achomonga letipeta me kechü ngeni ekewe aramasen Juta.
6A ataetiu imwan we imwenfel, pwe a usun chök eu tanipi, o atatakisi ewe lenien chulap. Ewe Samol mi Lapalap a awesi me lon Sion ekewe chulap mi kefilitä me ekewe ränin sapat. Lon an song mi fokun watte a pöütala ekewe king me ekewe souasor.
7Ewe Samol esap chüen aücheani an we rongen asor, a likitala imwan we mi pin. A mwüt ngeni chon oputach pwe repwe ataela etippan. Ra mweireiren win lon imwen ewe Samol mi Lapalap usun ewe mweireir a fis lon ekewe ränin chulap.
8Ewe Samol mi Lapalap a apwüngala pwe epwe atatakisi tittin Sion. A aükü ewe leni ren eu selin aükük o pii pwe epwe unusen tala. A föri pwe ekewe imw tekia me ekewe tit ra tapök.
9Ekewe asamalapen Sion ra irela fän ekewe ioien mettoch mi ta. Kot a kupi o atatakisi amwöchür kewe. Än Sion kewe king me ekewe samol ra oola lein chon ekewe mwü. Esap chüen wor eman a aiöü ngeni aramas ewe allük, esap chüen wor künan ekewe soufos me ren ewe Samol mi Lapalap.
10Ekewe souakomwen Sion ra mot won pwül fän mosonoson. Ra tukotukotä pwül won mökürer o üföüf üf seni tuk, pwe asisilen ar letipeta. Ekewe föpwülün Jerusalem ra rotiu lepwül.
11Mesei a tton ren kechü, leuti a fokun weires. Letipeta a sasewu me lon lelukei pokiten feiengauen nei aramas, pwal pokiten än ekewe semirit me mönükol aiengau won alen ewe telinimw.
12Ra kechü ngeni inelaper kewe, pun ra echik o kaka. Ra turula won alen ewe telinimw usun chök aramas mi echinimä ren kinaser, o mäla fän mwärin inelaper kewe.
13En Jerusalem, met üpwe tongeni apasa usum? Ren met üpwe tongeni achipok? Esap wor eman a riaföü usum, en liewe Sion. Pun om tatakis a watte usun watten ewe matau. Iö a tongeni apöchökülasefäliik?
14Künan noum kewe soufos fän itom ra mwäl o chofana. Resap pwäri ngonuk om kewe tipis, pwe repwe epeti senuk om kopwe oola. Nge osunier fän itom ra mwäl o atuputup.
15Meinisin mi pwerela ünükum ra ämängauok. Ra elifechifech o atakiri talan Jerusalem. Ra apasa, “Ifa usun, iei ewe telinimw ra aita ngeni pwe a unusen mürina, chon fanüfan ra pwapwaiti?”
16Chon oputom meinisin ra eäni kapas turunufas ngonuk, ra achuangauek o ngäruk, ra apasa, “Sa ataela Jerusalem. Aha, iei ewe rän sa witiwiti. Iei sa tori, sa küna.”
17Ewe Samol mi Lapalap a föri mine a ekiekietä, a afisätä an kapasen apwüng a piin apasa me lomlom. A kata, nge esap eäni tong. A awinna chon oputom o apwapwaar ren om feiengau.
18En Jerusalem, kopwe leüömong le siö ngeni ewe Samol. Chönün mesom repwe suputiu lerän me lepwin usun chök eu chanpupu. Kosap asösö, kosap ükütiu le kechü.
19Kopwe pwätäkis lepwin o leüömong le siö. Kopwe ninawu masouen lelukom me fän mesen ewe Samol usun eman a ninawu koluk, kopwe iotek ngeni fän iten manauen noum kana mi arap ngeni mäla ren echik lepwokukun iteiten ekewe al.
20Ai Samol mi Lapalap, kopwe nenengeni o ekieki! Ka föri ngeni iö ei sokun? Ifa usun, fefin repwe ochei nöür semirit ra tümwünüöchüür o tongeer? Ifa usun, ekewe souasor me soufos repwe ninnila lon ewe imwenfel?
21Ekewe ät me ekewe chinlap ra mätiu won ekewe al. Ekewe föpwül me ekewe alüal ra mäla ren ketilas. Ka nirela lon ränin om song, ka nirela, nge kosap ümöümöch ngeniir.
22Ka körifengeni chon aniuokusuei seni ekis meinisin, usun aramas ra kökköto ngeni eu ränin chulap. Esap wor eman aramas a tongeni sü ika manau lon ränin om song. Ewe chon oputaei a niela chokewe üa oupuur o foleniir.
